Գիտնականներն աշխատում են աշխարհում առաջին արհեստական երիկամի ստեղծման ուղղությամբ. news.am

Բժիշկ Ուիլյամ Ֆիսսելլ IV-ը եւ իր գործընկերները` Վանդերբիլտի համալսարանի բժշկական կենտրոնից, աշխատում են մի քանի ֆիլտրով եւ դրան միացված միկրոչիպերով արհեստական երիկամի ստեղծման ուղղությամբ: Նման երիկամի շնորհիվ մի քանի հիվանդությամբ հիվանդները կազատվեն կանոնավոր դիալիզի անհրաժեշտությունից: 

Արհեստական երիկամը կենսահիբրիդային սարք կլինի, որն իր մեջ կներառի միկրոչիպեր եւ կենդանի բջիջներ: Ալյումինե տարայի չափ ունեցող արհեստական երիկամն իր աշխատանքի համար էներգիա կստանա հիվանդի սրտից: Ինչպես բացատրել է բժիշկ Ֆիսսելլը, սարքը կնմանակի իսկական երիկամի աշխատանքը եւ արյունը կմաքրի ավելորդ աղից եւ այլ նյութերից: Իսկ միկրոչիպը ո՛չ միայն արյան մաքրման գործառույթ կիրականացնի, այլեւ կորոշի, թե որ կենդանի բջիջները պետք է աշխատեն եւ որոնք` հանգստանան:

Առայժմ սարքը փորձարկվում է լաբորատոր պայմաններում. հետազոտողներն ուսումնասիրում են, թե արյունն ինչպես է անցնում ֆիլտրերով եւ փորձում են կանխել արյան մակարդուկների հնարավոր առաջացումը:

Գիտնականները ենթադրում են, որ միկրոչիպերով զինված սիլիցիումից ֆիլտրերի առաջին փորձարկումները հիվանդների վրա հնարավոր կլինի սկսել  2017-ի վերջին: Այժմ արդեն հեղինակները կամավորների խումբ են հավաքում, ովքեր պատրաստ են փորձարկել սարքը:

Հարցեր, պատասխաններ, մեկնաբանություններ