ԱՀԿ՝ կեսարյան հատումը պետք է իրականացվի միայն անհրաժեշտության դեպքում. news.am

Առողջապահության համաշխարհային կազմակերպությունը հանդես է եկել հայտարարությամբ, որի համաձայն՝ կեսարյան հատումը թույլատրելի է միայն այն դեպքում, եթե բնական ծննդաբերությունը վտանգում է մոր կամ մանկան առողջությունը, մասնավորապես՝ երկարատեւ ծննդաբերության, պտղի պաթոլոգիաների կամ դրա սխալ դիրքի դեպքում:

Կեսարյան հատումն ամենատարածված վիրահատություններից է աշխարհում, որը կարող է փրկել մոր կամ երեխայի կյանքը, սակայն էլեկտիվ վիրահատությունները, որոնք կատարվում են այն դեպքերում, երբ չկան բնական ծննդաբերության բժշկական հակացուցումներ, վտանգ են ներկայացնում ծննդկանի եւ երեխայի համար, իսկ առանձին դեպքերում կարող են հանգեցնել բարդությունների, հաշմանդամության եւ մահվան:

«Այս վիրահատությունը նպատակ ունի փրկել մոր կամ նորածնի կյանքը, բայց կեսարյան հատումը կարող է իրականացվել միայն այն դեպքում, երբ կինը դրա կարիքն ունի», - նշում է ԱՀԿ վերարտադրողական առողջության բաժնի ղեկավար Մարլին Թեմմերմանը (Marleen Temmerman):

1985 թվականին միջազգային բժշկական հանրությունը պարզել է, որ ծննդաբերած կանանց շրջանում կեսարյան հատումների օպտիմալ ցուցանիշը 10-15 տոկոս է կազմում: Այսինքն՝ կատարված վիրահատությունների այդ քանակի դեպքում բժիշկներին հաջողվում է նվազեցնել ծննդկանների եւ նորածինների շրջանում մահացության մակարդակը: Վերջին հետազոտությունների համաձայն՝ եթե վիրահատությունների քանակը կազմում է 10 տոկոս, մահացության մակարդակը ծննդկանների եւ նորածինների շրջանում նվազում է, սակայն եթե այդ ցուցանիշը գերազանցում է 10 տոկոսը, չկան որեւէ ապացույցներ, որ մահացության մակարդակը նվազում է:

Հարցեր, պատասխաններ, մեկնաբանություններ