Հուլիսին Ռ. Օ. Յոլյանի անվան Արյունաբանական կենտրոնում կայացավ «Հայկական Արյունաբանական» ասոցիացիայի բացումը:

Բացմանը ներկա էին մեր հանրապետության տարբեր բուժհաստատություններում աշխատող արյունաբաններ, տրանսֆուզիոլոգներ, իմունոլոգներ, բժշկական ոլորտի այլ մասնագետներ: Քանի որ տեղի էր ունենում ասոցիացիայի անդրանիկ նիստը, ներկաները անդրադարձան մի քանի կազմակերպչական, կանոնադրական հարցերի, որոնց թվում էին ասոցիացիայի անվան հստակեցումը, անդամների գրանցումը:

Ողջյունի խոսքով հանդես եկավ Ռ. Օ. Յոլյանի անվան Արյունաբանական կենտրոնի տնօրեն, պրոֆեսոր Սմբատ Դաղբաշյանը, այնուհետև նիստը շարունակեցին անդրանիկ նիստի նախագահը՝ Ելիզավետա Ամիրխանյանը և Երվանդ Հակոբյանը, որոնք իրենց հերթին անդրադարձան ասոցիացիայի ստեղծման անհրաժեշտությանը, հրատապությանը, գործունեության նպատակներին, խնդիրներին:

Նիստի վերջում 62 մասնակիցների մասնակիցների կողմից կատարվեց Ասոցիացիայի նախագահի ընտրություն: Ասոցիացիայի նախագահ ընտրվեց պրոֆեսոր Սմբատ Դաղբաշյանը:

Ասոցիացիայի ապագային վերաբերող հարցով դիմեցինք նորընտիր նախագահին.

–  Պարոն Դաղբաշյան, ասոցիացիան ի՞նչ ծրագրեր ունի և ինչպե՞ս է պատրաստվում դրանք իրականացնել:

–  Այսօր տեղի ունեցավ «Հայկական Արյունաբանական» ասոցիացիայի առաջին նիստը: Մեր երկրում հեմատոլոգիան կարևոր շրջան է ապրում, և առջևում լուրջ փոփոխություններ են սպասվում: ՀՀ նախագահի հովանու ներքո, Առողջապահության նախարարության հետ միասին ստեղծվում է Ոսկրածուծի փոխպատվաստման կենտրոն, որը տարածաշրջանում միակն է լինելու: Հեմոպոետիկ ցողունային բջիջների փոխպատվաստումը  ամենաժամանակակից և արդյունավետ միջոցն է բազմաթիվ հեմատոլոգիական հիվանդությունների բուժման համար: Մեր հիվանդները հնարավորություն կստանան բուժվել մեր երկրում: Մենք փորձում ենք ստեղծել ասոցիացիա, որն ունակ կլինի աջակցել և´ հիվանդին, և´ բժշկին: Հեմատոլոգները, տրանսֆուզիոլոգները, իմունոլոգները, ցիտոգենետիկները, որոնք այսօր կլոր սեղանի շուրջ դարձան ասոցիացիայի անդամ, իրենց գլխավոր նպատակն են համարում Հայաստանում հեմատոլոգիայի զարգացումը:

–  Որո՞նք են լինելու Ձեր առաջին քայլերն այս բնագավառում:

–  Առաջին հերթին մենք պետք է մի քանի կազմակերպչական հարցեր լուծենք, կատարենք մասնագետների միջև աշխատանքի բաժանում: Կենտրոնում աշխատելու, մեր մասնագետների որակավորման բարձրացման և փորձի փոխանակման խնդիրը ևս առաջնահերթ է, քանի որ մոտ ժամանակներում կենտրոնում արդեն կատարվելու է առաջին վիրահատությունը: 

Ասոցիացիայի առաջին նիստն ընթացավ բուռն քննարկումներով: Դահլիճում ակտիվ քննարկումները թույլ են տալիս մտածել, որ ասոցիացիան կծառայի իր բարի նպատակին։

Հարցեր, պատասխաններ, մեկնաբանություններ