Մայիսի 15-ին ծնվել է ռուս և ֆրանսիացի կենսաբան, Նոբելյան մրցանակի դափնեկիր Իլյա Մեչնիկովը

Իլյա Իլյայի Մեչնիկովը ծնվել է 1845թ. մայիսի (3) 15-ին Խարկովի Իվանովկա գյուղում, կալվածատիրոջ ընտանիքում: 1864թ. Մեչնիկովն ավարտել է Խարկովի համալսարանը:

Հետագայում Մեչնիկովն  իր պրակտիկան անց է կացրել Գերմանիայում՝ Ռ. Լեյկարտի և Կ. Զիբոլդայի մոտ: 1867թ. պաշտպանել է մագիստրոսական թեզը, իսկ մեկ տարի անց Պետերբուրգի համալսարանում` դոկտորական ատենախոսությունը: 1870թվականից մինչև 1882թ. աշխատել է Օդեսսայի Նովոռոսիսկյան համալսարանում որպես դասախոս: 

1882թ. Մեչնիկովը բացահայտում է ֆագոցիտոզի երևույթը և զարգացնում իմունիտետի ֆագոցիտոզային տեսությունը: Հրատարակում է մանրէաբանական խնդիրների վերաբերյալ բազմաթիվ աշխատանքներ, մասնավորապես, ուսումնասիրում է խոլերայի, տուբերկուլյոզի և բազմաթիվ այլ վարակիչ հիվանդությունների ծագման և զարգացման խնդիրները:  

1887թ. Իլյա Մեչնիկովը գաղթում է Ֆրանսիա, որտեղ Լուի Պաստերը նրան առաջարկում է գլխավորել Փարիզի ինստիտուտի լաբորատորիան, իսկ 1905-ից Մեչնիկովը դառնում է այդ ինստիտուտի փոխտնօրենը: 

1908թ. ֆիզիոլոգիայի և բժշկության ասպարեզում Մեչնիկովն իր աշխատանքների՝ ֆագոցիտոզի տեսության համար, արժանանում է Նոբելյան մրցանակի: 

Մեծն գիտնական Իլյա Իլյայի Մեչնիկովը մահացել է սրտամկանի ինֆարկտից 1916թ. հուլիսի 15-ին, Փարիզում:

Հարցեր, պատասխաններ, մեկնաբանություններ