Արյան փորձաքննությունը կօգնի դեղ ընտրել ընկճախտի դեմ. բրիտանացի գիտնականներ. 1in.am

Լոնդոնի Թագավորական քոլեջի բժիշկները պնդում են, որ արյան փորձաքննության իրենց մեթոդը կօգնի ավելի ճիշտ նշանակել դեղեր ընկճախտով տառապողներին՝ հայտնում է BBC-ն:

Ներկայում բժիշկները հակադեպրեսանտներ են նշանակում փորձերի և սխալների մեթոդով՝ դիտարկելով, թե ինչ հակազդեցություն է առաջացնում այս կամ այն պատրաստուկը հիվանդի մոտ, անհրաժեշտության դեպքում փոխելով դեղը:

Դա հանգեցնում է այն բանին, որ դեպքերի մոտավորապես կեսի ժամանակ դեղը, որը բժիշկն առաջինն է նշանակում, չի գործում:

Նոր մեթոդը թույլ է տալիս առանձնացնել այն հիվանդներին, որոնց չեն համապատասխանում սովորական հակադեպրեսանտները: Բժիշկների գնահատմամբ՝ ընկճախտով տառապողների ընդհանուր թվում այդ մարդիկ կազմում են մոտավորապես մեկ երրորդը:

Ընկճախտը հոգեկան առողջության շատ տարածված խնդիր է ամբողջ աշխարհում. տարբեր գնահատումներով՝ ընկճախտով տառապում է բոլոր տարիքների մինչև 350 միլիոն մարդ:

Հարցեր, պատասխաններ, մեկնաբանություններ