Հայաստանի միջազգային բուժքույրական առաջին համագումարը

Մեր հանրապետությունում բուժքույրերի շահերի և իրավունքների պաշտպանության, պրակտիկ գործունեություն և կրթական պատշաճ մակարդակ ապահովելու նպատակով «Էրեբունի» պետական բժշկական քոլեջի (տնօրեն` Ա. Քուշկյան) հաջող փորձի հիման վրա ստեղծված քույրական գործի կազմակերպիչների բուժքույրական նոր ասոցիացիայի և ԱՄՆ գլոբալ կրթության զարգացման ինստիտուտի նախաձեռնությամբ ապրիլի 27-30-ը Երևանում կայացավ Հայաստանի միջազգային բուժքույրական առաջին համագումարը` «Փոխակերպելով բուժքույրական առաջնորդությունը` վերափոխիր ինքդ քեզ, համակարգը և հանրությունը» կարգախոսով:

Երևան էին ժամանել բուժքույրերի միջազգային միության, ինչպես նաև միջազգային այլ կազմակերպությունների ներկայացուցիչներ, բուժքույրեր տարբեր երկրներից, հյուրեր:

Ողջունելով համագումարի մասնակիցներին, ՀՀ առողջապահության նախարար Հ. Քուշկյանը նշեց, որ նախաձեռնության նպատակը բուժքույրական գործի զարգացման հեռանկարների, մատուցվող ծառայությունների որակի բարձրացումն ու քույրական գործի առաջընթացի ապահովումն են: Բնակչության առողջության պահպանման, բուժսպասարկման, մասնագիտական խնամք ցուցաբերելու գործում անգնահատելի է առողջապահության համակարգում ամենաստվար աշխատուժը ներկայացնող բուժքույրերի դերը:

 

 

Ելույթներ ունեցան ՀՀ ԱԺ առողջապահության, սոցիալական և բնության պահպանության հարցերի մշտական հանձնաժողովի նախագահ Ա. Բաբլոյանը,«Էրեբունի» պետական բժշկական քոլեջի տնօրեն,«Քույրական գործի կազմակերպիչների ասոցիացիա» ՀԿ նախագահ Ա. Քուշկյանը, Անգլիայի թագավորական քոլեջի պատվավոր փոխնախագահ Ք. Քոքսը, Վիվա-Սել ՄՏՍ գլխավոր տնօրեն Ռ. Յիրիկյանը, Սիգմա Թետա Թաու բուժքույրական միջազգային պատվավոր միության նախագահ Կ.Մորինը, կրթության գլոբալ զարգացման ինստիտուտի նախագահ և. Վենսթեյնը, Նեբրասկայի համալսարանի բժշկական քոլեջի տնօրեն և. Ռայենը և այլք: 

 

Համագումարը խթան դարձավ հայաստանյան և միջազգային համայնքների բուժքույրերի միջև համագործակցության զարգացման ու փորձի փոխանակման համար:

Հարցեր, պատասխաններ, մեկնաբանություններ