Սրտի կաթվածով ախտորոշված կանայք ավելի մեծ ռիսկի են ենթարկվում. news.am

Հետազոտությամբ պարզվել է, որ սրտի կաթվածով ախտորոշված կանանց մոտ, տղամարդկանց համեմատությամբ, հիվանդանոցում մահացության ռիսկը նշանակալիորեն բարձր է: Բացի այդ, ապաքինման ժամկետն իգական սեռի մոտ կարող է ավելի երկար տեւել: Լավ նորությունն այն է, որ վերջին տարիներին, այնուամենայնիվ, մահացության ցուցանիշի զգալի կրճատում է նկատվում:

Յեյլի համալսարանականների (ԱՄՆ) նախաձեռնությամբ իրականացված հետազոտության շրջանակում հսկայածավալ տվյաներ են հավաքագրվել՝ 30-54 տարեկան հազարավոր հիվանդների առողջության, սրտի կաթվածի արդյունքում հոսպիտալացման եւ հիվանդանոցում մահացության դեպքերի հաճախականության վերաբերյալ: Դրանց վերլուծության արդյունքում մասնավորապես պարզվել է, որ.

• 2001-2010թթ. Միացյալ Նահանգների երիտասարդ բնակիչների շրջանում սրտի կաթվածի հետեւանքով հոսպիտալացման ցուցանիշի փոփոխություն չի գրանցվել,
  
  
• տարեց մարդկանց պարագայում նույն ժամանակահատվածում ցուցանիշի՝ 20 տոկոսի չափով կրճատում է նկատվել,
  
  
• երիտասարդ, հատկապես աֆրոամերիկացի կանանց շրջանում կաթվածի պահին առավել հաճախ լուրջ հիվանդություններ՝ արյան բարձր ճնշում, շաքարախտ կամ սրտի անբավարարություն է նկատվում:
  
  
• սրտի կաթվածի ենթարկված չափահաս՝ առավելագույնը 55 տարեկան հիվանդների շրջանում խոլեսթերինի բարձր մակարդակ ունենալու առավել մեծ հավանականությունը տղամարդկանց է բաժին հասնում:

Սրտաբան Ռիչարդ Կրասուսկին, որպես կողմնակի անձ, հատկանշական է համարել այն հանգամանքը, որ, համաձայն հետազոտության արդյունքների, վերջին մեկ տասնամյակի ընթացքում սրտի կաթվածի ենթարկված կանանց թվի փոփոխություն չի նկատվել:

«Մի փոքր հիասթափվում ենք՝ տեսնելով, որ մահացության ցուցանիշը տարբեր է՝ տղամարդկանց եւ կանանց համար», - նշել է նա:

Հետազոտության հեղինակները գտնում են, որ սրտանոթային հիվանդությունների ռիսկի գործոնների՝ արյան բարձր ճնշման, խոլեսթերինի բարձր մակարդակի, ճարպակալման, ծխելու սովորության եւ շաքարախտի նկատմամբ ագրեսիվ վերահսկողությունն առավելապես երիտասարդ կանանց շրջանում է օգտակար:

«Բազմաթիվ վկայություններ կան առ այն, որ ներկայումս ամերիկացիներն ավելի մեծ դժվարությամբ են սրտանոթային հիվանդությունների կանխարգելումն իրականացնում: Մարդիկ ավելի հաճախ են ճարպակալման, խոլեսթերինի եւ արյան ճնշման հետ կապված խնդիրներ ունենում: Սրանք բաներ են, որոնք կենսակերպի փոփոխությունների շնորհիվ հեշտությամբ ենթակա են կանխարգելման», - մեկնաբանել է դոկտոր Կրասուսկին:

Գիտնականների համոզմամբ, հոսպիտալացման ցուցանիշների անփոփոխ մնալու պատճառը երիտասարդների շրջանում տեղեկացվածության պակասն ու ռիսկի գործոնները վերահսկելու անկարողությունն է:

Հարցեր, պատասխաններ, մեկնաբանություններ