Երաժշտությամբ զբաղվելն օգտակար է երեխաների հոգեբանության եւ ինտելեկտի համար. news.am

Երաժշտությունն օգնում է երեխաների հոգեբանական առողջությունն ամրապնդելուն եւ նրանց ինտելեկը բարձրացնելուն։ Այսպիսի եզրահանգման են եկել գիտնականները՝ սկանավորելով 6–18 տարեկան 232 երեխայի ուղեղը։

Իրենց հետազոտության ընթացքում գիտնականները պարզել են, որ երաժշտությամբ զբաղվելն ազդում է ուղեղի շարժիչ հատվածների վրա՝ բարձրացնելով դրանց ակտիվությունը շարժումների վերահսկողության եւ կենտրոնացման բարելավման համար։ Վարքագծի կարգավորման համար պատասխանատու ուղեղի հատվածները եւս որոշ փոփոխությունների են ենթարկվում։ Մասնավորապես, երաժշտությամբ զբաղվելը նպաստել է ուղեղի հատվածում կեղեւի հաստացմանը՝ կապված կատարողական գործառույթների, այդ թվում՝ հիշողության աշխատանքի, ինքնակամ ուշադրության եւ ապագայի պլանավորման հետ։

Հետազոտողները նաեւ նշել են, որ երաժշտությամբ զբաղվելու արդյունքում էմոցիաների վերահսկման համար պատասխանատու ուղեղի հատվածների կեղեւը նույնպես հաստացել է՝ երաժիշտ երեխաներին ավելի հավասարակշռված դարձնելով։

Այսպիսով, երաժշտությունը կարող է երեխաներին օգնել՝ լուծելու բազմաթիվ հոգեբանական խնդիրներ, եւ, հնարավոր է, նույնիսկ բարելավելու նրանց ուսումնական առաջընթացը։ Դրա հետ կապված՝ գիտնականներն առաջարկում են երեխաների մոտ հոգեբանական խանգարումների բուժման համար նոր մեթոդ մշակել։

Իրենց փորձարկման արդյունքները գիտնականները հրապարակել են American Academy of Child and Adolescent Psychiatry ամսագրում։

Հարցեր, պատասխաններ, մեկնաբանություններ