Կրծքերը մեծացնել ցանկացող կանայք կարող են հանգիստ լինել, սիլիկոնները բարձրակարգ ընկերություններից են ներմուծվում

Պլաստիկ վիրահատություններն արվում են զուտ ինքնահաստատման համար, այս կարծիքին է Պլաստիկ և վերականգնողական ծառայութան ղեկավար Գևորգ Ստեփանյանը. «Պլաստիկ վիրաբուժությունը շատ հին պատմություն ունի, դեռևս մ.թ.ա. հին Եգիպտոսում մարդիկ փորձել են փոփոխություննրի ենթարկել մարմնի այս կամ այն հատվածը։ Ես համամիտ չեմ այն տեսակետին, որ նման վիրահատությունների դիմում են զուտ նորաձևությանը տուրք տալով»:

Իսկ կլինիկական հոգեբան Միքայել Մադաթյանի հավաստմամբ` պլաստիկ վիրահատություն կատարելուց առաջ անհրաժեշտ է դիմել հոգեբանի օգնությանը. «Այստեղ բախում է առաջանում մարդու ներքինի և արտաքինի միջև, քանի որ ներքինը չի ընդունում արտաքինը»:

Mardik.am-ի  այն հարցին, թե Հայաստանում մարմնի ո՞ր մասն  են ավելի շատ ենթարկում վիրահատության, Գևորգ Ստեփանյանը նշեց, որ, բնականաբար, հայերը քթի վիրահատության են շատ դիմում.«Բայց ասեմ, որ մարմնի բոլոր հատվածներն էլ ենթարկում են վիրահատությունների, բայց, չգիտես ինչու, ավելի շատ խոսվում է  քթի վիրահատության մասին, հավասարապես նաև վիրահատում են կրծքագեղձերը և ոտքերը»:

Mardik.am-ի  այն հարցին, թե որքանով են համապատասխանում իրականությանն այն խոսակցությունները, ըստ որոնց, հատկապես կրծքի վիրահատությունը վտանգավոր է առողջությանը և կարող է քաղցկեղածին լինել, Ստեփանյանը նշեց, որ այժմ պլաստիկ վիրահատությունները բարձր մակարդակով են արվում, բացի այդ սիլիկոնները ներմուծվում են բարձրակարգ ու ճանաչված ընկերություններից.«Անհնար է, որ կրծքերի վիրահատությունից հետո որևէ ուռուցք առաջանա, մենք նախքան վիրահատությունը կուրծքը հետազոտում ենք, միայն իդեալական մաքուր կուրծքն ենք վիրահատում»:

Հոգեբանը փաստեց, որ եղել են այնպիսի դեպքեր, երբ անհատը ցանկացել է երկարացնել ոտքերը կամ մեծացնել կուրծքը, սակայն հոգեբանի հետ զրուցից հետո հասկացել է, որ բնավ դրա կարիքը չունի և հրաժարվել է վիրահատությունից:

Իսկ Գևորգ Ստեփանյանը նշեց, որ երբ հաճախորդը չափազանց բծախնդիր է լինում, բժիշկները գիտակցում են, որ նույնիսկ ամենալավ արդյունքի դեպքում նա դժգոհելու է և հրաժարվում են այդ մարդուն վիրահատելուց. «Կան այնպիսի մարդիկ, որոնց կարծիքով` վիրահատությունից հետո հրաշք է լինելու, բայց պլաստիկ վիրահատությունը կախարդական փայտիկի ազդեցություն չի կարող ունենալ»:

Հարցեր, պատասխաններ, մեկնաբանություններ