Մայիսի 10-ին ծնվել է իռլանդացի գործարար, թեյի մագնատ, հայտնի թեյի ընկերության հիմնադիր Թոմաս Լիփթոնը

Թոմաս Ջոնստոն Լիփթոնը ծնվել է 1850թ. մայիսի 10-ին Գլազգոյում (Շոտլանդիա): Արդեն հինգ տարեկան հասակում նա օգնում էր իր հորը նպարեղենի խանութում, իսկ երբ նրա եղբայրը և քույրը մահացան,  նա ստիպված եղավ թողնել դպրոցը:

15 տարեկանում նա մեկնեց ԱՄՆ, որտեղ կատարում էր ցանկացած տեսակի աշխատանք, սակայն, վերջիվերջո, Նյու-Յորքի հանրախանութի նպարեղենի բաժնի վաճառող դարձավ: Թոմասը հանրախանութի աշխատանքին ներսից ծանոթանալու հնարավորություն ունեցավ: 

Նա հայրենիք վերադարձավ 1871թ.՝ զինված գիտելիքներով և 100 ֆունտ ստեռլինգով: Գլազգոյում նպարեղենի իր սեփական խանութը բացեց, որտեղ հենց ինքն էր ղեկավարը, վաճառողը, գնորդը… Գնորդներին նա գրավում էր ցածր գներով, գեղեցիկ ձևավորած պատուհաններով: 1881թ. Սուրբ Ծննդին պանրի ամենամեծ կտորը նրա կողմից էր պատվիրվել, որի համար անմիջապես հերթեր գոյացավ:  

Լիփթոնն ընդունակ էր զանազան հնարանքների, և առևտուրը հաջող էր ընթանում: 1880-ականի կեսերին Շոտլանդիայում գտնվող 11 խանութների տեր էր, իսկ արդեն 1885թ. Չիկագոյում նա գնեց փաթեթավորման գործարան ու պահեստներ:  

1890թ. Լիփթոնը թեյի բիզնեսով սկսեց զբաղվել, ինչի շնորհիվ այսօր նրա անունը հայտնի է երկրագնդի ցանկացած անկյունում: Ցեյլոնում նա թեյի հինգ այգիներ գնեց, որտեղ փորձարկումներ էր կատարում: Նրա նպատակն էր՝ որակյալ թեյը մատչելի գնով: Նա առանց միջնորդների էր աշխատում՝ սեփական այգիներ և նավատորմ ունենալով, այդ պատճառով էլ նրա թեյը թանկ չէր: Նա փաթեթավորում էր թեյը ստվարաթղթե տուփերում, և հենց փաթեթավորումն ինքնին ճանաչված էր: 

Ահա ինչու ովքեր գեթ մեկ անգամ փորձում էին Լիփթոնի թեյը, այլևս չէին կարողանում դրանից հրաժարվել: Հենց ինքը՝ Վիկտորիա թագուհին այս թեյի մեծ երկրպագուն էր: 1897թ. Թոմաս Լիփթոնին ասպետի աստիճան շնորհվեց:

Պարոն Թոմաս Լիփթոնը մահացավ 1931թ. հոկտեմբերի 3-ին: Ժառանգ նա չուներ, և նրա կարողությունը բարեգործության համար օգտագործվեց:

Հարցեր, պատասխաններ, մեկնաբանություններ