Հայաստանում առաջին անգամ բրախիոցեֆալ ցողունի պրոթեզավորման եզակի վիրահատություն է իրականացվել գլխուղեղային արյան շրջանառության անբավարարությամբ տառապող պացիենտի մոտ

16.09.14 թ. առաջին անգամ Հայաստանում՝ «Էրեբունի» բժշկական կենտրոնում, կատարվել է բրախիցեֆալ ցողունի պրոթեզավորման վիրահատություն: Այն իրականացրել է Պարանոցային անոթների և սրտի վիրաբուժության ծառայության ղեկավար, սրտանոթային վիրաբույժ, բժշկական գիտությունների դոկտոր Մեսրոպ Պետրոսի Շատախյանը:   

56-ամյա հիվանդ Ս.-ն «Էրեբունի» բժշկական կենտրոն է դիմել հետևյալ գանգատներով. խոսքի պարբերաբար խանգարումներ, շարժումների դանդաղում, հիշողության վատացում: ՀՏ անգիոգրաֆիայի և դուպլեքս հետազոտության տվյալների հիման վրա պացիենտի մոտ բացահայտվել է չափազանց հազվադեպ հանդիպող ախտահարում՝ բրախիոցեֆալ ցողունի խցանում, որն արտահայտվում էր ողնաշարային և քնային զարկերակների միջոցով գլխուղեղի արյան կողոպտմամբ (steel syndrome): Պացիենտի մոտ առկա էր գլխուղեղի և պարանոցի աջ հատվածի, նաև վերին աջ վերջույթների արյան մատակարարման անբավարարություն (նորմայից 4-5 անգամ պակաս), ինչը հաստատում էր աջ քնային  զարկերակի և աջ ձեռքում պուլսի բացակայությունը: Տվյալ իրավիճակում արյան նորմալ մատակարարման վերականգնման համար վիրահատական միջամտություն էր պահանջվում՝ վերել աորտայից մինչև բրախիոցեֆալ ցողունի դիստալ հատվածը պրոթեզի տեղադրում:

16.09.14 թ. պացիենտն արդեն վիրահատարանում էր (վիրաբույժներ՝ Մ.Պ. Շատախյան, Ա.Ա. Հայրապետյան, Ա.Ն. Ալեքսանյան, Ա.Վ. Ստամբոլցյան, անէսթեզիոլոգ՝ Ա.Ռ. Մուրադյան): Օպտիմալ երկարաժամկետ արդյունքներ ստանալու նպատակով Մ.Պ. Շատախյանը վերոնշյալ ուղու անատոմիական վերակառուցմանը վերաբերող որոշում ընդունեց (կրծքավանդակի բացման ճանապարհով): Ստերնոտոմիայի ճանապարհով աորտայից մինչև բրախիոցեֆալային ցողունի երկատումը 12 մմ տրամագծով անոթային պրոթեզ տեղադրվեց: Պրոթեզավորումից անմիջապես հետո աջ քնային զարկերակում և վերին վերջույթներում արյան հոսքը վերականգնվեց, ինչը հաստատվեց դուպլեքս և դոպլեր հետազոտությունների արդյունքում: Հիվանդը դուրս գրվեց 5-րդ օրը՝ բավարար վիճակում:

Հայաստանում առաջին անգամ բրախիոցեֆալ ցողունի պրոթեզավորման եզակի վիրահատություն է իրականացվել գլխուղեղային արյան շրջանառության անբավարարությամբ տառապող պացիենտի մոտԲրախիոցեֆալ ցողունի նեղացումը կամ խցանումը բավականին հազվադեպ հանդիպող ախտահարում է, ուստի վիրահատական միջամտությունները բազմաքանակ չեն (մասնավորապես՝ միջկրծքավանդակային ճանապարհով), և, համապատասխանաբար, հետազոտությունները համաշխարհային գրականության մեջ եզակի բնույթ ունեն:

Վստահ կարելի է ասել, որ «Էրեբունի» բժշկական կենտրոնի պարանոցային անոթների և սրտի վիրաբուժության ծառայությունն իրականացնում է ուղեղային արյան շրջանառության խանգարումների՝ ինսուլտի կանխարգելմանն ուղղված վիրահատությունների ամբողջ շրջանակը:

Հարցեր, պատասխաններ, մեկնաբանություններ