Սննդակարգը միզապարկի քարերի ժամանակ. հիվանդության կանխարգելումը. armeniamedicalcenter.am

Միզապարկի քարերի  առկայության ժամանակ սնունդը պետք է լինի հավասարակշռված, հարուստ վիտամիններով և հանքային աղերով, ուղղված նյութափոխանակության խանգարման կարգավորմանը:

Անհրաժեշտ է հրաժարվել արագ սննդից, կծու, աղի, ապխտած սննդատեսակներից, կիսաֆաբրիկատներից:

Սննդակարգը որոշվում է՝ ելնելով ախտորոշումից, լաբորատոր հետազոտություններից, մեզի մեջ առկա աղերի բնույթից:

• Օքսալատների բարձր մակարդակի դեպքում սննդակարգում օգտագործվում են մագնեզիում պարունակող մթերքներ՝ հաց և ոլոռ: Հակացուցվում են ցիտրուսային մրգերը, սպանախը, թրթնջուկը, պղպեղը և կակաոյի հատիկներ պարունակող ուտեստները, որոնք բարձրացնում են օքսալաթթվի մակարդակը։
• Ուրատների դեպքում անհրաժեշտ են մեզը հիմնայնացնող մթերքներ, ինչպիսիք են՝ հանքային ջուրը, կաթնամթերքը, հացը, ձուն, միրգ-բանջարեղենը, լոլիկը և կարտոֆիլը: Պետք է սահմանափակել միսը, ձուկը, մսամթերքը, սպանախը, թրթնջուկը, սունկը:
• Ֆոսֆատների բարձր մակարդակի դեպքում սննդակարգն ուղղված է լինում մեզի թթվայնացմանը: Թույլատրվում են միս, ձուկ, ձու, հատիկաընդեղենային մշակաբույսեր, խնձոր, կանաչ ոլոռ, դդում: Իսկ ահա մնացած մրգերը, բանջարեղենը, հատապտուղները, պանիրը, կաթնամթերքը պետք է սահմանափակել:

 
Միզապարկի քարի ժամանակ պետք է նաև ընդունվող հեղուկները վերահսկել. oրական օգտագործել 2 լ ջրից ոչ պակաս: Ջուրը նվազեցնում է աղերի խտությունը և խոչընդոտում քարերի առաջացմանը:

ԿԱՆԽԱՐԳԵԼՈՒՄԸ

Կանխարգելումը պետք է ուղղված լինի օրգանիզմի կարգավորմանը արդյունավետ կոնսերվատիվ կամ վիրահատական բուժումից հետո:

Կանխարգելիչ միջոցառումներից են.

• Հավասարակշռված սննդակարգը վիտամինների, միկրոէլեմենտների մեծ պարունակությամբ: Անհրաժեշտ է սահմանափակել կիսաֆաբրիկատները, արագ սնունդը և արագ ածխաջրերը:
• Ամեն օր պետք է օգտագործել անհրաժեշտ քանակի մաքուր, ոչ հանքային ջուր /օրը 2 լիտր/
• Լիարժեք հանգիստ և քուն, օրվա ռեժիմի ճիշտ պլանավորում
• Ֆիզիկական նորմալ ակտիվություն. զբոսանք մաքուր օդում, վազք, թեթև ֆիզիկական վարժություններ
• Հրաժարում վնասակար սովորություններից՝ ծխելուց, ալկոհոլային խմիչքներից
• Դեղորայքային կանխարգելում՝ բժշկի կողմից նշանակված։

Հարցեր, պատասխաններ, մեկնաբանություններ