Կանայք նախընտրում են բժշկին այցելելու փոխարեն բուժվել ինտերնետի միջոցով. հարցման արդյունքներ

Ժամանակակից կանայք առողջության հետ կապված խնդիրների ի հայտ գալու դեպքում նախընտրում են դիմել համացանցի օգնությանը:
1000 կանանց շրջանում անցկացված հարցումները ցույց են տվել, որ նրանց կեսից ավելին փորձում է իրեն հուզող հարցերի պատասխաններն ու բուժման տարբերակները գտնել ինտերնետում, և բժշկին դիմում է միայն ծայրահեղ անհրաժեշտության դեպքում: Այս մասին գրում է The Telegraph-ը:

Կանայք ինտերնետի միջոցով ախտորոշում ստանալով՝ գնում են դեղատուն և համապատասխան դեղեր գնում` առանց բժշկի հետ խորհրդակցելու: Արդյունքում, ինչպես ցույց է տալիս վիճակագրությունը, նրանցից 4-ը գնում է այն, ինչն իրեն ամենևին անհրաժեշտ չէ: Լավ կլինի, եթե նման դեպքերում, հարվածը միայն դրամապանակին հասնի: Ինքնաբուժության նման դեպքերի 10-ից մեկն ավարտվում է կողմնակի սուր ազդեցություններով:

Պատճառները, որ կանայք նախընտրում են ինտերնետը, կարող են տարբեր լինել: Շատ կանայք չեն ցանկանում քննարկել իրենց խնդիրներն ընտանիքի անդամների հետ, որպեսզի մեծ աղմուկ չբարձրանա: Մի մասը չի կարողանում համբերել. հոգնում է ախտորոշման համար անալիզների պատասխանին սպասելուց, իսկ մյուս մասը վախենում է բժիշկներից:

Կանանց ամենից շատ հուզող խնդիրները կապված են քնի խանգարումների, գլխացավերի, դեպրեսիայի, մկանային ցավերի, հոգնածության և քորի հետ: Հարցվածների ամեն 5-րդն իր մոտ ինչ-որ ժամանակ ծանր հիվանդություն է կասկածել` օրինակ, կրծքագեղձի քաղցկեղ: Որոշ կանայք էլ իրենց վերագրել են արյան բարձր ճնշում, ասթմա և այլն:

Հարցեր, պատասխաններ, մեկնաբանություններ