Երևանում կայացավ գիտա-գործնական կոնֆերանս՝ «Ակնաբուժության ակտուալ խնդիրները» թեմայով

ԵՊԲՀ-ում կայացավ գիտա-գործնական կոնֆերանս՝ «Ակնաբուժության  ակտուալ խնդիրները» թեմայով: Այդ մասին «Մեդ-Պրակտիկի» հետ զրույցում ասաց «Նաիրի» ակնաբուժական կենտրոնի ղեկավար Նազելի Բաղդասարյանը՝ հավելելով, որ կոնֆերանսը մեկ հարկի տակ էր հավաքել ռուս և հայ անվանի մասնագետներին:

Ն. Բաղդասարյանի փոխանցմամբ` կոնֆերանսի նպատակն էր խթանել ակնաբուժությանը վերաբերող տարբեր բնագավառներում տեղեկատվության և փորձի ակտիվ փոխանակումը: «Այսպիսի կոնֆերանսները շարունակական բնույթ են կրելու»,- ասաց նա:

Նազելի Բաղդասարյանի փոխանցմամբ` հայ մասնագետները ակտիվ մասնակցություն են ունեցել կոնֆերանսին, ինչն ուրախալի փաստ է:  «Կոնֆերանսի առաջին հատվածում ներկայացվել են նյութեր՝ «անհասների ռետինոպաթիա» հիվանդության վերաբերյալ, ինչը լուրջ խնդիր է, և ժամանակին չհայտնաբերված ու չբուժված հիվանդությունը կարող է բերել կայուն կուրության»,- ընդգծեց Ն. Բաղդասարյանը:

Իր իսկ խոսքով՝ չի անտեսվել նաև դիաբետիկ ռետինոպաթիա հիվանդությունը: «Դիաբետը 21-րդ դարի ամենատարածված հիվանդություններից է: Աչքի ախտահարումներն այս հիվանդության ժամանակ անցնում են աննկատ ու բերում ծանր հետևանքների: Մեր խնդիրն է՝ ժամանակին հայտնաբերել ու բուժել»,- ասաց զրուցակիցը: Ներկայացվել է նաև նոր մեթոդ՝ ֆլոումետրիա, աչքի անհատական անվտանգ ճնշման որոշման համար, որը հնարավոր է դարձնում գլաուկոմայի վաղ ախտորոշումն ու արդյունավետ բուժումը:

Ըստ նրա՝ կոնֆերանսին ներկայացված բոլոր գիտական նյութերը ներառում էին գործնական դրույթներ, որոնք կարող են անմիջականորեն կիրառվել պրակտիկ աշխատանքում:

Ն. Բաղդասարյանը նշեց, որ կոնֆերանսն իրականացվում էր Մ. Հերացու անվան Երևանի պետական բժշկական համալսարանի, «Ակնաբույժների հայկական ասոցիացիայի», Ս.Վ. Մալայանի անվան ակնաբուժական կենտրոնի, «Նաիրի» ակնաբուժական
կենտրոնի և Մոսկվայի աչքի հիվանդությունների գիտահետազոտական ինստիտուտի կողմից: 

Գիտա-գործնական կոնֆերանսի կայացմանն աջակցել է «Ալկոն» ընկերությունը:

Հարցեր, պատասխաններ, մեկնաբանություններ