Աղիքային մանրէների դերը ասթմայի զարգացման գործընթացում. news.am

Աղիքային մանրէները կարող են կարեւոր դեր խաղալ երեխաների մոտ ասթմայի առաջացման հարցում: Նման եզրահանգման են եկել Լինչեպինգի համալսարանից շվեդ գիտնականները, որոնց հետազոտության արդյունքները հրապարակվել են The Journal of Allergy and Clinical Immunology-ում:

Մասնագետներն ուսումնասիրել են 1-12 ամսական երեխաների հետազոտությունները եւ հայտարարել, որ մարդու կյանքի առաջին տարին լուրջ ազդեցություն է ունենում իմունային համակարգի զարգացման վրա: Գիտնականների խոսքով՝ ստացված արդյունքները հաստատում են տեսությունն այն մասին, որ աղիքային միջավայրն ազդում է ասթմայի առաջացման վտանգի վրա:

«Կարծում ենք, որ աղիքային մանրէների բազմազանությունը նպաստում է լորձաթաղանթի իմունային պաշտպանության ամրապնդմանը: Մեր նոր հետազոտության ընթացքում տեսանք երեխաների մոտ աղիքային մանրէների վրա իմունային արձագանքի տարբերությունը, որոնց մոտ ավելի ուշ ալերգիայի նախանշաններ են ի հայտ եկել»,- նշել են հետազոտության հեղինակները:

Գիտնականներն ուսումնասիրել են նմուշներում մանրէների կազմը եւ տարբերություն բացահայտել IgA հակամարմինների կենտրոնացման մեջ, որոնք լորձաթաղանթի պաշտպանական մեխանիզմի դեր են կատարում:

Ըստ գիտնականների՝ մանրէների տեսակներում հստակ տարբերություններ են նկատվել, որոնց արձագանքել է իմունային պաշտպանությունը, եւ հավելել, որ IgA հակամարմինների ցածր մակարդակ է արձանագրվել այն երեխաների մոտ, որոնց մոտ ասթման զարգացել է կյանքի առաջին յոթ տարիների ընթացքում:

Հարցեր, պատասխաններ, մեկնաբանություններ