Որո՞նք են անպտղության հիմնական պատճառները, ինչո՞ւ են շատացել վիժման դեպքերը…

Որո՞նք են անպտղության հիմնական պատճառները, ինչո՞ւ են շատացել վիժման դեպքերը…Անպտղության պատճառների և խնդիրների մասին այսօր լրագրողների հետ զրույցում խոսեցին բժիշկ-սեքսապաթոլոգ Վրեժ Շահրամանյանը և գինեկոլոգ Գեորգի Պողոսյանը:

Բանախոսները հենց սկզբից փաստեցին, որ  ընդհանրապես սեռական առողջության հետ կապված խնդիրներն առաջանում են անտեղյակության, գիտելիքների պակասի, հաճախ նաև խեղաթյուրված տեղեկատվության պատճառով: «Կան մարդիկ, ովքեր չգիտեն անգամ՝ ինչպես օգտագործել պահպանակը, կամ որ հակաբեղմնավորիչը որ դեպքում օգտագործել: Անգամ, այսպես ասած, տնական բեղմնավորիչներ են օգտագործում, օրինակ, երբ ամուսինը կնոջ սեռական օրգանի մեջ գազավորված ըմպելիք է լցնում: Նման խնդիրները հաճախ նպաստում են վերարտադրողական առողջության խանգարմանը»,-մանրամասնեց  սեքսապաթոլոգը:

Գինեկոլոգ Գ. Պողոսյանն էլ, խոսելով անպտղության խնդիրների մասին, ասաց, որ եթե նախկինում անպտղություն առաջանում էր  ինֆեկցիաներից, բորբոքային գործընթացներից, ապա այժմ անպտղություն  առաջանում է էնդոկրին համակարգի խախտումներից, որոնք մեծ մասամբ առաջանում են սթրեսներից. «Հիմա մեզ մոտ շատացել են  նաև վիժման դեպքերը, քանի որ հղիանում է  մութ ու ցուրտ տարիների  սերունդը»:

Գինեկոլոգի խոսքով՝ վիժման դեպքերի շատացման պատճառներից են  նաև դիետաները, որոնց պատճառով  կանանց մոտ խախտվում է նյութափոխանակությունը, իսկ տղամարդկանց մոտ՝ սերմնահեղուկի որակը, որի վրա բացասական ազդեցություն են ունենում սթրեսները:

Մասնագետները միակարծիք են՝ դիետա պահելուց առաջ պետք է անպայման խորհրդակցել բժշկի հետ: «Ես ոչ մի դիետայի տակ չեմ տեսել բժշկի ստորագրություն»,- ասաց պրն Պողոսյանը, ում միտքը լրացնելով՝ ասուլիսի մյուս բանախոս Վրեժ Շահրամանյանն ասաց, որ այս առումով վատ ազդեցություն են ունենում նաև գովազդային հոլովակները:

Նրա խոսքով՝ անպտղության վրա ազդում է նաև արտագնա աշխատանքը, որից  վերադառնալուց հետո անգամ տղամարդիկ չեն  ստուգվում, որն էլ պատճառ է դարձել տղամարդկանց շրջանում սեռավարակների թվի ավելացման:

Հարց է առաջանում՝ ինչ անել այս դեպքում: Պարզվում է՝ դպրոցներում մտցրել են սեռական դաստիարակության դասընթացներ, որոնք, չգիտես ինչու, դասավանդում են ֆիզկուլտուրայի ուսուցիչները: Բնականաբար, այս ամենն անարձագանք չէին թողել սեքսապաթոլոգները: Բայց հարցն այն է, որ նրանց քանակը քիչ է, և նրանք չեն կարող լինել բոլոր դպրոցներում, հետևաբար պետք է գոնե կենսաբանության ուսուցիչներին  վերապատրաստել այս ուղղությամբ:

Մասնագետների խոսքով՝  մինչ ամուսնանալը զույգը պետք է դիմի բժշկի: «ԽՍՀՄ տարիներին քաղաքացիական կացության ակտերի գրանցման գործակալությանը կից գործում էր խորհրդատվական  սենյակ, որտեղ ամուսնական զույգը մեկ շաբաթ ստանում էր համապատասխան գիտելիք, որից հետո՝ միայն ամուսնանում»,- մանրամասնեց պրն Շահրամանյանը՝ հավելելով, որ պետք է այս ինստիտուտը նորից վերականգնել:

Հարցեր, պատասխաններ, մեկնաբանություններ