Կայացավ «Գրինդեքս» դեղագործական ընկերության սատելիտային սիմպոզիումը Հայաստանի սրտաբանների IX վեհաժողովի շրջանակում

Մայիսի 15-ին Հայաստանի սրտաբանների IX վեհաժողովի շրջանակում ՀՀ ԱՆ Առողջապահության Ազգային Ինստիտուտի դահլիճում տեղի ունեցավ «Գրինդեքս» դեղագործական ընկերության սատելիտային սիմպոզիումը: Սիմպոզիումի ընթացքում զեկույցներով ելույթ ունեցան ՌԴ ԳԱԱ ակադեմիկոս, ՌԴ ԳԱԱ կանխարգելիչ բժշկության ԴՊՀ ՊԳՀԿ գլխավոր մասնագետ Ռաֆայել Օգանովը, ՌԴ գիտությունների վաստակավոր գործիչ, պրոֆ. Ա.Ի. Եվդակիմովի անվ. ՄՊԲԱՀ թերապիայի, կլինիկական ֆարմակոլոգիայի և շտապ բժշկական օգնության ամբիոնի վարիչ Արկադի Վերտկինը, Ա.Լ. Մյասնիկովի անվ. Կլինիկական Սրտաբանության ԳՀԻ «Զարկերակային գերճնշման» բաժանմունքի առաջատար գիտաշխատող Միչկա Վիկտորիա Բորիսովնան: 

Ներկայացվող զեկույցների մասին զրուցեցինք ՌԴ Սրտաբանների ասոցիացիայի պատվավոր նախագահ Ռաֆայել Օգանովի հետ:

–   Պարոն Օգանով, ո՞րն էր Ձեր զեկույցի թեման և որքանո՞վ է այն արդիական ու կարևոր:

–   Հիմնական շեշտադրումը կանխարգելիչ սրտաբանության հիմունքներն են: Աշխարհում ընդհանուր մահացությունների մեջ առյուծի բաժինն ընկնում է սրտանոթային հիվանդությունների պատճառով մահվան ելքերին: Այս թեման մշտապես արդիական է, այն չի կարող կորցնել իր կարևորությունը: Հուսով եմ, որ այս  փոքրիկ ժամանակահատվածում կարողացանք փորձի փոխանակում ապահովել, ինչը շատ կարևոր է:

–   Որո՞նք են վերջին տարիներին սրտաբանության ոլորտի ամենաակնառու ձեռքբերումները:

–   Օ˜, դրանք շատ են. նորագույն տեխնիկան, նոր սերնդի սարքավորումները, մարդկային ռեսուրսը և ամեն ինչ ուղղված է սրտաբանության ոլորտում ևս մեկ քայլ առաջ  գնալու նպատակին: Ձեռքբերում է, որ կարողանում ենք թեկուզ չնչին տոկոսով նվազեցնել մահացությունների թիվը:

Կայացավ «Գրինդեքս» դեղագործական ընկերության սատելիտային սիմպոզիումը Հայաստանի սրտաբանների IX վեհաժողովի շրջանակում

–   Խնդիրներ այնուամենայնիվ մնում են, որո՞նք են դրանք:

–   Խնդիրները շատ են: Առաջին խնդիրը ռիսկի գործոններն են` ծխելը, խմելը, ոչ ճիշտ սնվելը, պասիվ ապրելակերպը, քաշի ավելցուկը և այլն: Ամբողջ աշխարհում պայքարում են այս երևույթների դեմ, բայց դրանք շարունակում են մնալ կարևոր խնդիրների շարքում: Առհասարակ առողջության պահպանումը հիմնված է երեք կետերի վրա: Առաջին և ամենամեծ հենակետն`առողջ ապրելակերպն է, երկրորդը` կանխարգելումը, հետո միայն` բժշկությունը: Յուրաքանչյուր հիվանդություն կարող է կանխարգելվել և չհասնել նրան, երբ  արդեն բուժումն անխուսափելի է:

Մեր հաջորդ զրուցակիցը  ՌԴ գիտությունների վաստակավոր գործիչ, պրոֆ. Ա.Ի. Եվդակիմովի անվ. ՄՊԲԱՀ թերապիայի, կլինիկական ֆարմակոլոգիայի և շտապ բժշկական օգնության ամբիոնի վարիչ Արկադի Վերտկինն է:

–   Ի՞նչ խնդիրներ շոշափվեցին Ձեր զեկույցում:

–   Հիմնախնդիրը մեր հիվանդների ոչ լավ, ոչ դյուրին կյանքն է: Եթե արտասահմանում կա զարկերակային բարձր ճնշում, և դրանով սահմանափակվում է ամեն ինչ, ապա մեր (ՌԴ) և ձեր (ՀՀ) հիվանդների դեպքում մենք ունենք դիաբետ և մի շարք այլ հիվանդություններ` միասին վերցված: Մեր հիվանդները խմում են, ծխում են ու գեր են, նրանք դիմում են բժշկին արդեն 5-6 հիվանդության առկայության դեպքում միայն: Այս դեպքում շատ դժվար է գտնել համապատասխան դեղամիջոց: Հիմնական թեմայի շրջանակում ներկայացվեց Միլդրոնատ դեղամիջոցը, որը մի հարվածով կարող է ազդել ամենատարբեր հիվանդությունների վրա, շնորհիվ իր ինքնատիպ առանձնահատկության, այն է` կարգավորել մետաբոլիկ գործընթացները:

–   Ի՞նչ նվաճումներ կան ոլորտում վերջին մի քանի տարիների ընթացքում:

–   Անհերքելի նվաճում է կարդիովիրաբուժության զարգացումը: Առանց այս ճյուղի անհնարին կլիներ մի շարք սիրտ-անոթային հիվանդությունների բուժումը: Հայաստանում կարդիովիրաբուժությունը սկսեց զարգանալ դեռևս պրոֆեսոր Միքայելյանի գործունեության տարիներին, իսկ հիմա այն գնալով ավելի է հզորանում` իր թիկունքում ունենալով արտասահմանյան գործընկերների փորձը:

–   Պարոն Օգանովն իր հարցազրույցում առանձնացրեց երեք կետեր, որոնց վրա հիմնված է առողջությունը: Խնդրեմ, Ձեր տեսակետը։

–   Առողջ սիրտ ունենալու առաջին հենակետն, անշուշտ, մտածված ու ճիշտ ապրելակերպն է: Պետք է իմանալ, թե ինչ է ռիսկի գործոնը, պարզապես խոսելու փոխարեն պետք է պայքարել, պետք է վերացնել ծխելը, ալկոհոլի օգտագործումը, ճարպակալման գործոնները: 2-րդ հենակետը մեր կյանքւմ բժշկի գոյությունն է. ո˝չ մի հարևան, բարեկամ չի˝ կարող լինել մեր բժիշկը: Պետք է տարեկան ամենաքիչը մեկ անգամ այցելել բժշկին և իմանալ սեփական առողջության մասին բազմաթիվ մանրամասներ: Երրորդ հենակետը կարդիովիրաբուժությունն է: Ահա սիրտն առողջ պահպանելու երեք հենակետերը:

Մեր հաջորդ զրուցակիցը «Գրինդեքս» դեղագործական ընկերության հայաստանյան ներկայացուցչության ղեկավար Աշոտ Սարգսյանն է, ում հետ խոսեցինք ընկերության խնդիրների, գործառույթների, ինչպես նաև  սիմպոզիումի հիմնական նպատակների մասին:

–   Ներկայացրեք, խնդրեմ, «Գրինդեքս» դեղագործական ընկերությունը:

–   «Գրինդեքս»-ը առաջատար դեղագործական ընկերությունն է Մերձբալթյան երկրներում: Բացի պատրաստի դեղամիջոցներից ընկերությունը արտադրում է նաև դեղորայքի ակտիվ սուբստանցիաներ, որոնք արտահանվում են  եվրոպական մի շարք երկրներ` Շվեդիա, Գերմանիա, Հունգարիա և ԱՄՆ: «Գրինդեքս» ընկերությունը մասնագիտացված է հակաուռուցքային, սիրտ-անոթային և կենտրոնական նյարդային համակարգի վրա ազդող դեղամիջոցների արտադրությամբ: 

–   Կարո՞ղ եք նշել ընկերության նշանավոր ձեռքբերումներից:

–   Վերջերս «Գրինդեքս»-ը ստացավ FDA (Միացյալ Նահանգների պարենի և դեղագործության վերահսկողության դաշնային հանձնաժողով) ամերիկյան խստագույն դեղագործական գործակալություններից  թույլտվություն` արտահանելու իր դեղանյութերը ԱՄՆ:

Ձեռքբերում է Հայաստանում ներկայացուցչության հիմնադրումը։ Նախապես ուսումնասիրելով մեր երկրի առանձնահատկություները և փորձելով կազմակերպել անթերի աշխատանք` գրեթե մեկ տարի է, ինչ ընկերության ներկայացուցչությունը պաշտոնապես գործունեություն է ծավալում Հայաստանում։

–   Ո՞րն է այսօրվա սիմպոզիումի հիմնական թեման:

–   Սիմպոզիումը նվիրված էր մետաբոլիկ գործառույթները կարգավորող դեղամիջոցներին: Սա նոր ուղղություն է բժշկության ասպարեզում: Զեկույցներում բանախոսներն անդրադարձան «Գրինդեքս» ընկերության Միլդրոնատ օրիգինալ դեղամիջոցին, սրտանոթային հիվանդությունների բուժման գործընթացում նրա կիրառման առանձահատկություններին: Ի դեպ նշեմ, առհասարակ, մետաբոլիզմը կարգավորող դեղամիջոցների շարքը մեծ չէ:

–   Ի՞նչ կտա բժիշկներին այս սիմպոզիումը:

–   Փորձի փոխանակումն է հիմնական նպատակը:  Արտասահմանյան մեր գործընկերների հետ շփումը վստահություն կապահովի բժիշկներին իրենց ամենօրյա աշխատանքային գործընթացում նորարարությունների կիրառմանը, նաև պրակտիկ մոտեցում ներկայացված դեղամիջոցները օգտագործելիս։ Հատկապես ուշադրության արժանացավ Միլդրոնատ դեղամիջոցի կիրառումը բժշկի պրակտիկ աշխատանքում:

«Գրինդեքս» դեղագործական ընկերության հայաստանյան ներկայացուցչության աշխատակիցները հյուրերի հետ

Հարցեր, պատասխաններ, մեկնաբանություններ