Թե ինչպես ստեղծվեց և հանրահայտ դարձավ արագ պատրաստվող լափշան

Երկրորդ համաշխարհային պատերազմից հետո գետնահարված կայսերական Ճապոնիան սննդի սուր պակաս էր զգում: Այդ ժամանակահատվածում Անդո Մոմոֆուկին, ով ծնվել է 1910 թ. մարտի 5-ին, Թայվանում վարկային միության գործադիր տնօրեն էր: Սակայն շուտով ընկերությունը սնանկանում է, և երիտասարդ ֆինանսիստը մնում է առանց որևէ իենի:

Անդոն որոշում է, որ շուկան գրավելու հրատապ գործիք կարող է դառնալ մատչելի և համեղ սննդի մշակման որևէ տեխնոլոգիայի բացահայտումը: 

Ճապոնիան ավանդական բրնձային մշակույթի երկիր է, և հացը կես դար առաջ ճապոնացիների համար արտասովոր ուտելիք էր: Այդ ժամանակ ԱՄՆ-ից որպես մարդասիրական օգնություն սկսվեց երկիր ներկրվել ամերիկյան ցորեն: Եվ հենց այդ ժամանակ էլ Մոմոֆուկին իր տունը վերածեց լաբորատորիայի՝ որոշելով արագ պատրաստվող լափշա պատրաստել: Նա չորացման բազմազան միջոցներ փորձեց, սկայն երկար ժամանակ նրան չեր հաջողվում ստանալ այնպիսի լափշա, որը հնարավոր կլիներ պատրաստել արագ և պահել երկար ժամանակ:   

Հայտնագործությունը պատահական տեղի ունեցավ: Մոմոֆուկին ուշադրություն դարձրեց, թե ինչպես է  իր կինը առանց թթխմորի հեղուկ խմորով  տեմպուրա (ճապոնական ուտեստ) պատրաստում: Պատրաստելիս խմորի մեջ բազմաթիվ անցքեր էին առաջանում, որոնք նրան սպունգի տեսք էին տալիս: Անդոն այս տեխնոլոգիան փորձեց կիրառել արագ պատրաստվող լափշայի (արիշայի) արտադրության համար… Եվ այն ստացվեց:  

1958 թ. Անդո Մոմոֆուկին բացեց առևտրային կրպակ և սկսեց շրջանառել իր ստեղծած ապրանքանիշը: Շուտով նրա լափշան հանրահայտ դարձավ: Առաջին հայտնությունը կատարելուց տասներեք տարի անց Անդոն նոր արտադրանք մշակեց, որն անվանեց «Արիշտան բաժակի մեջ»: Նրանից առաջ ոչ մեկը չէր մտածել արտադրել արիշտան հենց այդպես: Ներկայումս աշխարհում ամեն տարի 44 միլիարդ բաժին արագ պատրաստվող արիշտա և վերմիշել են օգտագործում:  

Այսօր արագ պատրաստվող մակարոնի տարբեր տեսակներ կարելի է գնել աշխարհի ցանկացած երկրում, իսկ Անդո Մոմոֆուկիի հայտնագործությունը սննդամթերքի սպառման համաշխարհային մշակույթի անբաժանելի մասը դարձավ: 

Ճապոնիայում 2000 թ. անցկացրած սոցհարցման ժամանակ Անդո Մոմոֆուկիի արագ պատրաստվող արիշան XX դարի ճապոնական գլխավոր հայտնությունն անվանեցին: 

Անդո Մոմոֆուկին մահացավ 2007 թ. հունվարի 5-ին Օսակայում (Ճապոնիա):

Հարցեր, պատասխաններ, մեկնաբանություններ