«Իզմիրլյան» ԲԿ հյուրն էր սթրեսաբանության հիմնադիր Ադա Թադևոսյանը. izmirlianmedicalcenter.com

Այսօր «Իզմիրլյան» բժշկական կենտրոնում բժիշկների հավաքական հանդիպումից հետո իր զեկույցով հանդես եկավ Հայաստանում «Սթրես» կենտրոնի և սթրեսաբանության հիմնադիր, պրոֆեսոր, մարդու հոգեկան ցնցումների վերաբերյալ ավելի քան հարյուր տպագրական հոդվածների, մի քանի մենագրությունների, ուսանողների համար «Սթրեսաբանություն» առաջին երկհատորյա դասագրքի հեղինակ Ադա Թադևոսյանը, ով կրթության և մարդու կենսագործունեության անվտանգության խնդիրների լուծման գործում ունեցած ներդրման համար պարգևատրվել է Մ.Վ. Լոմոնոսովի անվան ոսկե մեդալով: Ադա Թադևոսյանը տրավմատիկ սթրեսի, կենսաբանական հոգեթերապիայի միջազգային ասոցիացիաների անդամ է, ՌԴ իրավաբանական գիտությունների ակադեմիայի իսկական անդամ:

Պրոֆեսոր Ադա Թադևոսյանը նշեց, որ սթրեսը մարդուն դարձնում է դյուրագրգիռ, լարված, անհամբեր և դա նորմալ ռեակցիա է ոչ նորմալ կյանքի նկատմամբ:

Խորը անդրադարձ կատարեց մարդու հոգու ներդաշնակությանը, որտեղ արտացոլվում է ամեն ինչ:

Սթրեսային ռեակցիան հարմարվողական ռեակցիա է, օրգանիզմի արձագանքն է ցանկացած փոփոխության` ուրախության, տխրության, ողբերգության և այլնի նկատմամբ: Մարդու համար առավել մեծ նշանակություն ունի ոչ թե կենսաբանական, ֆիզիոլոգիական, այլ հոգեբանական հարմարողականությունը:

Սթրեսը ո՛չ միայն կապված է հոգեկան փոփոխությունների հետ` տրամադրության անկում, անքնություն, ագրեսիա, գրգռվածություն, ուշադրության նվազում և այլն, այլև պայմանավորված է սթրեսածին մեխանիզմով: Սթրեսը բնության մեջ դիտարկվում է որպես նորմալ պաշտպանական ռեակցիա արտաքին ազդեցությունների նկատմամբ:

Եթե յուրաքանչյուրն իրավիճակը գնահատի այնպես, ինչպես այն կա և ուղիներ փնտրի` հասնելու թեկուզև աննշան, փոքր հաջողության, դրական արդյունքի, ապա դա ներքին հավասարակշռության հասնելու լավագույն ելքն է: Սթրեսային իրավիճակում հարկ է գտնել ներքին հավասարակշռության բանալին:

«Իզմիրլյան» ԲԿ տնօրեն Ա. Չարչյանն իր երախտագիտությունը հայտնեց պրոֆեոր Ադա Թադևոսյանին յուրօրինակ զեկույցի համար, կարևորելով այն փաստը, որ համաշխարհային մասշտաբի մասնագետն է կիսում իր մոտեցումները:

Հանդիպման ավարտին Ա. Չարչյանն ընդգծեց, որ նմանատիպ հանդիպումներն ու քննարկումները տարբեր բնագավառներում առաջատար և բազմափորձ մասնագետների հետ հաճախակի կդառնան:

Հարցեր, պատասխաններ, մեկնաբանություններ