ԿՏ-ի և ՄՌՏ-ի տարբերությունները. armeniamedicalcenter.am

ԿՏ-ի և ՄՌՏ-ի հիմնական տարբերությունը պայմանավորված է նրանցում օգտագործվող տարբեր ֆիզիկական երևույթներով: ԿՏ-ի դեպքում դա ռենտգենյան ճառագայթումն է, որը պատկերացում է տալիս նյութի ֆիզիկական վիճակի մասին, իսկ ՄՌՏ-ի դեպքում գործում է մշտական և պուլսացող մագնիսական դաշտ, ինչպես նաև՝ ռադիոհաճախականության ճառագայթումը, որը տեղեկատվություն է տալիս պրոտոնների տեղաբաշխման վերաբերյալ, այսինքն հյուսվածքի քիմիական կազմության վերաբերյալ:

ԿՏ-ի դեպքում բժիշկը տեսնում է ոչ միայն հյուսվածքները, այլ նաև նրանց ռենտգենյան խտությունը, որը փոխվում է հիվանդությունների ժամանակ: ՄՌՏ-ի դեպքում բժիշկը գնահատում է միայն տեսողական պատկերը: Ճիշտ կլիներ, եթե բժիշկը ԿՏ կամ ՄՌՏ նշանակելիս խորհրդակցեր ճառագայթային ախտորոշմամբ զբաղվող մասնագետի հետ․ դա շատ հաճախ կօգներ խուսափելու ավելի բարձր արժեքով ՄՌՏ հետազոտությունից և անհրաժեշտ տեղեկատվությունն ստանալ ԿՏ-ով:

Ընդհանուր առմամբ ՄՌՏ-ն ավելի լավ տարբերակում է փափուկ հյուսվածքները: Ոսկրերն այդ դեպքում չեն կարող տեսանելի լինել․ բացակայում է ռեզոնանսը կալցիումից, և ոսկրային հյուսվածքը տեսանելի է միայն անուղղակիորեն:

Կարելի է փաստել, որ ՄՌՏ-ն ավելի տեղեկատվական է գլխուղեղի դիֆուզ և օջախային ախտահարումների, ողնուղեղի և գանգուղեղային միացման հատվածի ախտահարումների դեպքում /այստեղ ԿՏ-ն բոլորովին տեղեկատվական չէ/, աճառային հյուսվածքի խնդիրների ժամանակ: ԿՏ-ն գերադասելի է կրծքավանդակի, որովայնի, կոնքի գանգի հիմքի հիվանդությունների ժամանակ: Որոշ դեպքերում, ճշգրիտ ախտորոշման համար հարկ է լինում կատարել և՛ ԿՏ, և՛ ՄՌՏ հետազոտություն:

ՄՌՏ-ն ավելի տեղեկատվական է, երբ առկա են.

• Ռենտգեն-կոնտրաստ նյութի նկատմամբ անընկալություն, երբ ԿՏ-ի ժամանակ անհրաժեշտ է կոնտրաստ նյութի օգտագործումը
• Ուղեղի ուռուցք, ուղեղի հյուսվածքի բորբոքում, ինսուլտ, ցրված սկլերոզ
• Ողնուղեղի բոլոր ախտահարումները, ողնաշարի հիվանդությունները առավելապես երիտասարդների և մեծահասակների մոտ
• Օրբիտա, հիպոֆիզ, ներգանգային նյարդեր
• Հոդային մակերեսներ, կապանային սարք, մկաններ
• Քաղցկեղի փուլերի գնահատում /կոնտրաստ նյութի օգտագործմամբ/

ԿՏ-ն ավելի տեղեկատվական է, երբ կան.
 

• Սուր ներգանգային հեմատոմաներ, գլխուղեղի և գանգոսկրերի վնասվածքներ /տրավմաներ/
• Գլխուղեղի ուռուցքներ, գանգուղեղային արյան շրջանառության խանգարում
• Գանգի հիմի ոսկրերի, քունքոսկրերի, հարքթային ծոցերի ախտահարում
• Գանգոսկրի դիմային շրջանի, ատամների, ծնոտների, վահանագեղձի և հարվահանագեղձերի ախտահարում
• Ցանկացած տեղակայման անոթերի անևրիզմաներ և աթերոսկլերոտիկ ախտահարում
• Սինուսիտներ, օտիտներ, քունքոսկրերի բուրգերի /պիրամիդներ/ ախտահարում
• Ողնաշարի հիվանդություններ՝ օստեոպորոզ, սկավառակների ճողվածք, դեգեներատիվ և դիստրոֆիկ ախտահարումներ, սկոլիոզ և այլն:
• Նախընտրելի է թոքերի քաղցկեղի, տուբերկուլյոզի, թոքաբորբի ժամանակ
• Բավականին զգայուն հետազոտություն է թոքերի ինտերստիցիալ փոփոխությունների, ֆիբրոզի և թոքերի պերիֆերիկ քաղցկեղի մինչկլինիկական շրջանի դեպքում
• Որովայնի բոլոր պաթոլոգիաներ
• Ոսկրերի ախտահարումներ, բուժառուներ մետաղական իմպլանտներով

ՄՌՏ-ի դեպքում անհրաժեշտ է բժշկին տեղեկացնել որոշ վիճակների մասին.

• Մետաղական բեկորներ
• Հղիություն
• Սրտի ռիթմի կարգավորման սարքի առկայություն
• Լսողական սարք կամ իմպլանտներ խխունջում
• Մետաղական իմպլանտներ
• Ատամների մետաղական կամուրջ կամ պսակ
• Վիրաբուժական սեղմակ /օր. անևրիզմայի շրջանում/
• Վիրաբուժական բրեկետներ
• Կողմնային սյուների ստիմուլյատորներ

Պետք է հիշել նաև, որ ՄՌՏ չի կարելի իրականացնել կենսական գործառույթների խանգարման դեպքում, երբ մշտական գործիքային հսկողություն է անհրաժեշտ, ինչպես նաև փակ տարածության վախի և ոչ նորմալ պահվածքով բուժառուների պարագայում:

ԿՏ-ի դեպքում նման հակացուցումներ չկան:

Вопросы, ответы, комментарии