Երևանում կայացավ Հայաստանի սրտի ռիթմի ասոցիացիայի առաջին գիտաժողովը

Հոկտեմբերի 31-ին Երևանի պետական բժշկական համալսարանում իր աշխատանքն սկսեց Հայաստանի սրտի ռիթմի ասոցիացիայի առաջին գիտաժողովը: Երկօրյա հանդիպումը համախմբել էր ոլորտի առաջատար մասնագետներին` ԱՄՆ-ից, Ղազախստանից, Հունգարիայից, Մակեդոնիայից, ինչպես նաև Հայաստանից: 

Մեր զրուցակիցն է «Էրեբունի» բժշկական կենտրոնի առիթմոլոգիական սրտաբանական կենտրոնի ղեկավար, սրտաբան-առիթմոլոգ  Լուսինե Մխիթարյանը.

–   Առիթմոլոգիան նոր զարգացող գիտություն է սրտաբանության մեջ: Ուստի`շատ կարևոր է հասկանալ` որտե՞ղ ենք հասել և ո՞ւր պետք է գնալ: Գիտաժողովի գլխավոր նպատակը` զարգացնել առիթմոլոգիան Հայաստանում:

–   Եվ որտե՞ղ ենք հասել:

–   Այսպես ասեմ, առայժմ ճանապարհի սկզբում ենք: Անելիքները շատ են: Օրինակ` մենք դեռ չունենք ուսուցողական կենտրոն, չկան բժշկական ուղեցույցներ:

–   Ի՞նչ սկզբունքով եք ընտրել գիտաժողովի հյուրերին:

–   Մենք փորձել ենք կապ հաստատել ու հրավիրել խոշոր կլինիկաների ղեկավարներին, ոլորտի լավագույն մասնագետներին՝ զրուցելու կարևոր առիթմոլոգիական խնդիրների մասին, որոնք այսօր առկա են Հայաստանում:

–   Որո՞նք են այդ խնդիրները:

–   Մենք պետք է քննարկենք այն բոլոր ձեռքբերումներն, որոնք կան գիտության մեջ աշխարհում: Հայաստանում կա մեծ պոտենցիալ, որը, ցավոք, դեռ չենք օգտագործում:

–   Ինչ՞ շեշտադրում ունի գիտաժողովը:

–   Գլխավորը նախասրտերի շողացման, սրտի ռիթմը վարող սարքերի, իմպլանտացիայի ցուցումների, սրտի էլեկտրաֆիզիոլոգիական հետազոտությունների, աբլյացիայի հետ կապված հարցերն են: Ինչո՞ւ չէ, նաև կիզակետում կլինեն կարդիոմիոպաթիաները, հանկարծամահությունը և այլն: Մի խոսքով`այն ամենն, ինչ առիթմոլոգիայում շատ կարևոր դեր ունի:

–   Հատուկ հյուրերի ցանկում ո՞վքեր են:

–   Ունենք հյուրեր ԱՄՆ-ից, Ղազախստանից, Հունգարիայից, Մակեդոնիայից և այլն: Գիտաժողովին մասնակցում են նաև հայ մասնագետներ: 
          
Զրուցեցինք նաև ԱՄՆ Վաշինգտոնի Սփոքեյն քաղաքի սրտի բնածին արատների կանխարգելման կենտրոնից Երևան ժամանած սրտաբան-էլեկտրոֆիզիոլոգ Հրայր Կարապետյանի հետ.

–   Իմ զեկույցը հղի կանանց մասին է, ովքեր ունեն սրտի արատներ: Քննարկվող խնդիրն է, թե ինչ հետազոտություններ պետք է անցնի կինը` հեշտությամբ ազատվելու համար:

–   Ինչպե՞ս խուսափել բարդություններից:

–   Հղին հստակ պետք է իմանա՝ ինչ հիվանդություն ունի, և բարդություններից խուսափելու համար պետք է համապատասխան հետազոտություններ անցնել:

–   Մի քանի օր է, ինչ Հայաստանում եք գտնվում: Ինչպես կգնահատեք համատեղ աշխատանքը:

–   Կարող եմ ասել, որ բավականին արդյունավետ աշխատանք տարվեց «Էրեբունի» բժշկական կենտրոնի մասնագետների հետ: Ունեցանք մի քանի բարդ վիրահատություններ, արդյունքում հիվանդների մոտ լուծվեցին սրտի ռիթմի խանգարումները:

«Էրեբունի» բժշկական կենտրոնի առիթմոլոգիական սրտաբանական կենտրոնի որակի կառավարիչ, ուսուցողական ծրագրերի ղեկավար, Հայաստանի սրտի ռիթմի ասոցիացիայի կազմակերպիչ Վահագն Թադևոսյան.

–   Ի՞նչ սպասումներ ունեք գիտաժողովից:

–   Համախմբել Հայաստանի առիթմոլոգներին, մասնագետներին, ովքեր հետաքրքրված են սրտի ռիթմի խանգարումներով, միասին փորձել զարգացնել առիթմոլոգիան Հայաստանում ու առաջ գնալ` միջազգային չափորոշիչներին համընթաց: Ասոցիացիան նպատակ ունի մշակել բժշկական ուսուցողական ծրագրեր ո՛չ միայն մասնագետների, այլ նաև հիվանդների համար. ի՞նչ է սրտի ռիթմի խանգարումը, ինչպե՞ս պետք վարվել առիթմիաների ժամանակ:

Շատ կարճ ժամանակ է, ինչ ստեղծվել է ասոցիացիան՝ մոտ 6 ամիս, սակայն արդեն ունենք պաշտոնական վեբ կայք, որը գործիք է՝ հանրության հետ կապը պաշտպանելու: Խոսքը www.ahra.am վեբ կայքի մասին է:

–   Գիտաժողով կազմակերպելը, հավանաբար, բարդ գործընթաց է…

- Բնականաբար, բայց ունենք հովանավորներ, ովքեր մեզ օգնել են` «Էրեբունի» բժշկական կենտրոնը և մի շարք դեղագործական ընկերություններ:  

Հարցեր, պատասխաններ, մեկնաբանություններ