Տղաների առաջադիմությունը դպրոցում ավելի ցածր է՝ կարծրատիպերի պատճառով. հետազոտություն

Բրիտանացի գիտնականները հետազոտության արդյունքում պարզել են, որ տղաների ցածր առաջադիմությունը դպրոցում պայմանավորված է այն կարծրատիպով, որ աղջիկներն իրականում շատ ավելի խելացի են, գրում է The Telegraph-ը։

Մասնագետների կարծիքով, երբ տղա երեխաներին անընդհատ ասվում է, որ աղջիկներն իրենցից ավելի ընդունակ են, դա խոչընդոտում է, որպեսզի նրանք ուսման մեջ դրսևորեն իրենց ողջ ներուժը։ Ուստի, ուսուցիչներն ու ծնողները պետք է վստահեցնեն տղաներին, որ իրենք մտավոր կարողությունների առումով բնավ չեն զիջում աղջիկներին։

Գիտնականների անցկացրած հետազոտության առաջին փուլում ուսումնասիրվել են 4-10 տարեկան տարբեր առաջադիմություն ունեցող 238 տղաներ և աղջիկներ։ Արդյունքում, պարզվել է, որ տղաները շատ ավելի անինքնավստահ են իրենց գիտելիքների հարցում։ Ու չնայած այդ հանգամանքին, նրանք թեստերը հաջողությամբ են հանձնել, ինչից հետո նույնիսկ նրանց ծնողներն ու ուսուցիչներն են զարմացել տղաների հաջողության վրա։ Նրանց նաև զարմացրել է, որ տղաները նույնպիսի դրական արդյունքներ են գրանցել, ինչպես որ աղջիկները։

Այնուհետև երեխաներին առաջարկվել է գրելու, կարդալու և մաթեմատիկայի մի շարք թեստեր անցնել։ Տղաների մի մասին թեստից առաջ ասվել է, որ նրանք, ըստ ամենայնի, շատ ավելի ցածր բալեր կհավաքեն, քան աղջիկները, իսկ մյուս մասին ասվել է, որ նրանց և աղջիկների շանսերը հավասար են։ Արդյունքում պարզվել է մի ուշագրավ փաստ. նախապես վատ տրամադրված տղաներն ավելի վատ արդյունք են արձանագրել, քան մյուս խումբը։

Հարցեր, պատասխաններ, մեկնաբանություններ