ՀՕՖ Հայաստան‬-ի բարեկամ բժիշկները կրկին հավաքվել էին՝ ինչպես միշտ, ի նպաստ Հայաստանում առողջապահության համակարգի բերալավման:

Սեպտեմբերի 26-ին Արամ Խաչատրյանի տուն-թանգարանում Հայ օգնության ֆոնդի եւ Հայ օգնության ֆոնդի բժշկական շրջանավարտների միության տարիների սերտ համագործակցությունը նշանավորող ընդունելություն էր:

‪ՀՕՖ‬-ն ու ‪ՀՕՖԲՇՄ‬-ն (FARFAA-SALZBURG) բազմաթիվ ծրագրեր են իրականացնում առողջապահության, մասնավորապես շարունակական մասնագիտական զարգացման բնագավառում: 2005 թվականից գործող «Մարզային բժիշկների վերապատրաստում» ծրագրով, օրինակ, Երեւանում մեկամսյա անվարձահատույց վերապատրաստման հնարավորություն են ստացել ավելի քան 500 բժշիկներ Հայաստանի մարզերից ու Լեռնային Ղարաբաղից:

Լեռնային Ղարաբաղն ընդգրկվել է ծրագրում 2011 թվականից՝ Ամերիկահայ բժիշկների միության ֆինանսական աջակցությամբ:

Համագործակցության շնորհիվ հնարավոր է եղել նաեւ բժշկական սարքավորումներով հագեցնել մարզային հիվամնդանոցներն ու ստեղծել մարզային բժիշկների արդյունավետ գործող ցանց:

Ընդունելությանը ներկա էր Ավստրո-ամերիկյան հիմնադրամի «Զալցբուրգի միջազգային բժշկական սեմինարներ» ծրագրի ղեկավար, պրոֆեսոր Վոլֆգանգ Աուլիտցկին, ով մեծապես կարեւորեց նման հանդիպումները որպես հետագա համագործակցության խթան ու առկա խնդիրները քննարկելու հարթակ:

Ավստրո-ամերիկյան հիմնադրամը 2003 թվականից Բաց հասարակության հիմնադրամի հետ իրականացնում է «Զալցբուրգի միջազգային բժշկական սեմինարներ» ծրագիրը, որն արեւելյան եւ կենտրոնական Եվրոպայի, Կենտրոնական Ասիայի եւ նախկին Խորհրդային միության երկրների բժիշկների մասնագիտական վերապատրաստման ամենածավալուն ուսուցողական ծրագիրն է:

Հայաստանը Զալցբուրգի բժշկական սեմինարներին մասնակցելու 17 տարվա փորձ ունի: 1996 թվականից 800 բժիշկներ տեսական, գործնական գիտելիքներ եւ մասնագիտական հմտություններ են ձեռք բերել Ավստրիայի առաջատար հիվանդանոցներում:

Սեպտեմբերի 27-ին Հայաստանի առողջապահական համակարգին ցուցաբերած շարունակական աջակցության և Հայաստանի բժիշկների մասնագիտական զարգացման գործում ունեցած նշանակալի ավանդի համար Վոլֆգանգ Աուլիցկին պարգևատրվեց ՀՀ առողջապահության նախարարության հուշամեդալով:

Հարցեր, պատասխաններ, մեկնաբանություններ