Բժիշկները տոնում են Երևանի թիվ 1 համալսարանական կլինիկայի 100-ամյակը

Երևանի թիվ 1 համալսարանական կլինիկան 100 տարեկան է: Այս առիթով Մխիթար Հերացու անվան պետական բժշկական համալսարանի նիստերի դահլիճում կայացավ հանդիսավոր նիստ և   մեկնարկեց  «Կլինիկական բժշկագիտության արդի հիմնախնդիրները» խորագրով գիտաժողովը:

Միջոցառմանը ներկա էին համալսարանի տարբեր տարիների շրջանավարտներ, ովքեր այսօր արդեն անվանի բժիշկներ, պրոֆեսորներ, բժշկական գիտությունների դոկտորներ, կլինիկաների ղեկավարներ ու պրակտիկ բժիշկներ են: Հանդիսավոր նիստին ցուցադրվեցին կլինիկայի արխիվային լուսանկարներ` սկսած շենքի շինարարությունից մինչեւ ժամանակակից մասնագիտական գիտաժողովները:

Ներկաներին տանտիրոջ իրավունքով ողջունեց ԵՊԲՀ ռեկտոր Միքայել Նարիմանյանը, շնորհավորեց ամբողջ բժշկական անձնակազմին ու ներկայացրեց նաև կայանալիք գիտաժողովը.

«Մեր նպատակն է համախմբել ԵՊԲՀ փորձառու և երիտասարդ գիտնականներին, համալսարանական կլինիկաներում և կլինիկական ամբիոններում հետազոտական գործունեություն իրականացնող մասնագետներին, ներկայացնել և քննարկել բժշկագիտության վերջին տարվա ձեռքբերումները և գիտական հետազոտությունների զարգացման հեռանկարները, ինչպես նաև ամփոփել բուհում իրականացվող գիտական ծրագրերում ընդգրկված խմբերի կողմից կատարվող հետազոտությունների արդյունքները»:

Առողջապահության նախարարի տեղակալ Տիգրան Սահակյանը ողջունեց միջոցառման մասնակիցներին և ընթերցեց ՀՀ առողջապահության նախարար Արմեն Մուրադյանի ուղերձը.

«Ողջունում եմ Երևանի պետական բժշկական համալսարանի թիվ 1 համլսարանական կլինիկական հիվանդանոցի հիմնադրման 100-ամյակին նվիրված  հանդիսավոր նիստի և գիտաժողովի  մասնակիցներին: Կարևորելով  այս նախաձեռնությունը՝ ուզում եմ նախ ընդգծել Առաջին հիվանդանոցի դերը Հայաստանում բժշկագիտության ավանդույթների ձևավորման և հետագա զարգացման գործում: Առողջապահական համակարգի հիմքում գտնվող այս կառույցի մեկդարյա կենսագրությունը լի է ոլորտի ձեռքբերումներն ամփոփող էջերով»:

ԼՂՆ առողջապահության փոխնախարար Կարեն Ղուկասյանն ընթերցեց ԼՂՀ առողջապահության նախարար Արտյոմ Քուշկյանի ուղերձը. 

«Մշտական կատարելագործման քաղաքականությունը որդեգրած 1-դարյա հոբելյարի դերը շատ կարևոր է մեր երկրի առողջապահական համակարգում, որովհետև  հենց այստեղ է կրթվում ու դաստիարակվում, բուժման ժամանակակից մեթոդներին հաղորդակից դառնում ապագա բժիշկը»:

Մեզ հետ զրույցում ԵՊԲՀ ռեկտոր Միքայել Նարիմանյանը խոսեց օրվա խորհրդի ու կայանալիք գիտաժողովի մասին:

–   Պարոն Նարիմանյան, շնորհավորում ենք այս գեղեցիկ տոնի կապակցությամբ: Խոսենք այսօրվա առիթի մասին…

–   Այսօր մենք նշում  ենք Մխիթար Հերացու անվան թիվ 1 համալսարանական հիվանդանոցի 100-ամյակը: Հիվանդանոցի հիմնադրումով մեկնարկեց  Հայաստանում կլինիկական կրթությունը, որովհետև բժշկական կրթության հիմքը կլինիկական մտածելակերպն է: 1-ին հիվանդանոցը եղել և մնում է կլինիկական մտածելակերպի դարբնոցն այն պարզ իմաստով, որ այստեղ միշտ աշխատել են մեր առաջատար մասնագետները թե՛ վիրաբուժության, թե՛ մանկաբուժության, թե՛ թերապիայի և այլ բնագավառներում:

–   Իսկ ո՞րն է լինելու 2-օրյա գիտաժողովի առանցքը:

–   Մենք ցույց կտանք, թե ինչ մակարդակի վրա է գտնվում մեր կլինիկական գիտությունը, կլինիկական կրթությունը, և ինչպես են կրթությունն ու գիտությունը միասին ապրում և զարգանում մեկ հարկի տակ:

–   Ինչքանո՞վ է այս իրադարձությունը դարձել տոն  մեր հանրապետության բժիշկների համար:

–   Այո, այսօր հիանալի տոն է բոլոիս համար: Ուզում եմ շնորհավորել  բոլոր բժիշկներին, որովհետև բոլորս այս կամ այն կերպ անցել ենք 1-ին հիվանդանոցի հյուրընկալ շենքով և այնտեղ ենք ստացել կլինիկական կյանքին վերաբերող մեր առաջին ու անմոռանալի տպավորությունները: Ուզում եմ` միշտ պահպանեն իրենց կապը թե՛ 1-ին հիվանդանոցի, թե՛ համալսարանի հետ, որովհետև 1-ին կլինիկական հիվանդանոցը նաև ԵՊԲՀանբաժան մասն է:

Զրուցեցինք նաև Երևանի թիվ 1 համալսարանական հիվանդանոցի վիրաբույժ, բ.գ.դ., պրոֆեսոր Հովհաննես Սարուխանյանի հետ:

–   Պրոֆեսոր Սարուխանյան, մեծ է Ձեր ներդրումը համալսարանական թիվ 1 հիանդանոցի կայացման ու զարգացման ճանապարհին: Այս օրը պետք է որ առանձնահատուկ լինի հատկապես Ձեզ համար…

–   Ինձ համար մեծ ուրախություն, տոն է այսօր, քանի որ իմ երիտասարդությունը, իմ կյանքը նվիրել եմ 1-ին համալսարանական հիվանդանոցին: Ես աշխատել և նույնիսկ մեծացել եմ այս կլինիկայում: Մեր  բժշկական համակարգի ներկայացուցիչները սովորել ու իրենց առաջին քայլերն են կատարել 1-ին համալսարանական հիվանդանոցում: 1-ին հիվանդանոցը մեզ` բժիշկներիս համար նույնն է, ինչպես Բժշկական համալսարանը` ուսանողության համար:

–   100-ամյակի առիթով, ի՞նչ նորություն է մեզ սպասվում 1-ին համալսարանական կլինիկայում:

–   Հիվանդանոցում կառուցվելու է անվանի առաջատար բժիշկների մասին պատմող սրահ, ինչպես օրինակ՝ հոլիվուդյան փառքի ծառուղին: Զարմանալին այն է, որ ամենուր կարելի է հանդիպել արտիստներին նվիրված սրահների, բայց ոչ մի բժշկական սրահ առ այսօր չկա: Տոհմական բժշկական  համակարգ կա, որին այսօրվա ուսանողները ծանոթ չեն: 

Մ. Հերացու անվան պետական բժշկական համալսարանի աշխատակազմի ղեկավար Գագիկ Միրիջանյանը մեզ հետ զրույցում մանրամասներ ներկայացրեց Երևանի թիվ 1 համալսարանական  կլինիկայի ստեղծման պատմությունից.

«100 տարի առաջ ստեղծվեց 1-ին համալսարանական կլինիկան և  դրա հիման վրա ստեղծվեց Հայաստանի Հանրապետության բժշկական նորագույն պատմությունը: Հիվանդանոցը ստեղծվեց ոչ թե բժիշկների կողմից, այլ բարերարների նախաձեռնությամբ, ղեկավարեցին արտասահմանից ժամանած բարձրագույն որակավորմամբ բժիշկները: 1-ին հիվանդանոցում ստեղծվեց նաև բժշկական դպրոց: Այսինքն` 100 տարի առաջ բուժծառայությունն ու կրթությունը  սկսեցին գործել մեկ հարկի տակ»:

Հարցեր, պատասխաններ, մեկնաբանություններ