Վաղաժամ ծնված երեխաների փրկության այլընտրանքային միջոց. news.am

Հետազոտությամբ ապացուցվել է, որ չափահաս մարդկանց մոտ ի հայտ եկող որոշ խանգարումներ հաղթահարելու կարողությամբ աչքի ընկնող կոֆեինն ու վիագրան կարող են նաեւ վաղաժամ ծնված երեխաների կյանքը փրկել: Վերջիններիս համաշխարհային օրվա կապակցությամբ, ԱՄՆ գործող «Համազգային մանկական հիվանդանոցները» ներկայացնող փորձագետներն ամենափոքրիկ երեխաների խնամքն, անհրաժեշտության դեպքում, հիշյալ դեղամիջոցների օգնությամբ կազմակերպելու խորհրդով են հանդես եկել, հաղորդում է FoxNews-ը:

Բանն այն է, որ վաղաժամ ծնված երեխաները կարող են մոռանալ անընդհատ շնչելու անհրաժեշտության մասին, մինչդեռ կոֆեինը հիշողության բարելավմանը միտված խթան է հաղորդում ուղեղին, դիաֆրագմաներին ու թոքերին, ուստի եւ բոլոր հիշյալ հաստատությունների հետծննդյան ինտենսիվ խնամքի բաժանմունքներից դուրս գրված եւ բնական շնչառության անցած երեխաներին է նշանակվում: 

«Կարճաժամկետ հեռանկարում որքան լավ նրանց թոքերն աշխատեն, այնքան առավել առողջ ուղեղ կունենան հետագայում եւ անբուժելի նյարդաբանական խնդիրներից կխուսափեն: Այնպես որ, այդպիսի երեխաներին օրական մեկ բաժակ սուրճին համարժեք կոֆեինի տրամադրումը կարող է հրաշալի արդյունքների հանգեցնել», - նշել է բուժհաստատությունները միավորող կազմակերպության հետծննդյան խնամքի բաժնի ղեկավար դոկտոր Էդվարդ Շեփարդը:

Հատկանշական է նաեւ, որ ամերիկյան «Համազգային մանկական հիվանդանոցներում», որտեղ տարեկան ավելի քան 4.400 վաղաժամ ծնված երեխաներ են բուժում ստանում, 1-2 տոկոս թոքային հիպերտենզիայով ախտորոշման դեպքերում սիլդենաֆիլ կամ վիագրա կարող է նշանակվել: Խոսքն այն բարդության մասին է, որի առկայության պարագայում սիրտը դժվարությամբ է դեպի թոքեր արյուն մղում: Բանն այն է, որ դեղամիջոցը թոքային անոթային դիմադրությունը նվազեցնելու եւ թոքերի ու սրտի ծանր աշխատանքի անհրաժեշտությունը չեզոքացնելու հատկությամբ է աչքի ընկնում: Սիլդենաֆիլի շնորհիվ «Համազգային մանկական հիվանդանոցների» բժիշկները հետծննդյան ինտենսիվ խնամքի բաժանմունքում թոքային հիպերտենզիայից մահացության ցուցանիշը գրեթե զրոյի են հասցրել:

«Վաղաժամ ծնված երեխաների խնամքը բոլորովին նման չէ առավել մեծ տարիքի երեխաների ու չափահասների համար նախատեսված միջոցներին: Այստեղ առավել վստահելի դեղամիջոցների կարիք է զգացվում, քանի որ փոքրիկների կյանքը եւ առողջ մանկություն ունենալու հեռանկարը դրանց որակից է կախված», - մեկնաբանել է դոկտոր Շեփարդը:

Հարցեր, պատասխաններ, մեկնաբանություններ