Բարձիթողի խոանալ մեծ պոլիպի վիրահատություն․ ՔԿԱ կլինիկայի ղեկավար, բ. գ. թ. Վասակ Մելիքսեթյան. armeniamedicalcenter.am

Ի՞նչ տարիքի էր կլինիկա դիմած բուժառուն և ի՞նչ գանգատներ ուներ։

Մեր կլինիկա էր դիմել 14 տարեկան երեխա, ով գանգատվում էր դժվարաշնչությունից, քթից լորձային արտադրությունից, գլխացավերից, կլման ակտի ժամանակ քիթ-ըմպանում օտար մարմնի զգացողությունից, ռնգախոսությունից: Այդ կապակցությամբ մինչ այդ բժշկի չէին դիմել:

Հենց առաջին զննման ժամանակ՝ աղջկա քթի, բերանի խոռոչն ուշադիր դիտելիս նկատվեց գոյացություն: Չի բացառվում, որ մի փոքր անփույթ զննելիս այն չնկատվեր:

Անուշադրության, անհետևողականության հետևանքով բավականին բարձիթողի վիճակ էր զարգացել, որը երեխայի մոտ բերելու էր շատ լուրջ խնդիրների:

Հետազոտությունների արդյունքում պարզվեց, որ երեխայի մոտ առկա է խոանալ պոլիպ, որն էլ վիրահատությամբ հեռացվեց։

Ի՞նչ հետազոտություններ կատարվեցին։

Անմիջապես կատարվեց գլխի, քթի հարակից խոռոչների ԿՏ հետազոտություն, հայտնաբերվեց մեծ գոյացություն քիթ-ըմպանում:

Գոյացությունն սկզբում առաջացել էր հայմորյան ծոցում, այնուհետև անցել էր քթի խոռոչ, այդտեղից իջել քիթ-ըմպան: Գործընթացում ներգրավված էին քթի հիմնականում մի կողմի հարակից բոլոր խոռոչները՝ և՛ հայմորյան ծոցը, և՛ էթմոիդալ խոռոչը:

Այդ բավականին մեծ գոյացությունն անընդհատ աճել էր և դեռ աճման միտում ուներ, և, ամենայն հավանականությամբ, երկար ժամանակ էր առկա:

Ինչպե՞ս իրականացվեց վիրահատությունը։

Վիրահատության ժամանակ արդեն դիտարկվեց բավականին մեծ՝ մոտ 12-13 սմ մեծության պոլիպոզ գոյացություն: Այդ գոյացությունները կոչվում են անդրոխոանալ պոլիպներ:

Կատարվեց հայմորոտոմիա, էթմոիդէկտոմիա: Այսինքն, վիրահատությունը սկսելով հայմորյան խոռոչից, հասել ենք մինչև խոանա:

Համակցվել են մի քանի վիրահատություն և այն էլ՝ ոչ այնքան օպտիկական սարքերի կիրառմամբ, քանի որ տարածքը տեսանելիության համար փոքր էր: Դա, իհարկե, որոշակի դժվարություն էր ստեղծել, բայց մեզ հաջողվեց սկզբից մինչև վերջ ամբողջ գոյացությունը հեռացնել:

Պոլիպը հեռացվեց ոչ թե քթից, այլ բերանի խոռոչից, որովհետև այդքան մեծ գոյացությունն անհնար էր այլ կերպ դուրս բերել:

Պոլիպի հյուսվածքի նմուշն ուղարկվել է հետազոտության:

Ինչպե՞ս է ընթացել հետվիրահատական շրջանը։

Հետվիրահատական շրջանն անցել է հարթ, որևէ խնդրի առաջ չենք կանգնել: Սիլիկոնային խծուծները /տամպոնները/ հեռացվել են 48 ժամ անց, որից անմիջապես հետո երեխայի շնչառությունը վերականգնվել է:

Գոհ են և՛ երեխան, և՛ ծնողները, որոնք նոր են միայն նկատում, թե երեխան որքան հանգիստ է քնում և որքան է ակտիվացել:

Ի՞նչ է ընդհանրապես իրենից ներկայացնում խոանալ պոլիպը։

Խոանալ պոլիպը հազվադեպ հանդիպող բարորակ գոյացություն է, որը հիմնականում տեղակայվում է քթի խոռոչի և քիթըմպանի սահմանում: Հիմնական կլինիկական նշաններից են միակողմանի քթային դժվարաշնչությունը, քթից արտադրությունը, ռնգախոսությունը, խռռացնելը, կլման ակտի դժվարացումը, քրոնիկ հիպօքսիան:

Բուժումը մեծ մասամբ վիրահատական է։

Մինչ օրս պարզ չէ, թե որն է խոանալ պոլիպի առաջացման պատճառը, սակայն դեր են խաղում ժառանգական գործոնը, ալերգիկ հիվանդությունները և այլն։

Ի՞նչ բարդություններ կարող են զարգանալ բուժումն ուշացնելու դեպքում։

Պոլիպը հիմնականում ալերգիկ մարդկանց մոտ է արտահայտվում և ավելի բարձր տարիքում: Եթե այն ժամանակին չախտորոշվի և չհեռացվի, կարող է հանգեցնել եվստախիտի, ձայնհաղորդող տիպի ծանրալսության, սինուսիտների: Բարձր տարիքում արդեն նրան զուգորդում է նաև բրոնխեալ ասթման:

Սակայն այս պարագայում երեխան դեռ փոքր էր և դեռ չէր հասցրել ալերգիզացվել:

Այս դեպքը իհարկե և՛ մի քիչ ուշացած, և՛, այնուամենայնիվ, ժամանակին բացահայտված դեպք էր:

Հարցեր, պատասխաններ, մեկնաբանություններ