Մայիսի 8-ին ծնվել է Ֆրանսիացի մանրէաբան, Նոբելյան մրցանակի դափնեկիր Անդրե Լվովը

Անդրե Միշել Լվովը ծնվել է 1902թ. մայիսի 8-ին ֆրանսիական Էլե-լյո-Շատո գյուղում, ռուսական ծագում ունեցող մտավորական հրեայական ընտանիքում: 1922թ. նա ընդունվել է Պաստերյան ինստիտուտ, սովորել է աշխարհահռչակ ֆրանսիացի մանրէաբան Էդուար Շատոնի մոտ: Արդյունքում նրա հետ աշխատել է 17 տարի:

Նրա առաջին ուսումնասիրությունները վերաբերում էին թարթիչավոր մակաբույծների մորֆոգենեզին և զարգացման ցիկլին: Այնուհետև աշխատել է պարզ միաբջիջ օրգանիզմների սնվելու հետ կապված խնդիրների վրա: 1929թ. Փարիզի համալսարանում բժշկի աստիճան է ստացել, 1932թ.` փիլիսոփայության դոկտորի աստիճան:   

1932-1933 թթ. Լվովը աշխատել է Ռոկֆելլերյան հիմնադրամի դրամաշնորհով Հեյդելբերգում գտնվող Օտտո Մեյերհոֆի լաբորատորիայում: 1936թ. նա աշխատել է Քեմբրիջում գտնվող նույն հիմնադրամի մեկ այլ դրամաշնորհով Դեյվիդ Կեյլինի լաբորատորիայում, իսկ 1938թ. դարձել է Պաստերյան ինստիտուտի ֆակուլտետի դեկան:  

Լվովի հիմնական հետազոտություններն ուղղված էին մանրէների աճի գործոնների, վիրուսների ֆիզիոլոգիայի, ֆերմենտների խթանման և ճնշման ուսումնասիրությաններին: Նա ապացուցեց լիզոգոնիայի ժառանգական բնույթը, բացահայտեց ուլտրամանուշակագույն ճառագայթների պրոֆագը խթանելու ունակությունը:

 1962թ. Լվովն առաջարկեց վիրուսների դասակարգումը և ներմուծեց նախավիրուս հասկացությունը: Նրա մանրէների նախավիրուսներով վարակման մեխանիզմին վերաբերող աշխատանքներն արժանացել են Նոբելյան մրցանակի: 

Անդրե Լվովը մի շարք համալսարաններում՝ Չիկագոյի, Օքսֆորդի, Գլազգոյի և Լուվենի պատվավոր աստիճաններ ուներ: 

Անդրե Միշել Լվովը մահացել է 1994թ. սեպտեմբերի 30-ին Փարիզում:

Հարցեր, պատասխաններ, մեկնաբանություններ