Կլինիկական դեպք. ռենտգենէնդովասկուլյար վիրահատություն աորտայի աղեղի ճյուղերի վրա. armeniamedicalcenter.am

Օրերս «Արմենիա» ՀԲԿ-ում կատարվել է ռենտգենէնդովասկուլյար վիրահատություն աորտայի աղեղի ճյուղերի վրա։ Վիրահատության մանրամասներն է ներկայացնում  անոթային վիրաբուժության կենտրոնի սիրտ-անոթային վիրաբույժ Վրեժ Արթուրի Հովակիմյանը։
Հիվանդը, կին, Թ.Ա. ընդունվել է «Արմենիա» ՀԲԿ անոթային վիրաբուժության կենտրոն հետևյալ ախտորոշմամբ. աթերոսկլերոզ (ԱՍ), աորտայի աղեղի ճյուղերի ԱՍ ախտահարում, ձախ ԸՔԶ-ի և ՆՔԶ-ի նեղացում` 70%, տարած իշեմիկ ինսուլտ ձախ ՄՈՒԶ-ի համակարգում աջակողմյան հեմիպլեգիայով, խառը բնույթի էնցեֆալոպաթիա։

Ընդունվելիս հիվանդի վիճակը միջին ծանրության էր։ Լաբորատոր, ֆիզիկական և գործիքային հետազոտություններից հետո (Էխո-ԿԳ, ԴՍ, ՀՏ-անգիոգրաֆիա) հայտնաբերվել է ձախ քնային զարկերակների անկայուն վահանիկ 65-70% նեղացումով, ձախ առաջային ուղեղային զարկերակի A1 սեգմենտի ապլազիա, բաց Վիլիզյան օղ, սրտամկանի հետին պատի տարած տրանսմուրալ ինֆարկտ։ Հաշվի առնելով հիվանդի ծանրության աստիճանը, որոշում է կայացվել խուսափել բաց վիրահատական միջամտությունից և, որպես բուժման առաջնային մեթոդ, ընտրել քիչ ինվազիվ ռենտգենէնդովասկուլյար մեթոդը։

Նշված վիրահատությունն իրականացրել են սիրտ-անոթային վիրաբույժներ Վրեժ Արթուրի Հովակիմյանը և Վիրաբ Մանուկի Աղաբեկյանը։ Աջ ԸԱԶ-ից ռետրոգրադ պունկցիայով կատարվել է ձախ ԸՔԶ-ի կաթետերիզացիա։ Գլխուղեղի դիստալ պաշտպանության պայմաններում կատարվել է ձախ ՆՔԶ-ի և ԸՔԶ-ի ստենտավորում 6×8-40մմ ստենտով հետագա պոստդիլյատացիայով։ Ստացվել է ստենտավորման լավ անգիոգրաֆիկ արդյունք` ինտրակրանիալ անոթների կոնտրաստավորման լավացումով։

Հիվանդը դուրս է գրվել վիրահատության երկրորդ օրը` կրկնակի անտիագրեգանտ թերապիայի 6-ամսյա կուրսի ցուցումով։ Քնային զարկերակների ախտահարման բուժման էնդովասկուլյար մեթոդն ավելի ու ավելի մեծ տարածում է գտնում աշխարհում և ըստ ESC տվյալների, հեռակա արդյունքներով չի զիջում բաց վիրահատական միջամտությանը: Նշված տենդենցներից փորձում ենք հետ չմնալ նաև մենք։

Հարցեր, պատասխաններ, մեկնաբանություններ