Կյանքի տեւողությունը կապված է սթրեսի նկատմամբ դրսեւորած ռեակցիայից. med.news.am

Սթրեսի նկատմամբ ճիշտ ռեակցիան երկարատեւ կյանքի բանալին է, նշում են Փենսելվանիայի համալսարանի մասնագետները: Նրանց խոսքով՝ սթրեսային իրավիճակի պոզիտիվ գնահատումը նվազեցնում է սթրեսի հետ կապված բորբոքման մակարդակը:

Մասնագետները վերլուծել են 827 մարդու տվյալները: Կամավորները 8 օրվա ընթացքում պատմում էին սթրեսային իրադրությունների մասին եւ իրենց՝ այդ իրադրությունների ազդեցությամբ ի հայտ եկած էմոցիաների մասին:  Դա թույլ տվեց գիտնականներին պարզել, թե ինչ ռեակցիա էին դրսեւորում կամավորները սթրեսի նկատմամբ, գրում է The Daily Mail-ը:

Մասնագետները նաեւ վերլուծել են կամավորների արյան նմուշների բորբոքման բիոմարկերները: Պարզվեց, որ բորբոքման մակարդակը սովորաբար բարձրանում էր այն մարդկանց մոտ, ովքեր չէին կարողանում հաղթահարել սթրեսային իրադրությունները: Բացի այդ՝ հետազոտությունը ցույց տվեց, որ կանայք ավելի են հակված քրոնիկ բորբոքման: Գիտնականները դրա պատճառները, սակայն, դեռեւս չգիտեն:

Տարբեր հիվանդությունների դեպքում մեր օրգանիզմում ի հայտ եկող իմունային պատասխանը թույլ է տալիս ավելի արագ վերականգնվել: Սակայն քրոնիկ բորբոքումը կարող է խաթարել առողջությունը: Այն կապված է այնպիսի խնդիրների հետ, ինչպես ճարպակալումը, սրտի հիվանդություններն ու քաղցկեղը: Մասնագետները խորհուրդ չեն տալիս շատ սուր արձագանքել սթրեսին: Պետք է պարզապես մտածել, կարեւո՞ր կլինի արդյոք տվյալ խնդիրը 5 տարի անց: Եթե ոչ, պետք չէ նյարդայնանալ դրա պատճառով:

Հարցեր, պատասխաններ, մեկնաբանություններ