«Խնդրում եմ, փրկե՛ք իմ ընտանիքը». հայ կանաց խնդրանքը հոգեբաններին

Հայ կանայք հոգեբանի հիմնականում դիմում են իրենց ընտանիքը փրկելու խնդրանքով, այս մասին այսօր լրագրողների հետ հանդիպմանն ասաց հոգեբան Մարիամ Մեհրաբյանը։

Ըստ նրա՝ հայ կանայք պարբերաբար ենթարկվում են ընտանիքում բռնության, բայց ընտանիքը փրկելու հույսը չեն կորցնում:
«Ընտանեկան բռությունների թիվը չի կարելի ասել, թե աճում է, պարզապես այսօր դրանց մասին բարձրաձայնվում ու պարզաբանվում է: Այս հարցի նկատմամաբ մոտեցումը շատ ավելի ցիվիլ է դարձել»,– ասաց նա:

«Պետք է նշել նաև, որ մարդկանց իրավագիտակցությունն է տարեցտարի բարձրանում՝ ԶԼՄ-ների ու մի շարք միջոցառումների շնորհիվ»,- ասաց նա:

Տիկին Մեհրաբյանը նշեց, որ Հայաստանում բռնության է ենթարկվում յուրաքանչյուր երրորդ կինը: Նրա խոսքով՝ յուրաքանչյուր կին պետք է իր գիտակցության մեջ ունենա հետևյալ երկու սկզբունքները՝ ես այն մարդն եմ, որը արժանի չէ ծեծի և ես այն կինն եմ, որը արժանի է ամենալավին:

«Կինը պետք է հասկանա , որ ինքը իրավունք ունի աշխատելու և ոչ ինքնազոհաբերվելով միայն երեխաներ մեծացնի: Պետք է հասկանան, որ անհրաժեշտ է առաջ գնալ, ինչը մեծամասամբ հնարավոր չէ ծեծող տղամարդկանց հետ, քանի որ նրանք հաճախ ընդհատակի տղամարդն են լինում»,- ասաց նա:

Հոգեբանը նշեց, որ այսօր ընտանեկան բռնությունների հիմնական պատճառ է դառնում ալկոհոլը, երբ ամուսինը հարբած տուն է գալիս և առանց գիտակցելու ծեծ ու ջարդ սկսում կնոջ նկատմամբ, իսկ առավոտյան ոչինչ չի հիշում:

«Նման դեպքերում տուժում են նաև երեխաները: Ամուսինները, որոնք բռնություն են գործադրում իրենց ընտանիքներում, երբեմն ևս զոհ են համարվում՝ զոհ իրավիճակի: Այսինքն` խնդիրները բազմազան են ու խորը»,– բացատրեց նա:

«Բայց ի տարբերություն կանանց՝ հայ տղամարդիկ նման հարցերով սովորություն չունեն դիմել հոգեբանի օգնությանը»,-եզրափակեց հոգեբան Մարիամ Մեհրաբյանը:

Հարցեր, պատասխաններ, մեկնաբանություններ