Համակարգիչը «բացահայտում» է այրոցի պատճառը

Այրոցի զգացումը յուրահատուկ ախտանիշ է, որը երկար ժամանակ ստիպում է հիշել իրեն: Կրծքավանդակի շրջանում «հրդեհի» առաջացման պատճառը օգնում է գտնել համակարգչային մեթոդը, որը բժիշկները ախտորոշման «ոսկե ստանդարտ» են անվանում: Դա կերակրափողի օրվա թթվայնության վերահսկումն է:

Կրծքավանդակի հետին մասում այրոցի զգացում առաջանում է ուտելուց կամ մարմնի դիրքը փոխելուց հետո: Խնդիրն այն է, որ ստամոքսից թթվային զանգվածը հետ է մղվում դեպի կերակրափող, որն անվանում են ստամոքսակերակրափողային ռեֆլյուքս: Դրա պատճառը ստամոքսի և կերակրափողի միջև գտնվող կլոր մկանի (սֆինկտեր) թույլ գործունեությունն է, և քանի որ կերակրափողի պատերը խիստ զգայուն են ստամոքսի թթվային զանգվածի նկատմամբ, ուստի և այրող ցավով են արձագանքում այդ զանգվածին: Այրոց կարող է առաջանալ առանց կերակրափողի լորձաթաղանթի տեսանելի վնասվածքների, որը համարվում է ֆունկցիոնալ: 

Ապացուցված է, որ այրոցի զգացում կարող է առաջանալ չափազանց տաք, կծու, ճարպոտ կերակուր, տապակած ուտեստներ, քաղցրավենիք (շոկոլադ, խմորեղեն և այլն) ուտելուց, գազավորած հեղուկներ, ալկոհոլ, թունդ սուրճ կամ թեյ խմելուց հետո:

Այրոցի առաջացմանը նպաստում են սնունդ ընդունելուց հետո առաջին երկու ժամում մարմնի հորիզոնական դիրքը կամ թեքումները, մարմնի հավելյալ զանգվածը, ծխելը, պարբերաբար շատ ուտելը (ստամոքսի լայնացում), հղիությունը: Բժիշկների կարծիքով, ռիսկի լրացուցիչ գործոն են նաև ստամոքսաաղիքային տրակտի հարթ մկանները թուլացնող դեղամիջոցները (սպազմոլիտիկներ, նիտրատներ, տրանկվիլիզատորներ և այլն):

Գոյություն ունեն ռեֆլյուքսի առկայության կամ բացակայության հիմնական պատճառը բացահայտող, ինչպես նաև կերակրափողի լորձաթաղանթի վիճակը որոշող մեթոդներ: Դրանցից մեկը կերակրափողի օրվա թթվայնության վերահսկումն է, որն էլ ներկայումս անվանում են ախտորոշման ‚ոսկե ստանդարտե: Սարքավորման օգնությամբ որոշում են մի շարք ախտանիշների (այրոց, հազ, քնած ժամանակ շնչառության կանգ` ապնոէ, ցավեր կրծքավանդակի հետին մասում, խռպոտ ձայն, տհաճ հոտ բերանից, կարիես) պատճառները: Չափումները կատարվում են նուրբ զոնդի (այն քթի միջով մտցվում է կերակրափող) և ինքնատեղաշարժվող-գրանցող բլոկի օգնությամբ:

Հետազոտությունը անհարմարավետություն չի պատճառում, այն չի պահանջում ապրելաձևի, սննդի բնույթի փոփոխություն, օգնում է բացահայտել կապը ախտանիշների և ստամոքսի ու կերակրափողի թթվայնության միջև, հավաստիորեն գնահատել ստամոքսաաղիքային տրակտի վերին բաժինների ֆունկցիաները, տարբերակել սրտի և կերակրափողի հետ կապված ցավերը, իսկ ամենակարևորը` ընտրել հայտնաբերված հիվանդությունների բուժման ավելի արդյունավետ եղանակ: Ախտաբանական վիճակ է, եթե օրվա մեջ կերակրափողի ստորին հատվածում մեկ ժամում, մարմնի ուղղահայաց (արթուն վիճակ) դիրքում` 91 րոպեի, հորիզոնական դիրքում (քնած ժամանակ)` 18 րոպեի ընթացքում գրանցվում է 4.0-ից ցածր թթվայնություն:

Եթե ռեֆլյուքսի տևողությունն ավելի կարճ է, սակայն այրոց է առաջացել, բժիշկներն այն ֆունկցիոնալ են համարում, այսինքն, բուժումն արագ արդյունք կտա, եթե մարդը փոխի կյանքի որակը, սննդի բնույթը և վերացնի օրգանիզմի վրա ազդող այն գործոնները, որոնք այրոցի առաջացման պատճառ են դառնում:

Հարցեր, պատասխաններ, մեկնաբանություններ