Հակաբեղմնավորիչ հաբերը կանխում են արգանդի քաղցկեղը. 1in.am

Հակաբեղմնավորիչ հաբերը վերջին 10 տարում օգնել են կանխելու արգանդի քաղցկեղի զարգացման 200 հազար դեպք, հայտնում է bbc.com-ն: Այդ մասին վկայում են Օքսֆորդի համալսարանի գիտնականների հետազոտության տվյալները:

Գիտնականները եկել են այն եզրակացության, որ եթե կինն ընդունում է հակաբեղմնավորիչ հաբեր, ապա նրա մոտ յուրաքանչյուր 5 տարում արգանդի քաղցկեղի ռիսկը նվազում է 25%-ով, և որքան երկար է կինն ընդունում այդ հաբերը, այնքան նա ավելի պաշտպանված է դառնում այդ հիվանդությունից:

Փորձագետների կարծիքով, հաբի պաշտպանական ֆունկցիան, ինչը պարունակում է նաև կանացի հորմոն՝ էսթրոգեն, շարունակվում է նաև այն ժամանակ, երբ կինը դադարում է այն ընդունելուց: Պրոֆեսոր Վալերի Բերալի կարծիքով, 70-ամյա կանայք, ովքեր երիտասարդ տարիքում օգտագործել են հակաբեղմնավորիչ հաբեր, նախկինի պես պաշտպանված են:

Սակայն դժվար է միանշանակ դրական գնահատել հակաբեղմնավորիչների ազդեցությունն օրգանիզմի վրա` երկարատև և կարճատև տարբեր կողմնակի ազդեցությունների պատճառով: Օրինակ՝ հակաբեղմնավորիչ հաբերը բարձրացնում են թրոմբի, երիտասարդ կանանց ուղեղի և սրտի կաթվածներ ստանալու, արգանդի վզիկի և կրծքագեղձի քաղցկեղի առաջացման ռիսկերը: Ուստի մինչև հակաբեղմնավորիչ հաբեր ընդունելու որոշումը կանանց խորհուրդ է տրվում խորհրդակցել մասնագետի հետ:

Հարցեր, պատասխաններ, մեկնաբանություններ