Վրեժ Շահրամանյան. «Հայաստանում անպտղության ցուցանիշն անցել է 15 տոկոսի շեմը»

«Անպտղությունը Հայաստանում ավելի է տարածվել»,- այսօր կայացած ասուլիսի ժամանակ փաստեց բժիշկ-սեքսապաթոլոգ Վրեժ Շահրամանյանը: Սակայն մինչ բուն թեմային անցնելը նա փորձեց հստակեցնել, թե ինչ ասել է անպտղություն. «Սովորաբար անպտղություն ենք անվանում այն ամուսնությունը, երբ, առանց հակաբեղմնավորիչների օգտագործման, զույգը մեկ տարվա ընթացքում ապրում է կանոնավոր սեռական կյանքով, և մեկ տարին լրանալուց հետո հղիություն չի գրանցվում: Այս դեպքում նոր մենք ախտորոշում ենք անպտղություն»:

Այս պարագայում բժիշկը կարևորեց մեկ տարուց հետո ախտորոշման գործոնը, քանզի, ըստ նրա, 4-5 ամիս հետո հղիություն չգրանցելով եզրակացնելը, թե տվյալ զույգի մոտ անպտղություն է, սխալ է, քանի որ, շատ դեպքերում հղիությունն ուղղակի ավելի ուշ է գրանցվում: Սեքսապաթոլոգը բերեց մի պաշտոնական տեղեկատվություն, ըստ որի`այն երկիրը, որտեղ անպտղությունը գերազանցում է 15%-ը, լրջագույն աղետի առաջ է կանգնած: «Այնինչ, Հայաստանում անպտղության ցուցանիչն անցել է 15 տոկոսի շեմը: Այսօր մեր կլինիկա դիմող յուրաքանչյուր երրորդ զույգն անպտղության խնդիր ունի: Մեզ համար սա մտահոգիչ փաստ է: Անպտղությունը գործոն է դարձել, որն ազդում է  վերարտադրողական առողջության ցուցանիշների և, ամենակարևորը, ժողովրդագրության վրա», – ասաց սեքսոպաթոլոգը:

Շահրամանյանը զավեշտալի համարեց այն երևույթը, երբ մարդիկ` ազգային առանձնահատկություններից ելնելով, անպտղության դեպքում դիմում է ոչ թե բժիշկ-մասնագետների, այլ հեքիմների, վախ չափողների, տարբեր տեսակի գուշակների, ինչն, ըստ մասնագետի, իր հերթին ավելի է բարդացնում իրավիճակը, հատկապես` ախտորոշման տեսակետից. «Անպտղությունը դատավճիռ չի լինի այն դեպքում, երբ զույգը ճիշտ ժամանակին դիմի բժշկին, մենք էլ ճիշտ ժամանակին կատարենք ախտորոշումն ու համապատասխան բուժումը»:

Խոսելով անպտղության պատճառների մասին` բժիշկ-սեքսապաթոլոգը նշեց, որ Հայաստանում անպտղության պատճառների կեսը կանանց ուսերին է, կեսը` տղամարդկանց: Հիմնական պատճառներից նշեց սեռավարակները, ինչպես նաև վատ սնունդն ու շատ կիպ հագուստը: 90-ականները` իրենց վատ ու դժվարին պայմաններով ևս, ըստ սեքսապաթոլոգի, իրենց հետքն են թողել այսօրվա երիտասարդների վերարտադրողական և սեռական առողջության վրա:

Ինչ վերաբերում է սեռավարակների տարածմանը, ապա Շահրամանյանը նախ և առաջ հիշեց հայ «խոպանչիներին». «Մեր հարգարժան տղամարդիկ, գնալով արտագնա աշխատանքի այլ երկրներ, մասնավորապես Ռուսաստան և Ուկրաինա, երկար ժամանակ այնտեղ ապրելով, չպաշտպանված սեռական կապերի մեջ մտնելով ու վարակվելով` վերադառնում են Հայաստան և ակամա դառնում մեր երկիր սեռավարակ ներկրողներ»:

Նշված խնդրի լուծում մանսնագետը համարում է  ճիշտ ինֆորմացիայի տարածումն ու անվճար բժշկահետազոտական ծրագրեր, բաց դռների օրեր կազմակերպելը: Նա նաև նշեց, որ իրենք ներկայացրել են նմանատիպ ծրագրեր որոշ առողջապահական ընկերություններին, սակայն առայժմ  դրանք անպատասխան են մնացել: ՀՀ Առողջապահության նախարարությունը, սակայն, Շահրամանյանի  հավաստմամբ, ունի անպտղության դեմ ուղղված մի քանի կետից բաղկացած ծրագիր, որը մտադիր է մոտ ապագայում աստիճանաբար իրականացնել:

Հարցեր, պատասխաններ, մեկնաբանություններ