ԵՊԲՀ-ին նվիրաբերվեց Գրիգոր Հաջի-Մուրադյանի հեղինակած մատենագրությունը

Բժշկական համալսարանի գրադարանի նախկին երկարամյա ղեկավար, գրադարանագետ Գրիգոր Հաջի-Մուրադյանի հեղինակած մատենագրությունը դուստրը՝ բանասեր Անժելա Մուրադյանն այսօր նվիրաբերեց բժշկական 100-ամյա համալսարանին:

«Հայրս մեծ նվիրումով գրել է բժշկական համալսարանի մատենագիտությունը` ստեղծման օրից սկսած: Մանրամասն ներկայացնելով, թե ինչպես և ովքեր են եղել բժշկական բուհի կարկառուն պրոֆեսորներն ու դոցենտները, աշխատակիցները, ամբիոնի վարիչները` իրենց լուսանկարներով և այլ մանրամասներով, աղբյուրներով և հղումներով»,- պատմեց Անժել Մուրադյանը՝ հավելելով, որ հայրը մեծ նվիրումով ահռելի աշխատանք է կատարել:

ԵՊԲՀ աշխատակազմի ղեկավար Շուշան Դանիելյանը շնորհակալություն հայտնեց նվիրաբերության համար՝ ընդգծելով, որ պատմական նշանակության նյութերը առավել քան արժեքավոր են հատկապես բուհի 100-ամյա հոբելյանի շրջանակում, քանի որ համալսարանի կողմից նյութերի արխիվացման, մշակման ծավալուն աշխատանք է իրականացվել:

Նա տեղեկացրեց, որ առաջիկայում կվերաբացվի լիովին արդիականացված բժշկական թանգարան, որտեղ տեղ կգտնի նաև Մուրադյանների ընտանիքի կողմից նվիրաբերված այս եզակի մատենագրությունը:

Համակարգչային տպագրությամբ կազմված մատենագրությունը հեղինակը չի հասցրել հրատարակել, սակայն այն հանձնելով բժշկական համալսարանին՝ դուստրը վստահ է, որ այդ կերպ հարազատ կրթօջախում վառ կմնա հոր հիշատակը: Անժելա Մուրադյանը ևս հայրիկի ղեկավարման օրոք մի քանի տարի աշխատել է բժշկական համալսարանի գրադարանում:

Փաստում է, որ հայրիկը լինելով պատասխանատու և սկզբունքային մարդ մշտապես կարևորել է յուրաքանչյուր գրքի, ատլասի, տպագրական նյութի խնամքով պահպանումը:

Գրիգոր Նազարի Հաջի-Մուրադյանը ծնվել է 1935 թվականին, աշխատել է ԵՊԲՀ գրադարանում 1988-ից 1996 թթ.: Իր գործին նվիրված մատենագետը մահացել է 2020 թվականին: Բացի բժշկականից նա մասնագիտական գործունեություն է ծավալել նաև Հայաստանի ազգային գրադարանում:

Նշենք, որ բժշկական համալսարանի կողմից Անժելա Մուրադյանին հանձնվեց շնորհակալագիր հայրիկից՝ Գրիգոր Հաջի-Մուրադյանից ժառանգած մատենագրությունը ԵՊԲՀ-ին նվիրաբերելու համար։

Հարցեր, պատասխաններ, մեկնաբանություններ