Հոգեբանի խորհուրդները. բարձրացնում ենք ինքնագնահատականը

Աշխատանքում եւ անձնական կյանքում հնարավոր ցնցումները, մտերիմների կողմից քննադատական նկատողությունները, ամսագրերի ֆոտոմոդելների հմայքը եւ շատ այլ պատճառներ կարող են բացասաբար անդրադառնալ կնոջ ինքնագնահատականի վրա: Իսկ ինչպե՞ս պայքարել այս ամենի դեմ եւ վերականգնել երբեմնի ինքնավստահությունը: Հոգեբան Արմեն Հովսեփյանը պնդում է, որ կորցրած ինքնագնահատականը կինը, իհարկե, կարող է վերադարձնել:

«Փորձեք մտաբերել ձեր բոլոր լավագույն որակներն ու արժանիքները: Գրանցեք դրանք՝ հերթականությամբ թվարկելով թղթի վրա: Նաեւ փորձեք հիշել ձեր կյանքից իրավիճակներ, երբ հաջողվել է հաղթանակած դուրս գալ բարդ իրադրություններից: Թեկուզ ամենաանշան հաղթանակները: Նորից եւ նորից կարդացեք այդ ամենը եւ կրկնեք ինքներդ ձեզ: Այս միջոցը կարող է թվալ անհնարին եւ պարզ, բայց այն անպայման կարտացոլվի ձեր ենթագիտակցության մեջ եւ կօգնի բարձրացնել ձեր ինքնագնահատականը:

Կնոջ ինքնագնահատականը բարձրացնելու լավ միջոց կարող է լինել արտաքին տեսքի կտրուկ փոփոխությունը դեպի լավը: Աշխատեք ձեր արտաքինի ուղղությամբ, արմատապես փոխեք իմիջը, թարմացրեք զգեստապահարանը, զբաղվեք ֆիթնեսով եւ առավոտյան վազքով, եթե ավելորդ կիլոգրամներ ունեք՝ դիետա սկսեք:

Լրացուցիչ դրական էմոցիաները նույնպես նպաստում են ինքնավստահության բարձրացմանը եւ մեծացնում են անհարկի բարդույթներից ազատվելու ձեր հնարավորությունները: Եթե դեռեւս զբաղմունքն չունեք, որը ձեզ հաճույք է պատճառում, աշխատել գտնել այն: Սիրելի գործով ամեն օր զբաղվելուն ժամանակ տրամադրեք, որից իսկապես հաճույք եք ստանում: Նման մոտեցումը ձեզ անհրաժեշտ դրական էմոցիաներ կտա:

Օգտվեք ինքնագնահատականի բարձրացման այնպիսի արդյունավետ մեթոդից, ինչպես ներշնչանքն է: Նույնիսկ այն դեպքում, եթե դուք ամենեւին էլ չեք հավատում դրան, հրաժարվել պետք չէ: Դրական պնդումները կարող են արդյունավետորեն ազդել ձեր ենթագիտակցության վրա: Կանգնեք հայելու առջեւ եւ, ձեզ նայելով, կրկնեք. «Ես ամենագեղեցիկն եմ, ես սիրում եւ հարգում եմ ինձ, ու ինձ մոտ ամեն ինչ լավ է»: Եվ արդեն մեկ ամիս անց կնկատեք, որ ձեր ինքնագնահատականը բարձրանում է:

Իսկ վերջում՝ հարազատների ու մտերիմների աջակցություն, որը լավագույն կերպով է անդրադառնում կնոջ ինքնագնահատականի բարձրացման վրա: Բացատրեք ձեր մտերիմներին, թե ձեզ համար որքան կարեւոր են նրանց աջակցության խոսքերը: Ասացեք սիրելիին, որ ձեզ դուր է գալիս, երբ նա հաճելի խոսքեր եւ հաճոյախոսություններ է ասում: Դրանց պատասխանեք նույն կերպ, եւ նման հարաբերությունները կծառայեն ոչ միայն ձեր միության ներդաշնակությանը, այլեւ կբարձրացնեն ինչպես ձեր, այնպես էլ նրա ինքնագնահատականը»:

Հարցեր, պատասխաններ, մեկնաբանություններ