Յուրաքանչյուր պացիենտ իրավունք ունի ապրելու առանց ցավի. դասախոսություն «Ժամանակակից հակացավային թերապիա» թեմայով

Մարտի 12-ից 13-ը «Մոսկվայի» տանը կայացավ «Պֆայզեր» դեղագործական ընկերության կողմից նախաձեռնած հերթական դասախոսությունը, որը նշանավորվեց երկու հետաքրքիր զեկույցների ընթերցմամբ` հայ և ռուս ճանաչված նյարդաբանի և վիրաբույժի կողմից:

Բժշկական գիտությունների դոկտոր, պրոֆեսոր Հովհաննես Մանվելյանն անդրադարձել է նեյրոպաթիկ ցավին, իսկ պրոֆեսոր Մաքսիմ Եվսեևը՝ ոչ ստերոիդային հակաբորբոքային դեղամիջոցներին:

«Պֆայզեր» դեղագործական ընկերության հայաստանյան ներկայացուցչության տնօրեն Դավիթ Պալյանը փաստում է դասախոսության կարևորությունը լեփ-լեցուն դահլիճով և բուռն քննարկումներով:

Դ. Պալյանի խոսքերով`դասախոսությունը նախատեսել էին միայն թերապևտների համար, սակայն ներկա էին նաև նեղ մասնագետներ՝ նյարդաբաններ, էնդոկրինոլոգներ, ուռուցքաբաններ երևանյան պոլիկլինիկաներից և հարակից մարզերից:  

Պարոն Պալյանը խոսեց կայացած դասախոսության առանձնահատկությունների մասին. 

«Բոլորիս քաջ հայտնի պրոֆեսոր Հովհաննես Մանվելյանը ևս մեկ անգամ անդրադարձավ լայնորեն տարածված, սակայն դեռ ոչ պատշաճ ախտորոշվող և բուժվող ցավի տեսակին՝ նեյրոպաթիկ ցավին: Մանրամասնելով ցավի առաջացման մեխանիզմը և հիվանդի վարման նրբությունները, ևս մեկ անգամ փայլուն պատկերացում ստեղծեց խնդրի հրատապության և բժիշկի պրոֆեսիոնալ մոտեցման մասին:

Մոսկվայից ժամանած մեր հյուրը՝  պրոֆեսոր Մաքսիմ Եվսեևը,  Մոսկվայի թիվ 52 քաղաքային հիվանդանոցի վիրաբուժական ծառայության ղեկավարն է: Նա անդրադարձավ ոչ ստերոիդային հակաբորբոքային դեղամիջոցներին: Ամբողջ աշխարհում այս դեղախումբն ամենաշատ նշանակվողն է: Ի դեպ, ոչ ստերոիդային հակաբորբոքային դեղամիջոցների օգտագործումը հաճախ հենց վիրաբույժներին է կանգնեցնում բարդությունների առջև: Ուստի՝ լսել վիրաբույժի խոսքը մասնագետների համար, նախ, անսպասելի էր, բայց և՝ հետաքրքիր:

Պֆայզեր ընկերությունը Հայաստանում գրանցել է հակացավային դեղորայքի փաթեթ, որում ընդգրկված է գրագետ մենեջմենթ պահանջող ամենատարատեսակ ցավերի անհրաժեշտ դեղամիջոցներ: Ապրել առանց ցավի յուրաքանչյուր պացիենտի իրավունքն է, և ով, եթե ոչ մենք՝ բժիշկներս, պետք է ապահովենք ու օգնենք պացիենտին՝ ազատվելու ցավից: Ինչպես տեսնում եք, այսօր մեր ոգևորությունը կիսում են առաջին օղակի բժիշկները, և սա դեռ սկիզբն է մեր միջոցառումների շարքի, որտեղ շարունակական կլուսաբանենք ցավն ամոքող ադեքվատ, անվտանգ և արդյունավետ մոտեցումները»:

«Մեդ-Պրակտիկի»  հետ զրույցում պրոֆեսոր Եվսեևը հայտնեց, որ հայ մասնագետների հետ խոսել է ոչ ստերոիդային հակաբորբոքային դեղամիջոցների նշանակման, բարդությունների մասին, հատկապես այն բարդությունների, որոնց հետ հաճախ առնչվում են վիրաբույժները:

«Առհասարակ, ոչ ստերոիդային հակաբորբոքային դեղամիջոցներ նշանակում են թերապևտները, իսկ բարդությունների հետ, օրինակ, արյունահոսությունների, գործ են ունենում վիրաբույժները: Խնդիրը բավականին լուրջ է, հաճախ հակաբորբոքային դեղամիջոցները խոցային հիվանդությունների պատճառ են դառնում, մեծ է մահացությունների թիվը և կարիք կա լուսաբանելու»,- ընդգծեց պրոֆեսորը: 

Պրոֆեսորի խոսքերով՝ հիվանդների մեծամասնությունը բավականին ուշ է դիմում մասնագետի օգնությանը, արյան մեծ կորստով...

Մասնագետը հորդորում է նշանակել այնպիսի հակաբորբոքային դեղամիջոցներ, որոնք խոցեր չեն առաջացնում  և ունեն ցավը մեղմելու, հակաբորբոքային ազդեցություն:

«Հայ բժիշկների հետ խոսեցի նաև այն մասին, որ հակաբորբոքային դեղամիջոցներն այսօր չեն օգտագործվում հետվիրահատական շրջանում. մոռացության են մատնված, քանի որ այլ դեղամիջոցներ են հայտնվել շուկայում: Եվ իզուր, նրանք դրական ազդեցություն ունեն, և շատ քիչ դեպքեր կան, երբ այդ դեղամիջոցը հակացուցված է. անկառավարելի հիպերտոնիա, երիկամային անբավարարություն»,- եզրափակեց զրուցակիցը:

Հարցեր, պատասխաններ, մեկնաբանություններ