Հարցազրույց «Իզմիրլյան» ԲԿ անոթային վիրաբուժության բաժնի վարիչ Վարդան Ոսկանյանի հետ. izmirlianmedicalcenter.com

Ե՞րբ է հիմնադրվել անոթային վիրաբուժության բաժանմունքը:

Բաժանմունքն ունի 3 տարվա պատմություն՝անոթային բաժանմունքի հետ կապված ավանդույթներով, որոնք մինչ մեր այս բաժանմունքի ձևավորվելը չկար բուժհաստատությունում:

Որքանո՞վ են բուժման ժամանակակից մեթոդները ներդրված բաժանմունքում:

Ինչպես ցանկացած վիրաբուժական բաժանմունք, մեր բաժանմունքը ևս առաջնորդվում է բնակչությանը հնարավորինս ժամանակակից  և արդյունավետ միջոցներ առաջարկելու սկզբունքով: Ընդ որում, դրանք իրենց մեջ ներառում են ինչպես երակային, այնպես էլ զարկերակային համակարգի հիվանդություններով տառապող հիվանդների բուժումը:

Ինչպիսի՞ն է բաժանմունքի տեխնիկական հագեցվածությունը:

Բաժանմունքի հագեցած է նորագույն  սարքավորումներով, ապահովված է բուժման և հետազոտման համար անհրաժեշտ ժամանակակից բոլոր մեթոդներով և սարքավորումներով:

Ի՞նչ  հիվանդությունների բուժմամբ  է զբաղվում բաժանմունքը:

Անոթային բժշկի մասնագիտության մեջ հիվանդությունների հստակ խմբային պատկերացում չկա: Եթե սրտաբանության մեջ կան սրտաբան և սրտային վիրաբույժ հասկացությունները, ապա  այստեղ նման տարբերակում չկա: Դրա պատճառն այն է, որ անոթներն ամենուր են, և անոթաբանը փաստորեն գործ ունի բոլոր օրգան-համակարգերի որոշակի ախտաբանությունների հետ:

Բաժանմունքը զբաղվում է ինչպես վիրաբուժական, այնպես էլ որոշակի թերապևտիկ գործունեությամբ:  Բուժօգնություն ցուցաբերվում է և մեծահասակներին, և  երեխաներին:

Հիմնականում իրականացվում է երակային , զարկերակային և ավշային համակարգի հիվանդությունների ախտորոշում և բուժում (կոնսերվատիվ և վիրաբուժական եղանակներով):

Ինչպե՞ս է կազմակերպվում վիրահատված հիվանդների վերականգնողական շրջանը:

Գոյություն ունեն վերականգնողական շրջանի համար նախատեսված ծառայություններ, որոնք անհրաժեշտ են լինում հիմնականում զարկերակային համակարգի վիրահատություններից հետո:

Իսկ երակային ախտաբանության՝ վարիկոզի կապակցությամբ իրականացված վիրահատությունից հետո հիվանդները ՝ համպատասխան ցուցումներով հաջորդ օրը դուրս են գրվում և վերականգնողական շրջանն անցնում են տանը, իհարկե հսկողության տակ:

Ի՞նչ անձնակազմով են իրականացվում բաժանմունքի աշխատանքները:

Բաժանմունքի անձնակազմը բաղկացած է 2 վիրաբույժից,  որոնք բժշկական գիտությունների թեկնածուներ են և 1 կոնսուլտանտից:

Ինչպե՞ս են կազմակերպվում վերապատրաստումները և կոնֆերանսներին  մասնակցությունը:

Բժիշկների վերապատրաստումներն իրականացվում են արտասահմանում, բացի այդ մասնակցում ենք անոթային վիրաբույժների եվրոպական ասոցիացիայի ամենամյա կոնֆերանսներին:

Ինչպիսի՞ նոր մեթոդներ կան ներդրված բաժանմունքում:

Նոր վիրահատություններից կարելի է նշել ռադիոհաճախային աբլացիան ստորին վերջույթների վարիկոզ հիվանդությունների ժամանակ: Այդ ասպարեզում բաժանմունքը «պիոներ» է:

Հարկ է առանձնակի նշել նաև ներքին քնային զարկերակի նեղացումների ժամանակ կատարվող բաց վիրահատությունները, որոնք բաժանվում են երկու խմբի: Դրանցից մեկը ներքին քնային և ընդհանուր քնային զարկերակում ժամանակավոր շունտի տեղակայումն է: Հաջորդ եղանակը, այսպես կոչված, էվերսիոն էնդարտերէկտոմիայի իրականացումն է, երբ էվերսիայի եղանակով էնդարտերէկտոմիա է կատարվում ներքին քնային զարկերակից, այնուհետև բերանակցման միջոցով վերականգնվում է ներքին քնային զարկերակի ամբողջականությունը:

Այս մեթոդները վաղուց են ներդրվել անոթային բաժանմունքում: Էվերսիոն էնդարտերէկտոմիան ավելի բարդ միջամտություն է, որովհետև սրա ժամանակ անհրաժեշտ է արագ աշխատել, որպեսզի որքան հնարավոր է սեղմ ժամկետներում հանել ուղեղի արյան շրջանառության իշեմիկ վիճակը: Իսկ երբ արհեստական ժամանակավոր շունտ է դրվում, հնարավոր է երկար աշխատել, որովհետև նույնիսկ ախտահարված հատվածում ինչ-որ քանակությամբ արյան շրջանառություն հնարավոր է ապահովել:

Ստորին վերջույթների զարկերակային անբավարարության վիրահատություններից հետո քնային զարկերակի վիրահատությունները քանակությամբ երկրորդ հորիզոնականն են զբաղեցնում, այսինքն, այս ախտաբանությունը բավականին հաճախ է հադիպում:

Բաժանմունքը ԵՊԲՀ բազա է, կատարվող գիտական աշխատանքներն ուղղված են ինչպես մեր ամենօրյա աշխատանքային փորձը հարստացնելուն, այնպես էլ այլ բուժհիմնարկների հետ համագործակցությանը:

Ի՞նչ կասեք վիրահատությունների արժեքի մասին:

Մեր բաժանմունքում թերևս ամենամատչելի գնացուցակն է կազմավորվել, հատկապես առավել հաճախ հանդիպող հիվանդությունների համար: Մեկ ոտքի վարիկոզ հիվանդության վիրահատական բուժումը կազմում է 250 հազար դրամ, երկու ոտքինը՝ 420 հազար դրամ, մեծ անոթների՝ որովայնային աորտայի անևրիզմայի կամ Լևիշի համախտանիշի ժամանակ կատարվող վիրահատությունները 750 հազար դրամ են՝ առանց պրոթեզի արժեքի:

Հարցեր, պատասխաններ, մեկնաբանություններ