«Դաշտանային ֆունկցիայի խանգարումները վերարտադրողական տարիքի կանանց մոտ» թեմայով գիտա-գործնական գիտաժողով

Մոր և մանկան առողջության պահպանման գիտահետազոտական կենտրոնի նախաձեռնությամբ Երևանում կազմակերպվեց «Դաշտանային ֆունկցիայի խանգարումները վերարտադրողական տարիքի կանանց մոտ» թեմայով գիտա-գործնական գիտաժողով, որին մասնակցեցին գինեկոլոգներ և մանկաբարձներ Հայաստանի տարբեր շրջաններից:

Գիտաժողովի թեմայի վերաբերյալ Մեդ-Պրակտիկը զրուցեց Մոր և մանկան առողջության պահպանման գիտահետազոտական կենտրոնի փոխտնօրեն բ.գ.դ., պրոֆ. Կարինե Առուստամյանի հետ.

«Գիտաժողովը բոլոր գինեկոլոգների առօրյա աշխատանքում  հանդիպող շատ կարևոր հարցի` դաշտանային ցիկլի խանգարումներ վերաբերյալ էր, որը կարող է լինել դեռահասային տարիքից մինչև դաշտանադադարը  և արտահայտվել տարբեր ձևերով՝ արնահոսություն, դաշտանի ուշացումներ կամ բացակայություն: Այս հարցով է պայմանավորված նաև մի շատ կարևոր ֆունկցիա կնոջ կյանքում՝ մանկածնությունը: Նշված խնդիրներին առնչվող քննարկված թեմաները մի քանիսն էին:

Կնոջ կյանքում կարևոր դեր ունեցող և մեծ անհանգստություններ պատճառող երկու առացքային թեմաներն էին՝ արգանդային արնահոսությունները և դաշտանի բացակայությունները: Ինչպիսի՞ տարբերակված մոտեցումներ ունենալ, ինչպիսի՞ հետազոտություններ ու բուժում իրականացնել. փորձել ենք այս հարցերի շրջանակում օգտակար լինել բժիշկներին:

Գիտաժողովն ուներ կարևոր գործնական նշանակություն, քանի որ կլինիկական պրակտիկ գիտելիքներ է փոխանցել մասնագետներին»:

 
Գիտաժողովին զեկույցներով հանդես եկան Ռուսաստանի Դաշնությունից հրավիրված մասնագետներ, ովքեր Մեդ-Պրակտիկի հետ զրույցում խոսեցին ոլորտի գլխավոր զարգացումների մասին»:

Իրինա Շեստոկովա, բ.գ.թ., դոցենտ, Ռուսաստանի Դաշնության Ժողովուրդների բարեկամության համալսարանի բուժաշխատողների որակավորման բարձրացման ֆակուլտետի մանկաբարձության, գինեկոլոգիայի և վերարտադրողական բժշկության ամբիոն

«Ներկայացրել եմ երկու դասախոսություն՝ բավականին հայտնի խնդիրների վերաբերյալ: Առաջին թեման վերաբերում էր արգանդային անոմալ արնահոսություններին: Այս տերմինը  բավականին նոր հասկացություն է, որը կիրառության մեջ է դրվել ընդամենը վերջերս: Նախկինում կիրառվել է դիսֆունցիոնալ արգանդային արնահոսություններ անվանումը: Բժիշկները վաղուց են նկատել այն դժվարությունները, որոնք առաջանում են տվյալ իրավիճակն ախտորոշելիս: Իմ խնդիրն էր օգնել բժիշկներին ճիշտ պատկերացնել պատճառները, երբ հանդիպում են արգանդի արնահոսության դեպքերի: Քննարկել ենք նաև «Տրանեքսամ» դեղը, որը բավականին հաջողությամբ կիրառվում է որպես արյունականգ միջոց արգանդային  արնահոսությունների ժամանակ:

Երկրորդ դասախոսությունը  վերաբերում էր դաշտանային ցիկլի բացակայությանը: Այս դեպքում գործ ունենք հիվանդության առաջնային և երկրորդային ձևերի հետ՝ երբ ի սկզբանե չի եղել ցիկլը, կամ` երբ ընդհատվել է որևէ պատճառով: Այս դեպքում ևս գործ ունենք դժվարությունների հետ հատկապես ախտորոշման և անվտանգ բուժման գործընթացում: Դասախոսության ընթացքում կանգ եմ առնել  հատկապես այդ խնդիրների վրա»:

Օլեգ Սոլովյով, բ.գ.թ., Ռուսաստանի Դաշնության Նովոսիբիրսկի բժշկական համալսարանի դոցենտ

«Իմ դասախոսության թեման էր՝ «Թրոմբոէլաստոմետրիայի դերը վերարտադրողական տարիքի կանանց մոտ արյունահոսությունների տարբերակված ախտորոշման հարցում»: Սա շատ կարևոր մեթոդ է արնահոսության տարբեր դեպքերի տարբերակիչ  ախտորոշման ժամանակ: Բավականին հին տեխնոլոգիա է, որը համակարգչային դարում որոշակի բարեփոխումների է ենթարկվել և ներկայում կիրառվում է շատ արդյունավետ: Ինքս երկար տարիներ աշխատել եմ այս ոլորտում և հույս ունեմ  որ ներկայացված տվյալները գործնականում օգտակար կլինեն գիտաժողովին մասնակցած  գինեկոլոգներին»:

Հարցեր, պատասխաններ, մեկնաբանություններ