2014-ը նշանակալից է Հանրապետական գիտաբժշկական գրադարանի գործունեության ամբողջ ընթացքում

Հայ օգնության ֆոնդի (ՀՕՖ) ֆինանսական աջակցությամբ վերանորոգված ՀՀ ԱՆ Հանրապետական գիտաբժշկական գրադարանը դեկտեմբերի 12-ին պաշտոնապես իր դռները բացեց բժիշկների և ուսանողների համար: Բացումն արժևորվեց գրադարանի ընթերցասրահի անվանակոչմամբ՝ ՀՕՖ-ի հիմնադիր, աշխարհահռչակ նյարդավիրաբույժ, պրոֆեսոր Էդգար Հովսեփյանի անունով:

Ի պատիվ հայազգի հայտնի բժշկի՝ արդեն իր անունը կրող ընթերցասրահում անցկացվեց հուշ-երեկո, որի ընթացքում ներկաները ևս մեկ անգամ հիշեցին մեծ հումանիստին ու գնահատեցին նրա անսահման վաստակն ու դերը հազարավոր մարդկանց կյանքում և Հայաստանի առողջապահական համակարգի զարգացման գործում:

Մեր զրուցակիցն է ՀՀ ԱՆ Հանրապետական գիտաբժշկական գրադարանի տնօրեն Աննա Շիրինյանը:

–   Վերջապես Հանրապետական գիտաբժշկական գրադարանը վերանոգված է: Այն իրականություն դարձավ ՀՕՖ-ի աջակցությամբ: Շուրջ տասը տարի գրադարանի պատերի ներքո անկարող էինք որևէ միջոցառում իրականացնել:

–   Տիկին Շիրինյան, այսօր անվանակոչվեց նաև գրադարանի ընթերցասրահը: Այն, այսուհետ, կրելու է բժիշկ Էդգար Հովսեփյանի անունը. ինչպե՞ս ծնվեց մտահղացումը:

–   Պրոֆեսոր Հովսեփյանի նախաձեռնությամբ ու աջակցությամբ ՀՕՖ-ը՝ 1990-ականներից սկսած, շարունակաբար նպաստել է Հանրապետական գիտաբժշկական գրադարանի զարգացմանը՝ ապահովելով միջազգային հեղինակավոր պարբերականներին, համաշխարհային էլեկտրոնային շտեմարաններին հասանելիությունը, բժշկական սեղմագրերի հայկական հանդեսի տպագրությունը, գրադարանի վեբ-կայքի ստեղծումը: Էդգար Հովսեփյանի նախաձեռնությամբ 1990-2000 թվականներին Հայաստանում աշխատող ավելի քան 100 բժիշկ է վերապատրաստվել ԱՄՆ առաջատար կլինիկաներում: Այս քայլով ցանկացանք ինչ-որ կերպ անմահացնել նրա անունը:

–   Ինչո՞վ է այսօր հարուստ ընթերցասրահը:

–   Նորագույն գրքերով, պարբերականներով… Այն գրքերը, որ տեսաք ընթերցասրահում՝ բոլորը նոր էին հրատարակված: Ընթերցասրահում կան համակարգիչներ, և ընթերցողը կարող է օգտվել էլեկտրոնային աղբյուրներից: Այդ առումով մենք շատ հարուստ ենք. ունենք էլեկտրոնային աղբյուրներ, որտեղ ընդգրկվում են 2014թ. հրատարակված բոլոր նոր գրքերը: Այսպիսով, կարող ենք ասել, որ մեր ընթերացսրահը հագեցած է և′ ավանդական, և′ ժամանակակից գրականությամբ:

–   Այցելուների առումով…

–   Գուցե գրադարան այցելողների թիվը սակավ տպավորություն թողնի, սակայն համացանցում պաշտոնական կայքի այցելուների թիվն ավելի քան գոհացնող է: Գրադարանում պարբերաբար դասընթացներ են իրականացվում: Մեր պատերի ներքո իր զարգացումն է ապրում հեռահար բժշկությունը. այստեղ տարբեր մասնագետների կողմից դասախոսություններ են ընթանում մարզային բժիշկների համար, ինչը ևս մի նոր ժամանակակից միջոց է՝ մարզային մասնագետներին բժշկական նորություններ հնարավորինս արագ հասցնելու:

–   Ի՞նչ բարի ավանդույթներ կան գրադարանում:

–   Այն ինչ փոխանցվել է մեզ՝ փորձում ենք պահել-պահպանել: Շատ կարևոր է պահպանել կապը բժշկական հանրության հետ, գործընթացի մեջ ներգրավել երիտասարդ մասնագետներին:

–   Ձեր կայքից տեղեկացա, որ ամեն տարի մրցանակ եք շնորհում «Տարվա բարեկամ» անվանակարգում: Մանրամասնեք, խնդրե՛մ, ի՞նչ սկզբունքով եք ընտրում Տարվա բարեկամին:

–   Ամեն տարի անց ենք կացնում մրցանակաբաշխություն: Այս տարի փոքր-ինչ ուշացումով իրականացվեց: Սովորաբար, այն տեղի է ունենում հոկտեմբերի 7-ին: Ուշացումը պայմանավորված էր վերանորգման աշխատանքների հետ:

Ունենք տարբեր անվանակարգեր: «Տարվա լավագույն բարեկամ» անվանակարգը տրվում է այն անձանց, ովքեր արժանի ավանդ ու ներդրում ունեն գրադարանի զարգացման գործում: Այն կարող է տարբեր դրսևորումներ ունենալ՝ ակտիվ գործունեությամբ, նվիրատվությամբ և այլն:

Այս տարի միաձայն ընտրվեց բժիշկ Գևորգ Յաղջյանը: Նա, իրավամբ, ակտիվ գործունեություն է ծավալել և արժանի է մրցանակի: Նրա շնորհիվ տարբեր կապեր են հաստատվել, տարբեր ծրագրեր կյանքի կոչվել ու հետագա զարգացում ունեցել: Օրինակ՝ հեռաուսուցման ծրագիրը, որը մենք իրականացնում ենք, բժիշկ Յաղջյանի գաղափարն է եղել: Գեոտառ հրատարակչության հետ արդյունավետ կապերը կրկին նրա շնորհիվ ստեղծվեցին և՝ ո՛չ միայն. գործունեության ոլորտները շատ են, բոլորն այս պահին թվարկել չեմ կարող: Մի ակնառու օրինակ բերեմ. լինելով արտասահմանում՝ Գևորգն ամենուր անվերջ խոսում ու ներկայացնում է մեր գրադարանը, իսկ, սովորաբար, յուրաքանչյուրն իր խնդրի մասին է մտածում: Նրան հուզում են շատերի հոգսերն ու հոգում է հնարավորինս… Դժվար է այսօր գտնել մարդ, ով իր հարցերը թողած՝ կզբաղվի, կոնկրետ պարագայում, գրադարանի հարցերով:

–   Վերջաբանի փոխարեն…

–   Այս տարի գրադարանի 75-ամյակն էր, սակայն օրը նշանավորել չկարողացանք՝ օբյեկտիվ պատճառներով. վերանորոգման աշխատանքներ էին իրականացվում: Արդեն 75 տարի է, ինչ կա այս հաստատությունը և արդեն շատ կարևոր դերակատարում ունի բժշկական հանրության շրջանում. բժշկական շարունակական կրթության (ինչպես այսօր ընդունված է ասել), բժշկագիտության ասպարեզներում: Ցանկությունս է գրադարանը միշտ տեսնել մասնագետների կողմից կարևորված, որպես քննարկումների և հանդիպումների ավանդական հավաքատեղի, առավել նպաստավոր բարվոք՝ միջոցառումների իրականացման համար:

Հարցեր, պատասխաններ, մեկնաբանություններ