Մալայանի անվան ակնաբուժական կենտրոնի էքսիմեր-լազերային վիրաբուժության բաժանմունքի վարիչ, բ.գ.թ. Ելենա Մալայան. eyecenter.am

Մեր զրուցակիցն է Մալայան ակնաբուժական տոհմը շարունակող չորրորդ սերնդի ներկայացուցիչ. Ս.Վ. Մալայանի անվան ակնաբուժական կենտրոնի Էքսիմեր-լազերային վիրաբուժության բաժանմունքի վարիչ, բ.գ.թ. Ելենա Մալայանը:

–    Հարգելի՛ Ելենա Մալայան, ներկայացրեք, խնդրե՛մ, Ձեր բաժինը, այնտեղ իրականացվող ակնաբուժական վիրահատությունները:

–    Ցանկանում եմ նշել, որ այս կենտրոնում կատարվում են բոլոր տեսակի աչքի վիրահատություններ: Որոշակի խոսեմ բաժնի գործունեության մասին: Մեր բաժնում կատարում ենք էքսիմեր-լազերային վիրաբուժություն, այսինքն՝ կարճատեսություն, հեռատեսություն և աստիգմատիզմ շտկելու նպատակով կերատոկոնուսի բուժում: Անձամբ ես կատարում եմ նաև կատարակտայի, կերատոպլաստիկաների վիրահատություններ:

–    Դուք նշեցիք լազերային վիրաբուժության, կերատոկոնուսի բուժման մասին, առավել մանրամասն կնկարագրե՞ք գործընթացը:

–    Լազերային վիրաբուժության մասին խոսելով՝ պետք է նշեմ, որ այն ունի երեք տեսակ: Վիրաբուժական բոլոր տեսակներն էլ իրականացվում են մեր կենտրոնում: Կերատոկոնուսը զարգացող հիվանդություն է, որը բնորոշ է հայ և մյուս հին ազգերին: Այն բավականին տարածված հիվանդություն է: Ինչ վերաբերում է կերատոկոնուսի բուժմանը, ապա նշեմ, որ այսօր գոյություն ունի քրոսլինքինգ գործողությունը, որն այդքան վիրահատություն չէ, որքան ֆիզիոպրոցեդուրա: Այն արդեն 9 տարի է կիրառվում է մեր կենտրոնում, որի միջոցով կանխվում է կերատոկոնուսի զարգացումը, ինչպես նաև կարող ենք արդեն խուսափել եղջրաթաղանթի փոխպատվաստումից: Այս նոր մեթոդը հնարավորություն է տալիս բարձրացնել եղջրաթաղանթի մեխանիկական ամրությունը: Իսկ հատուկ մշակված լազերային ճառագայթումը թույլ է տալիս դանդաղեցնել, նաև դադարեցնել կերատոկոնուսի զարգացումը:

–    Արդյո՞ք հնարավոր է այս հիվանդությունը կանխել վաղաժամ:

–    Կարող եմ ասել, որ քրոսլինքինգի միջոցով հնարավոր է կանխել հիվանդության զարգացումն այն փուլում, որում հայտնաբերվել է: Քրոսլինքինքինգ գործողությունը իրենից բարդություններ չի ներկայացնում: Այն բավականին անվտանգ ընթացակարգ է և կիրառվում է միայն հիվանդության սկզբնական փուլում: Այսօր արդեն շատ հիվանդներ օգտվում են այս մեթոդից: Տարիների ընթացքում կատարված դիտարկումների արդյունքները վկայում են այն մասին, որ կա տեսողության զգալի աճ 85 տոկոսի դեպքում:

–    Իսկ ինչպիսի՞ սարքավորումներ են կիրառվում այս բաժնում:

–    Բաժինը հագեցած է նորագույն սարքավորումներով թե՛ ախտորոշման, թե՛ վիրաբուժության տեսակետից: Այսպես, վերջերս ձեռք բերված ֆեմտո լազերային սարքը հնարավորություն տվեց ապահով և կանխատեսված վիրահատություններ կատարել: Այս նորագույն եղանակն ունի զգալի տարբերություններ, որոնք հնարավորություն են տալիս միջամտությունն իրականացնել բավականին բարդ դեպքերում: Ֆեմտոլազերը թույլ է տալիս վայրկյանների ընթադցքում ձևել եղջրենու գերբարակ լաթ՝ կառավարվող հաստությամբ, տրամագծով, կենտրոնի տեղակայմամբ և հյուսվածքաբանությամբ: Այս դեպքում խոսքը գնում է էքսիմեր-լազերի մասին:

–    Լազերային վիրահատությունների տևողությունը սովորաբար որքա՞ն է կազմում:

–    Լազերային վիրահատությունները տևում են 10-12 րոպե՝ պայմանավորված վիրահատության տեսակով: Տեսակ հաճախ ընտրում է հենց հիվանդը, նա է որոշում՝ իր համար որ տարբերակն է առավել շահավետ: Իհարկե, կան դեպքեր, երբ բժիշկն է ասում, թե ինչպիսի վիրահատություն պետք է կատարվի:

–    Արդյո՞ք շատ են գրանցվում հետվիրահատական բարդություններ:

–    Առանձնահատուկ բարդություններ չեն լինում: Եթե լինում էլ են, ապա հիմնականում շտկվող են: Իսկ շտկումը իրականացվում է անվճար: Բարդությունը կայանում է նրանում, որ հնարավոր է աչքը վերադառնա նույն վիճակին: Այդպիսիք, սակայն, եզակի դեպքեր են:

–    Իսկ հնարավո՞ր է դա ևս շտկել՝ երկրորդ անգամ դիմելով վիրահատության:

–    Այո, երկրորդ անգամ վիրահատելով, հնարավոր է շտկել խնդիրը: Այսինքն՝ թույլատրելի է երկու անգամ վիրահատել նույն հիվանդին: Իսկ մեխանիկական ներգործության բացակայությունը ֆեմտո-LASIK-ի յուրահատկությունն է: Այսպիսով, զգալիորեն նվազում է շտկման միջամտության անվտանգությունը և քիչ հավանական են դառնում հետվիրահատական բարդությունները:

Հարցեր, պատասխաններ, մեկնաբանություններ