Երևանում կայացավ մաշկավեներաբանների միջազգային առաջին գիտագործնական երկօրյա կոնֆերանսը

Երևանում «Իզմիրլյան» բժշկական կենտրոնում անցկացվեց մաշկավեներաբանների միջազգային առաջին գիտագործնական երկօրյա կոնֆերանսը: Այդ մասին «Մեդ Պրակտիկի» հետ զրույցում ասաց ՀՀ ԱՆ Մաշկաբանության և սեռավարակաբանության բժշկական կենտրոնի տնօրեն Միքայել Սահակյանը՝ հավելելով, որ «Երևանյան մաշկավեներաբանական ընթերցումներ» խորագիրը կրող կոնֆերանսը նվիրված է Հայաստանի Հանրապետությունում մաշկավեներաբանական ծառայության հիմնադրման 90-ամյակին: 

«Կոնֆերանսի աշխատանքներին մասնակցում էին բազմաթիվ անվանի գիտնականներ, փորձառու մաշկաբաններ, առողջապահության կազմակերպիչներ, կլինիկական օրդիանոտորներ՝ Ռուսաստանից, Վրաստանից, Ուկրաինայից, Բելառուսից, Իսրայելից, ինչպես նաև Հայաստանից»,- ասաց Մ. Սահակյանը:

Զրուցակցի խոսքերով՝ դասախոսություններով և զեկուցումներով հանդես եկան աշխարհահռչակ գիտնականներ. պրոֆեսոր Է. Դանիելյանը ներկայացրեց Հայաստանում մաշկավեներաբանական ծառայության անցած ուղին, Ռուսաստանի սեռավարակաբանների գիլդիայի (IUSTI RU) նախագահ պրոֆեսոր Մ. Գոմբերգը խոսեց որոշ սեռավարակների վարման ժամանակակից  մոտեցումների մասին, «Մաշկային և վեներական հիվանդությունների ռուսական պարբերական» և «Կլինիկական մաշկաբանության և վեներաբանության» ամսագրերի խմբագիր պրոֆեսոր Ն. Կոչերգինը ներկայացրեց 21-րդ դարի ամենատարածված մաշկային հիվանդություններից մեկի՝ ատոպիկ մաշկաբորբի ռացիոնալ բուժման մեթոդները:

Ելույթներ ունեցան Վրաստանի գլխավոր մաշկավեներաբան, պրոֆեսոր Գ. Գալդավանը, պրոֆեսոր Տ. Սոկոլովան՝ Ռուսաստանից, պրոֆեսոր Տ. Ավյատենկոն՝ Ուկրաինայից, Ի. Ցիրուլնիկովը՝ Իսրայելից, Լ. Կորնևան՝ Բելառուսից և այլոք:

«Լուսաբանվեցին մաշկաբանության, սեռավարակաբանության, բժշկական կոսմետոլոգիայի, հարակից այլ մասնագիտությունների արդիական հիմնախնդիրները, բժշկագիտության այս ճյուղի ժամանակակից նվաճումները և ձեռքբերումները»,- ընդգծեց գիտաժողովի նախագահը:

Մասնակիցներին ողջունեց ՀՀ Առողջապահության նախարար, պրոֆեսոր Արմեն Մուրադյանը:

Մաշկավեներաբանների միջազգային առաջին գիտագործնական երկօրյա կոնֆերանսի կազմակերպիչներն էին ՀՀ Առողջապահության նախարարությունը, ՀՀ ԱՆ Մաշկաբանության և սեռավարակաբանության բժշկագիտական կենտրոնը, Մաշկաբանների հայկական ասոցիացիան, Հայաստանի ուրոլոգների ասոցիացիան և «Տղամարդու առողջություն» հայ-ռուս-ամերիկյան հասարակական կազմակերպությունը:

Հարցեր, պատասխաններ, մեկնաբանություններ