«Իզմիրլյան» ԲԿ-ի ընդհանուր և լապարոսկոպիկ վիրաբուժության բաժանմունք. izmirlianmedicalcenter.com

«Իզմիրլյան» ԲԿ է դիմել 82-ամյա կին՝ գանգատվելով էպիգաստրալ և աջ թուլակողի շրջանի մշտական բութ ցավերից: Իրեն հիվանդ է համարում շուրջ 4-5 օր: Անց են կացվել ընդհանուր կլինիկական, լաբորատոր, ռենտգենոլոգիական, ուլտրաձայնային և էնդոսկոպիկ հետազոտություններ:

Գաստրոսկոպիայի ժամանակ ստամոքսի անտրալ հատվածի միջին մասում, հետին պատին, դեպի մեծ կորություն հայտնաբերվել է օտար մարմին՝ մոտ 2սմ երկարությամբ, մխրճված լորձաթաղանթի մեջ: Կատարվել է օտար մարմնի էնդոսկոպիկ հեռացում, վերջինս 5սմ երկարությամբ մետաղալար էր:

Հետագա օրերին հիվանդի վիճակը աստիճանաբար վատացել է, ցավերը որովայնում ուժեղացել են, ուղեկցվել հևոցով, շնչարգելությամբ:
 ՀՇ հետազոտությամբ հայտնաբերվել են աջ ենթաստոծանիական և ենթալյարդային տարածությունների թարախակույտեր:

Օտար մարմնի էնդոսկոպիկ հեռացումից 4 օր անց կատարվել է բաց վիրահատություն՝ որովայնահատում, թարախակույտերի բացում, սանացիա և դրենավորում:
Վիրահատությունը իրականացրել է «Իզմիրլյան» ԲԿ-ի ընդհանուր և լապարոսկոպիկ վիրաբուժության    բաժանմունքի վարիչ՝ Հրաչյա Բաղդասարյանը և ընդհանուր վիրաբույժ՝ Արման Գրիգորյանը։

Վիրահատության ժամանակ ստամոքսի պատի դեֆեկտ չի հայտնաբերվել (ծածկված թափածակում): Հետվիրահատական ընթացքը բարդացել է երկկողմանի կանգային թոքաբորբով, հիդրոթորաքսով, թոքերի ատելեկտազով, շողացող առիթմիայով: Թոքերի երկարատև արհեստական վենտիլյացիայի անհրաժեշտության կապակցությամբ կատարվել է տրախեոստոմիա:

Վիրահատությունից 11 օր անց աջ ենթաստոծանիական տարածությունում հեղուկի կուտակման պատճառով կատարվել է վերջինիս դրենավորման փորձ քիչ ինվազիվ միջմաշկային եղանակով՝ սոնոգրաֆիկ հսկողության տակ: Դրենավորումը չի հաջողվել, ուստի կատարվել է կրկնակի որովայնահատում: Վիրահատական վերքը լավացել է երկրորդային ձգումով: Հիվանդը շուրջ 2,5 ամիս գտնվել է թոքերի արհեստական շնչառության ներքո:

Դեպքի առանձնահատկությունը կայանում է նրանում, որ որովայնի խոռոչի թարախակույտերով 82-ամյա հիվանդի մոտ, բարդացած ուղեկցող ծանր սիրտ-թոքային պաթոլոգիայով, թոքերի երկարաժամկետ արհեստական շնչառությամբ, հարկադրական հիպոդինամիայով, հաջողվեց հասնել դրական արդյունքի, և հիվանդը ընդուվելուց մոտ 3 ամիս անց առողջացած դուրս գրվեց կլինիկայից: Այս կապակցությամբ ուզում ենք մեկ անգամ ևս ընդգծել նման ծանր դեպքերում տարբեր մասնագետների սինխրոն թիմային աշխատանքի կարևորությունը (վիրաբույժ, անեսթեզիոլոգ-ռենիմատոլոգ, թոքաբան և կրծքային վիրաբույժ, սրտաբան, ՔԿԱ մասնագետ, կինեզիոթերապևտ և այլն)՝ միաժամանակ շնորհակալություն հայտնելով մեր գործընկերներին՝ անմնացորդ նվիրումով իրենց պրոֆեսիոնալ գործունեությունը իրականացնելու համար:

Հարցեր, պատասխաններ, մեկնաբանություններ