Լյարդի զարկերակ-դռներակային շունտի ներանոթային փակման եզակի դեպք «Արմենիա» հանրապետական բժշկական կենտրոնում. armeniamedicalcenter.am

Հիվանդը՝ 31 տարեկան կին, ընդունվել է «Արմենիա» հանրապետական բժշկական կենտրոնի վիրաբուժության կլինիկա «Արյունահոսություն մարսողական ուղուց» ախտորոշմամբ: Հիվանդը գանգատվում էր սրտխառնոցից, ընդհանուր թուլությունից, գլխապտույտից, դիտվել են արյունային փսխում, ձյութանման կղանք: Հիվանդի մոտ կլինիկա ընդունվելուց մեկ ամիս առաջ կատարվել է ծննդալուծում կեսարյան հատման միջոցով:

Կլինիկայում կատարված հետազոտություններով հայտնաբերվել են պորտալ հիպերտենզիա, կերակրափողի և կարդիայի վարիկոզ լայնացած անոթներ, որտեղիվ էլ եղել էր արյունահոսությունը: 11.12.2016թ. կատարվել է էնդոսկոպիկ մեթոդով վարիկոզ լայնացած անոթների լիգավորում (էնդոսկոպիստ Մանուկան Կ.Դ.):

Հաջողվեց արյունահոսությունը դադարեցնել, փրկել հիվանդի կյանքը, սակայն դեռ անհայտ էր պորտալ հիպերտենզիայի պատճառը: «Արմենիա» ՀԲԿ ախտորոշման բաժանմունքում կատարվեց համակարգչային շերտագրում  կոնտրաստավորմամբ (ռադիոլոգ Ե.Ա.Բաղդասարյան), ով հայտնաբերեց լյարդի 6-րդ սեգմենտի շրջանում զարկերակ-դռներակային մալֆորմացիա և շունտ, որով արյունը զարկերակային համակարգից անցնում էր դռներակ և ստեղծում պորտալ հիպերտենզիա: Զարկերակ-դռներակային մալֆորմացիայի շրջանում լյարդային զարկերակի ճյուղի տրամագիծը հասնում էր 13մմ-ի:

23.12.2017թ. կատարվել է ներանոթային միջամտություն (ներանոթային վիրաբույժ Տ.Պողոսյան), որի ընթացքում լյարդային զարկերայի աջ բլթային ճյուղը ենթարկվել է էմբոլիզացիայի: Հետվիրահատական շրջանն անցել է հարթ, ինտենսիվ թերապիայի մասնագետների հսկողության տակ (ծառայության ղեկավար Ա.Ա.Ղազարյան):

Հետվիրահատական շրջանում կատարվել է էզոֆագոսկոպիա, վարիկոզ լայնացած երակների զգալի ռեգրես է հայտնաբերվել: Հիվանդը դուրս է գրվել լավացումով:

Դեպքը հետաքրքիր և բացառիկ է ինչպես պաթոլոգիայի հազվագյուտ լինելով, այնպես էլ ախտորոշման և բուժման հնարավորությունների իմաստով:

Տիգրան Սամվելի Պողոսյան

Քանկոր և ՈՒԱկ ներանոթային վիրաբույժ

Հարցեր, պատասխաններ, մեկնաբանություններ