Պապիլոմա. պատճառները, վտանգավորությունը և բուժման եղանակները. drtehmine.com

Պապիլոման առաջանում է մաշկի վերին շերտի՝ էպիդերմիսի գերաճի հետևանքով։ Այն ունի մաշկի արտափքման տեսք՝  1–ից մինչև 5-7 մմ, հազվադեպ` մինչև 2 սմ։ Ձևը տատանվում է կետայինից կամ մի փոքր կախված մաշկային արտափքումից` մինչև գարու հատիկ։  

Պապիլոմայի գույնը հաճախ բաց դարչնագույն է՝ մաշկի երանգով, հնարավոր են նաև սպիտակ, մուգ դարչնագոյն պապիլոմաներ։ Պապիլոմաները կարող են տեղակայվել դեմքին, պարանոցին, որովայնի և մեջքի շրջանում, անութափոսերում, ինչպես նաև բերանի խոռոչի, կոկորդի, շնչափողի լորձաթաղանթին։

Պապիլոմաների գերաճը մաշկի սահմանափակ հատվածում կոչվում է պապիլոմատոզ, այն ունի ծաղկակաղամբի նման սպիտակ վահանիկների տեսք, տեղակայվում է հիմնականում տարեցների մոտ՝ բերանի խոռոչի լորձաթաղանթին։

Ինչո՞ւ են առաջանում պապիլոմաները

Պապիլոմաների առաջացման համար  «պատասխանատու» է մարդու պապիլոմայի վիրուսը (ՄՊՎ)։ Հայտնի են վիրուսի տարբեր շտամեր՝ ուռուցքածին և ոչ ուռուցքածին։ Ուռուցքածին շտամերն անվանում են նաև ցածր կամ բարձր քաղցկեղածին ռիսկի շտամեր։  Ուռուցքածին շտամով վարակվելու դեպքում մեծանում է պապիլոմաների չարորակացման վտանգը։  

Մարդու պապիլոմա վիրուսով վարակումը տեղի է ունենում վիրուսակրի հետ կենցաղային կամ սեռական շփման ժամանակ։ Ոչ բոլոր կոնտակտավորներն են հիվանդանում։ Սեռական կոնտակտի դեպքում վարակման  հավանականությունը կազմում է մոտավորապես 70% , կենցաղային շփման դեպքում՝ ավելի պակաս։

Կանանց համար բարձր ուռուցքածին ռիսկի ՄՊՎ-ով վարակումը վտանգավոր է արգանդի վզիկի քաղցկեղի զարգացմամբ։ Վիրուսի տվյալ շտամի հայտնաբերման դեպքում խորհուրդ է տրվում կանոնավոր այցելել գինեկոլոգին հսկողական` զննումների համար։  Վարակի բացակայության դեպքում կարելի է պատվաստվել արգանդի վզիկի քաղկեղի դեմ։ Վակցինացիան իրականացվում է հասուն աղջիկներին և կանանց` երեք անգամ։

Պապիլոմաներն արագ աճում  են ցածր իմունիտետի դեպքում՝ երկարատև հիվանդություններից հետո, մշտական գերհոգնածության և անքնության պայմաններում, օրգանիզմի պաշտպանական մեխանիզմների վրա ազդող դեորայքի ընդունման ժամանակ։ Հղիության ժամանակ հորմոնային ֆոնի փոփոխությունը և հղի կնոջ իմունիտետի բնական իջեցումը նպաստում են այս շրջանում պապիլոմաների արագ աճին։  

Պապիլոմաներին բնորոշ է աճի դանդաղ տեմպը, սակայն հղիության ժամանակ դրանք ո՛չ միայն  արագ մեծանում են չափերով, այլ նաև նոր տարրեր են հայտնվում։

Ինչո՞վ են վտանգավոր պապիլոմաները։

• Պապիլոմաները հոգեբանական անհարմարություն են առաջացնում՝ պայմանավորված կոսմետիկ տհաճությամբ, արտաքին տեսքի վատացմամբ։
• Օրգանիզմում երկարատև գոյություն ունեցող պապիլոման կարող է վերածվել չարորակ ուռուցքի, եթե ՄՊՎ-ն պատկանում է ուռուցքածին շտամի։
• Հագուստի հետ շփման տեղերում պապիլոմաների առաջացումը բերում է դրանց պատռման և արյունահոսության կամ շրջակա հյուսվածքների բորբոքման։

Կոկորդում պապիլոմայի առկայությունը դրսևորվում է ձայնի խռպոտությամբ, դժվարացած շնչառությամբ։

Ինչպե՞ս բուժել պապիլոման

Պապիլոման դեղորայքով հնարավոր չէ բուժել։ Արտափքման առաջացման դեպքում այն պետք է հեռացնել։ Ընդ որում, պետք է չմոռանալ, որ թույլ իմունիտետը կամ գերհոգնածությունը կարող են նպաստել պապիլոմաների կրկնությանը։ Այդ պատճառով պապիլոմաների հեռացումից հետո պետք է մեծ ուշադրություն դարձնել սեփական առողջությանը, խուսափել մրսելուց և վիրուսային վարակներից, լիարժեք սնվել, պահպանել հանգստի և քնի ռեժիմը։

Այն պապիլոմաները, որոնք հաճախ վնասվում են հագուստով, արյունահոսում կամ բորբոքվում են, պետք է անպայման հեռացնել։

Պապիլոմայի առաջացումը կամ վերջինիս արագ աճը բժշկին դիմելու անհրաժեշտության ազդակ է՝ խորհրդատվություն ստանալու և բուժման եղանակն ընտրելու համար։

Պապիլոմայի հեռացումն իրականացնում է վիրաբույժը ստացիոնար պայմանններում՝ հետևյալ եղանակներով՝

• Սուրգիտրոնի սարքի միջոցով (ռադիոդանակ, ռադիոալիքային հեռացում),
• նշտարի օգնությամբ,
• լազերով։

Եթե պացիենտի մաշկի վրա ոչ թե պապիլոմա է, այլ նևուս, այն հեռացնում է բժիշկ-ուռուցքաբանը։ Կանացի սեռական օրգանների վրա գտնվող պապիլոմաները կոչվում են կոնդիլոմաներ, որոնք հեռացնում են գինեկոլոգները։

Հարցեր, պատասխաններ, մեկնաբանություններ