Անմիզապահություն.

Անմիզապահությունը հատկապես կանանց շրջանում հաճախ հանդիպող ուրոլոգիական խնդիր է, որը պահանջում է ժամանակին և ճիշտ արված մասնագիտական միջամտություն:


Անմիզապահության կանխարգելմանն ու բուժմանն առնչվող տարբեր հարցերի շուրջ զրուցեցինք «Էրեբունի» բժշկական կենտրոնի ուրոլոգ Գարեգին Սարգսյանի հետ:

–   Ի՞նչ է անմիզապահությունը:

–   Անմիզապահությունը կարելի է բնորոշել որպես, մարդու կամքից անկախ, մեզի չվերահսկվող արտահոսք: Անմիզապահությամբ տառապում են հիմնականում կանայք: Ստաստիստիկ տվյալներով կանանց 25-35%-ը տառապում է անմիզապահությամբ: Անմիզապահությունը կարող է ուղեկցվել ինչպես միզելու անհաղթահարելի ցանկությամբ (ուրգենտ կամ հրամայական անմիզապահություն), այնպես էլ առանց միզելու որևէ ցանկության (սթրեսային-ֆիզիկական լարվածության, հազի, փռշտոցի ժամանակ): Հազվադեպ չէ նաև նյարդային հիվանդությունների (ցրված սկլերոզ, Պարկինսոնի հիվանդություն, գլխուղեղի ինսուլտ և այլն) հետևանքով առաջացող անմիզապահությունը: Արդյունավետ բուժում կազմակերպելու համար շատ կարևոր է ախտորոշել, թե անմիզապահության որ տեսակով է տառապում պացիենտը:

–   Որքանո՞վ է խնդիրը լուրջ

–   Պետք է ասել, որ անմիզապահությունը կյանքին վտանգ սպառնացող ախտաբանություն չէ, բայց երբ զրուցում ես անմիզապահությամբ տառապող կնոջ, հատկապես երիտասարդ կնոջ հետ, ով չի կարողանում անկաշկանդ աշխատել, հյուր գնալ, ճանապարհորդել, մշնապես կախվածության մեջ է գտնվում զուգարանից և տակդիրներից՝ հասկանում ես, որ գործ ունես խորապես դժբախտ անձնավորության հետ:

–   Ովքե՞ր են ռիսկային խմբում:

–   Ցավոք, տարեցտարի ավելանում են ռիսկային խմբում գտնվողները և՛ տարիքային, և՛ սեռային տեսանկյունից: Եթե հրամայական անմիզապահությունը տարածված է ավելի երիտասարդ տարիքում, ապա սթրեսայինն առավել հանդիպում է հասուն տարիքի կանանց մոտ, որը հետևանք է, օրինակ, մեծ պտղով բարդ ծննդաբերությունների, գինեկոլոգիական վիրահատությունների, որոնք բերում են կոնքի հատակի թուլացման: Միզուկի արտաքին սեղմակը հարում է կոնքի հատակին, և բոլոր այն գործոնները, որոնք հանգեցնում են կոնքի հատակի փակեղի թուլացմանը, կարող են պատճառ դառնալ նաև սթրեսային անմիզապահության:

–   Ինչպիսի՞ն է բժշկին դիմելիությունը Հայաստանում:

–   Բավականին ցածր՝ 10-ից 2-ը, սակայն վերջին տարիներին աճի միտում կա: Մեր կանայք նման գանգատներով դիմում են հիմնականում թերապևտներին և գինելոկոգներին. շատերը չգիտեն անգամ, որ այս խնդրով հարկավոր է դիմել ուրոլոգին: Իհարկե, նրանց հաճախ օգնում են նաև գինեկոլոգները, սակայն արդյունավետ բուժում ապահովելու համար անհրաժեշտ է ուրոլոգի, գինեկոլոգի, էնդոկրինոլոգի համագործակցություն:

–   Կլիմաքսի շրջանում գտնվող կանանց մոտ խնդրի սրացումներ նկատվո՞ւմ են:

–   Կլիմաքսի շրջանում, կապված դաշտանադադարի և հետագա հորմոնալ տեղաշարժերի հետ, երբ տեղի է ունենում միզուկի արտաքին հատվածի և հեշտոցի լորձաթաղանթի փոփոխություն, ու առաջ են գալիս չորություն, մրմուռ, դրանք ևս կարող են պատճառ լինել հրամայական անմիզապահության:

–   Իսկ հղիության շրջանու՞մ …

–   Այդ շրջանում ևս կարող է հանդիպել, որի պարագայում խնդիրը ֆիզիոլոգիական է, և հետծննդյան շրջանում հիմնականում վերանում է: Պարզապես կարելի է խորհուրդ տալ մեր կանանց, որ ծննդաբերությունից երկու-երեք ամիս անց սկսեն կոնքի մկանների վերականգնողական վարժությունները՝ հետագա բարդություններից խուսափելու համար:

–   Տղամարդկանց շրջանում որքա՞ն հաճախ է հանդիպում անմիզապահություն:

–   Տղամարդկանց շրջանում անմիզապահությունը բավականին քիչ հանդիպող երևույթ է և, որպես կանոն, հետևանք է նյարդային խանգարումների և բարդ ուրո-պրոկտոլոգիական վիրահատությունների:

–   Ինքնուրույն ի՞նչ քայլեր կարելի է անել խնդրից խուսափելու համար:

–   Առաջին հերթին՝ պայքար ավելորդ քաշի դեմ: Ավելորդ քաշը մեծացնում է որովայնի ճնշումը, որն ազդում է կոնքի փակեղի վրա, և թուլացնում սեղմակը: Հարկ է պարբերաբար զբաղվել մարմնամարզությամբ: Երկրորդը. կարգավորել սննդակարգը՝ հրաժարվել գազալցված հյութերից, սուրճից, կծու-թթու ուտելիքից, թարմ քամած նարնջի, տոմատի հյութերից... Այս մթերքները կարող են առաջացնել միզապարկի հիպերակտիվություն՝ բերելով անմիզապահության:

–   Կա՞ն ֆիզիկական վարժություններ, որոնք ևս օգնում են:

–   Օգտագործվում են, այսպես կոչված, Կեգելի վարժությունները, որոնք կարելի է նաև տնային պայմաններում կատարել:

–   Ի՞նչ կասեք արհեստական սեղմակների օգտագործման մասին:

–   Երբ ախտորոշված է սթրեսային անմիզապահություն, այսինքն, երբ տուժած է փականային համակարգը, այս դեպքերում, բուժման Ոսկե ստանդարտ է համարվում

Սլինգային վիրահատութըունը՝ որի էությունը միզուկի միջնահատվածում արհեստական ժապավենի տեղադրումն է, ինչը միզուկի համար ծառայում է որպես հենարան և կանխում մեզի ակամա արտահոսքը:

–   Ի՞նչ խորհուրդ կտաք նրանց, ովքեր կասկածում են, որ ունեն այս խնդիրը:

–   Եթե նկատում են հաճախամիզություն, գիշերամիզություն, մեզի չվերահսկվող ակամա արտահոսք, բազմակի օգտագործում են տակդիրներ, ապա անպայման դիմել համապատասխան մասնագետի և որքան հնարավոր է շուտ:
 

Հարցեր, պատասխաններ, մեկնաբանություններ