Մանուկներին նվիրված Ամանորի միջոցառումը «Իզմիրլյան» բժշկական կենտրոնում. izmirlianmedicalcenter.com

«Իզմիրլյան» բժշկական կենտրոնի տնօրինությունը երեխաների համար պատրաստել էր անակնկալ: Դեկտեմբերի 28-ը «Նագաշյան մանուկների տուն» երեխաների աջակցության կենտրոնի փոքրիկների և «Իզմիրլյան» բժշկական կենտրոնի աշխատակիցների երեխաների, թոռնիկների, հարազատների ու բարեկամների համար, Ամանորին ընդառաջ, բժշկական կենտրոնում երեխաների համար օրը տոնի էր վերածվել: Երեխաների համար այն առանձնացավ երգ ու պարով, բարձր տրամադրությամբ ու Ամանորի նվերներով, և չէին կարող ներկա չլինել Ձմեռ պապն ու Ձյունանուշը, ովքեր իրենց ներկայությամբ մանուկներին պարգևեցին անմոռանալի պահեր:

Տոնական միջոցառմանը ներկա երեխաների հիշողութան մեջ երկար տարիներ կուղեկցվեն օրվա տոնական տրամադրությունն ու վառ տպավորությունները: Միջոցառման ընթացքում «Իզմիրլյան» ԲԿ հոգևոր տեսուչ Արժանապատիվ   Տեր Թադեոս քահանա Թադևոսյանը երեխաներին և նրանց ծնողներին փոխանցեց Ն.Ս.Օ.Տ.Տ Գարեգին Բ Ամենայն Հայոց Կաթողիկոսի օրհնությունը և հայրապետական բարեմաղթանքը: Տեր Թադեոս քահանայի հետ միասին տոնի մասնակիցները հնչեցրեցին Տերունական աղոթք և քահանայից լսեցին մանուկ Հիսուսի ծննդյան պատմությունը:

Մանուկներին նվիրված Ամանորի միջոցառումը «Իզմիրլյան» բժշկական կենտրոնում Մանուկներին նվիրված Ամանորի միջոցառումը «Իզմիրլյան» բժշկական կենտրոնում

Միջոցառման ավարտին զրուցեցինք «Իզմիրլյան» բժշկական կենտրոնի տնօրեն Արմեն Չարչյանի հետ:

–  Պարոն Չարչյան «Իզմիրլյան» բժշկական կենտրոնում ավանդույթ է դարձել Ամանորին ընդառաջ փոքրիկներին նվիրել տոնական օր:

–   Երեխաները մեր ապագան են, նրանց համար ենք ապրում: Բնության օրենքն է` ստեղծիր քո նմանին՝ քեզնից ավելիին: Եկող սերունդը պետք է գերազանցի նախորդին: Մենք՝ մեծերս, երեխաների համար պետք է ստեղծենք մեզ գերազանցելու բոլոր պայմանները, որը մեր առաքելությունն է կյանքի և Աստծո առաջ: Յուրաքանչյուր տարի «Իզմիրլյան» բժշկական կենտրոնը կազմակերպում է Տարեմուտի տոնական միջոցառում աշխատակազմի երեխաների, թոռնիկների, բարեկամների, հարազատների համար: Երեխաները Ամանորի հրաշքներին, Ձմեռ պապիկին հրաշագործ ու նրանից նվերներ ակնկալողներն են: Այս տարի մեր միջոցառմանը հրավիրված էին նաև Մայր Աթոռ Սրբ. Էջմիածնի հովանո ներքո գործող «Նագաշյան մանուկների տուն» երեխաների աջակցության կենտրոնի սաները:

– Ամանորին նվիրված Ձեր բարեմաղթանքը:

–  Յուրաքանչյուր երեխայի կյանքի ճանապարհը նախանշված է Տիրոջ կողմից: Աստված թող բարեհաճ լինի բոլոր մանուկների համար՝ անկախ նրանց կրոնական, ազգային և սեռական պատկանելիությունից: Աստծո բարի կամքը թող ուղեկցի բոլոր երեխաներին:

Այս տոնական օրը զրուցեցինք նաև «Նագաշյան մանուկների տուն» երեխաների աջակցության կենտրոնի տնօրեն Միհրան Միրիջանյանի հետ:

–  Նման միջոցառումները որքանո՞վ են կարևոր մանուկների համար:

–  Մեր երեխաները ճակատագրի բերումով կյանքի դժվարին իրավիճակներում են հայտնվել, իսկ նրանց համար նմանատիպ ցանկացած միջոցառում պարզապես վերածվում է տոնի: «Իզմիրլյան» բժշկական կենտրոնի տնօրինությունը մեր ամենալավ բարեկամներն են՝ ի դեմս պարոն Չարչյանի: Պարոն Չարչյանն այն մարդկանցից է, ում համար երեխաները միշտ ուշադրության կենտորնում են, ով «Նագաշյան մանուկների տուն» երեխաների աջակցության կենտրոնի լավագույն հյուրերից է: «Իզմիրլյան» բժշկական կենտրոնի և «Նագաշյան մանուկների տուն» երեխաների աջակցության կենտրոնի միջև ձևավորվել է ամուր բարեկամություն: Կենտրոնի տնօրինությունը բազմիցս տոնական օրեր է կազմակերպել մեր երեխաների համար:

–  Ամանորի և Սուրբ ծնունդի Ձեր բարեմաղթանքը:

–  Բոլորին ցանկանում եմ երջանկություն, սեր, հաջողություն և միմյանց նկատմամբ ներողամտություն:

Հարցեր, պատասխաններ, մեկնաբանություններ