Բրիտանացի երեխաների կախվածությունն iPad-ից բուժելու համար հոգեբանական թերապիա է կիրառվում

Բրիտանացի փորձագետներն ահազանգում են, որ Միացյալ Թագավորությունում մինչև 4 տարեկան երեխաների շրջանում մեծ կախվածություն կա iPad-ներից, ինչը բուժելու համար պահանջվում է հատուկ հոգեբանական թերապիա։

Ինչպես նշում է The Telegraph-ը, ծնողները, ովքեր թույլ են տալիս իրենց երեխաներին օրական մի քանի ժամ զբաղվել iPad-ով, անձամբ նպաստում են, որպեսզի երեխան ձեռք բերի նման կախվածություն։ Պարբերականն ընդծում է, որ ներկայում Մեծ Բրիտանիայում iPad-ի կախվածությունից բուժվող ամենաերիտասարդ «հիվանդը» 4-ամյա մի աղջիկ է։

Ծնողները ստիպված են եղել դիմել հոգեբանական թերապիայի բուժման տարբերակին, երբ նկատել են, որ աղջկանից iPad-ը վերցնելուց հետո երեխան բառի բուն իմաստով դեպրեսիայի մեջ է ընկնում։ Բժիշկ Ռիչարդ Գրահամը, ով մշակել է հոգեբանական թերապիայի բուժման տարբերակը, ընդգծել է, որ iPad-ի նկատմամբ կախվածություն ունեցող երեխաների մոտ ի հայտ եկած ախտանիշները կարելի է համեմատել ալկոհոլից կամ թմրանյութերից կախվածություն ունեցող մարդկանց ախտանիշների հետ։

Նա նաև նշել է, որ չափից ավելի ժամանակ iPad-ով անցկացնելու հետևանքով երեխաները չեն կարողանում նորմալ սոցիալական հարաբերություններ ձևավորել շրջապատի հետ՝ ոչ վիրտուալ իրականությունում։ Մասնագետների հաշվարկների համաձայն՝ անցած 3 տարիների ընթացքում նորարարական տեխնոլոգիաների «բարիքներից» կախվածություն ունեցող երեխաների թիվը Միացյալ Թագավորությունում 32%-ի աճ է գրանցել։

Հարցեր, պատասխաններ, մեկնաբանություններ