Նորածիններն ի վիճակի են տարբերել աչքերի արտահայտությունը. գիտնականներ. 1in.am

Մարդկանց փոխհարաբերություններում աչքերը հատուկ դեր են խաղում: Օրինակ՝ վախի կամ զարմանքի ժամանակ աչքերը լայն բացվում են: Իսկ երբ մարդը ժպտում է, աչքերը նեղանում են: Մարդկանց աչքերի արտահայտությունը գնահատել մեզ օգնում են ուղեղի հատուկ գործընթացները: Վիրջինիայի համալսարանի գիտնականների ուսումնասիրության համաձայն՝ դրանք սկսում են ձևավորվել արդեն 7 ամսականում, գրում է The Hindustan Times-ը:

Ուսումնասիրողները յոթամսական երեխաներին ցույց են տվել աչքերի տարբեր արտահայտություններով մարդկանց լուսանկարներ: Այդ ընթացքում չափել են երեխաների ուղեղի ակտիվությունը: Գիտնականները նկատել են, որ տարբեր լուսանկարներ դիտելիս ուղեղի ակտիվությունը փոխվել է:

Լուսանկարները ցուցադրել են ընդամենը 50 միլիվայրկյանում: Դա բավական է, որ նորածինը տեսողականորեն ընկալի պատկերը: Այսպես, գիտնականները պարզել են, որ նորածինները տարբերում են աչքերի արտահայտությունները, և դա նրանց մոտ չգիտակցված է լինում: Այս մեխանիզմը, դատելով ամեն ինչից, կարևոր դեր է խաղում սոցիալական հմտություններ ձեռք բերելիս:

Հարցեր, պատասխաններ, մեկնաբանություններ