Միզաքարային հիվանդություն. հարցերին պատասխանում է Արամ Զոհրաբյանը. armeniamedicalcenter.am

Ի՞նչ է միզաքարային հիվանդությունը:

Միզաքարային հիվանդությունը (ՄՔՀ) միզասեռական համակարգի ամենատարածված հիվանդություններից է` իր հաճախականությամբ զբաղեցնելով  3-րդ հորիզոնականը:

Ովքե՞ն են առավել հակված միզաքարային հիվանդության, ռիսկի գործոնները:

Միզային քարերի առաջացման հաճախականության վրա ազդում են կլիման, սոցիալ-տնտեսական վիճակը, հեղուկների ընդունումը, կենսաձևը, զբաղմունքը, քաշը, տարիքը և սեռը.

Արդյո՞ք միզաքարային հիվանդությունը ժառանգական է:

Ժառանգական գործոնն ունի իր դերը:

Նշանակություն ունի՞, արդյոք, աշխարհագրությունը:

Այո, օրինակ՝ Հայաստանը համարվում է ՄՔՀ էնդեմիկ զոնա:

Ի՞նչ դերակատարում ունի սնունդը երիկամներում քարերի առաջացման գործընթացում:

Սննդակարգից ռիսկի գործոններն են՝ սննդի կալորիականությունը, կալցիումի բարձր քանակ պարունակող սննդամթերքի օգտագործումը, A և B վիտամինների դեֆիցիտը:

Ինչպե՞ս են առաջանում քարերը երիկամներում և ի՞նչ տեսակներ կան:

Վերոնշյալ բոլոր նյութերը նպաստում են երիկամներում բյուրղիկների առաջացմանը, որոնք այնուհետև միաձուլվելով չափերով մեծանում են՝ ձևավորելով միզային քարեր: Երիկամների քարերի դասակարգումն իրականացվում է ըստ տեղակայման (բաժակի, ավազանի) և ըստ կառուցվածքի (օքսալատային, ֆոսֆատային, ուրատային, ցիստինային)

Ի՞նչ կերպ է մեզում միզաթթվի քանակի բարձրացումը նպաստում քարերի առաջացմանը երիկամներում:

Միզաթթվի ցուցանիշի բարձրացումը նպաստում է ուրատային քարերի առաջացմանը:

Քար միզապարկում, միզածորանում, երիկամներում: Ի՞նչ ախտանիշներով է արտահայտվում միզաքարային հիվանդությունը:

Երիկամների քարերը, սովորաբար, որևէ կլինիկական արտահայտություն չունեն՝ մինչ նրանց անկումը միզածորան, որն ուղեկցվում է երիկամային խիթով, կամ չափերով խիստ մեծացումը վերածվում է մարջանաձև քարի, ինչը նույնպես ուղեկցվում է ցավային համախտանիշով: Միզապարկի քարերն արտահայտվում են դիզուրիայով (միզարձակման տարատեսակ խանգարումներով): Բոլոր դեպքերում, կարող է նկատվել հեմատուրիա (արյունամիզություն):

Ի՞նչ կլինի, եթե չբուժեն միզաքարային հիվանդությունը:

Միզաքարային հիվանդության ժամանակ ամենահաճախ հանդիպող բարդությունը միզուղիների սուր բորբոքային գործընթացներն են՝ (պիելոնէֆրիտ, պիոնէֆրոզ, պարանէֆրիտ, ցիստիտ, ուրետրիտ): Ստորին միզուղիների քարերի դեպքում կարող է առաջանալ սուր միզակապություն, միզածորանների քարերի դեպքում առաջանում է հիդրոնեֆրոզ, որը կարող է բերել անուրիայի կամ քրոնիկական երիկամային անբավարարության:

Ի՞նչ է երիկամային խիթը:

Երիկամային խիթը սուր ցավային համախտանիշ է, որն արտահայատվում է գոտկային շրջանի սուր ցավերով՝ պայմանավորված ուրոդինամիկայի (մեզի արտահոսքի) կամ հեմոդինամիկայի խանգարումով:

Ի՞նչ օգնություն ցուցաբերել երիկամայաին խիթի ժամանակ:

Նախևառաջ դիմել համապատասխան հիվանդանոց` ախտորոշումը հաստատելու համար: Արդեն հետազոտություններում հաստատված երիկամային խիթի ժամանակ առաջին բուժօգնությունը դիկլոֆենակի 75մգ միջմկանային ներարկումն է` ըստ ԵՈՒԱ ուղեցույցի:

Ինչու՞ է հղիների մոտ սրվում հիվանդությունը, ինչպե՞ս բուժել:

Հղիների մոտ` ի հաշիվ էսթրոգենների քանակի ավելացման, դիտվում է միզուղիների հարթ մկանների թուլացում՝ միզուղիների լայնացում, որը նպաստում է ստորին միզուղիներից ինֆեկցիայի վերել տարածմանը: Նաև` հղիության ժամանակ, սովորաբար, արգանդը տեղաշարժվում է դեպի աջ՝ առաջացնելով աջակողմյան հիդրոնեֆրոզ:

Ինչպե՞ս ախտորոշել միզաքարային հիվանդությունը: Ախտորոշման ի՞նչ գործիքային մեթոդներ են իրականացվում:

Ախտորոշման համար հիմնականում օգտագործվում են ՈՒՁՀ և ռենտգեն հետազոտություն, որոշ դեպքերում` համակարգչային շերտագրում (ՀՇ):

Միզաքարային հիվանդության լաբորատոր կրիտերիաները:

Լաբորատոր հետազոտություններից պարտադիր կատարվում է մեզի ընդհանուր քննություն, կրեատիննի և միզանյութի որոշում: Բուժման մեթոդները բաժանվում են 2 մեծ խմբի՝ կոնսերվատիվ և վիրահատական:

Ինչպե՞ս բուժել միզաքարային հիվանդությունը: Բուժման ի՞նչ մեթոդներ կան:

Չկա այնպիսի բուժում որը նպատակահարմար լինի բոլորին: Բուժման ռազմավարության ընտրության համար դեր ունեն բազմաթիվ գործոններ՝ քարի տեղակայում, քարի տեսակ, հիվանդի մոտ այլ հիվանդությունների առկայություն և այլն:

Միզաքարային հիվանդության բուժում` առանց վիրահատության. ո՞ր դեղերն են օգնում ազատվել երիկամների քարերից:

Քարերի ոչ բոլոր տեսակներն են ենթարկվում դեղորայքային բուժման: Կան բազմաթիվ դեղեր, որոնք նպաստում են որոշ քարերի լուծմանը կամ տեղաշարժմանը, սակայն` ինչ նշանակել հիվանդին, որոշում է բժիշկը` հաշվի առնելով բոլոր վերոհիշյալ գործոնները:

Վիրահատությունները միզաքարային հիվանդությունների ժամանակ:

Վիրահատական բուժման հիմնական տարբերակներն են հեռահար քարափշրումը (ԴԼԹ), կոնտակտային քարափշրումը (Էնդոսկոպիկ կամ պերկուտան) և բաց վիրահատությունը:

Հետվիրահատական ընթացքը:

Հետվիրահատական ընթացքը կախված է հիվանդի ընդհանուր վիճակից և բուժման ռազմավարության ընտրությունից` հաշվի առնելով արդի մեթոդները: Մինիմալ ինվազիվ միջամտությունների լայն կիրառումը բավականին նվազեցրել է հիվանդների հոսպիտալիզացիայի տևողությունը:

Ի՞նչ է լիթոտրիպսիան:

Լիթոտրիպսիան քարափշրումն է հեռահար կամ կոնտակտային տարբերակներով:

Բուժումը` ժողովրդական միջոցներով:

Ժողովրդական բուժման մեթոդները կորցրել են իրենց արդիականությունը:

Ֆիզիոթերապիան` միզաքարային հիվանդության ժամանակ:

Ֆիզիոթերապիան բուժման նպատակով գրեթե չի օգտագործվում:

Սննդակարգը` միզաքարային հիվանդության ժամանակ:

Կախված քարի կառուցվածքից, հիվանդի համար որոշվում է համապատասխան սննդակարգ:

Միզաքարային հիվանդության բուժումը սանատոր-կուրորտներում:

Սանատոր-կուրորտային բուժումն օգտագործվում է ՄՔՀ ոչ բարդացած դեպքերում, ինչպես նաև ՄՔՀ առաջացման կանխագելման համար:

Քարերի առաջացումը կրկնվելու կանխումը:

ՄՔՀ առաջանալու կամ կրկնվելու կանխման հիմնական մեթոդը հեղուկների մեծ քանակի օգտագործումն է, ինչպես նաև հատուկ սննդակարգը, որը որոշվում է անհատական՝ կախված քարերի բաղադրությունից:

Հարցեր, պատասխաններ, մեկնաբանություններ