Փետրվարի 6-ին ծնվել է ամերիկացի սննդաբան, «Սոված սննդակարգի հրաշքը» գրքի հեղինակը

Պոլ Բրեգգը Ամերկայում առողջ սնունդ ընդունելու շարժման հիմնադիրներից է: Նրա կողմից մշակվել են մարմնի դիմադրողականությունը բարձրացնելուն նպաստող քաղցի և շնչառության հատուկ մեթոդներ:

Պոլ Չապպիուս Բրեգգը ծնվել է 1895 թ. փետրվարի 6-ին ԱՄՆ-ի Ինդիանա նահանգում: Միջնակարգ դպրոցն ավարտելուց հետո նա երեք տարի ծառայել է ԱՄՆ-ի Ազգային գվարդիայում, որից հետո տեղափոխվել է Նյու-Յորք, որտեղ 1915թ. ամուսնացել է Նիվե Պարնինի հետ (այս ամուսնությունից ծնվել է երկու աղջիկ):

Այնուհետև ընտանիքը տեղափոխվել է Ինդիանապոլիս, որտեղ Պոլն աշխատել է կյանքի ապահովագրմամբ զբաղվող խոշոր ընկերությունում որպես ապահովագրական գործակալ: Մի քանի տարի անց նա վերադարձել է ԱՄՆ Արևելյան ափ, որտեղ աշխատել է Երիտասարդական քրիստոնեական միության տարբեր բաժիններում և տարբեր դպրոցներում՝ որպես ֆիզկուլտուրայի և թեթև ատլետիկայի ուսուցիչ: 

1929 թ. Բրեգգն իր առողջության մասին դասախոսություններով սկսեց տարբեր քաղաքներով շրջագայություն կատարել: Նրան մեծ համբավ բերեց իր «Սոված սննդակարգի հրաշքը» գիրքը: Բրեգգը համոզված էր, որ մարդու կյանքի միջին տևողությունը 120 տարի է: Առողջ սննդի մասին ուսմունքի հիմքում ընկած է հում սննդի ընդունումն ու քաղցի օրերը: Բրեգգը գտնում էր, որ որոշակի սխեմայով քաղցի օրերն անցկացնելը (քաղցի օրեր՝ շաբաթվա մեջ մեկ օր, իսկ եռամսյակի ընթացքում՝ մեկ շաբաթ) շատ օգտակար է մարդու համար, նպաստում է օրգանիզմի մաքրմանը և խթանում  իմունային համա¬կարգի աշխատանքը:

Բացի այդ, մարդու սննդակարգը պետք է 60%-ից ոչ պակաս բաղկացած լինի մրգերից և բանջարեղեններից: Կերակրի աղը սննդակարգից ամբողջությամբ հանվում էր, իսկ սովորական ջրի փոխարեն Բրեգգը խորհուրդ էր տալիս օգտագործել միայն թորած ջուր: Նրա կարծիքով, այն օրգանիզմի համար վնասակար նյութերը լավ է լուծում և դրանք դուրս հանում օրգանիզմից:

Բրեգգը մեծ նշանակություն էր տալիս մաքուր օդում երկար մնալուն, ֆիզիկական վարժություններ կատարելուն և ճիշտ խորը շնչառությանը: Առողջության հիմնական բաղադրիչը նա համարում էր ուղիղ ողնաշարը և ամուր նյարդային համակարգի առկայությունը:

Ռուսաստանում նրա ուսմունքի հիման վրա բեռնաթափման սննդակարգի մեթոդ է մշակվել, ինչը հաջողությամբ գործածվում է տարբեր հիվանդությունների ժամանակ:

Պոլ Բրեգգը ամուր, ուժեղ և առողջ էր, ակտիվ ապրելակերպ էր վարում մինչև կյանքի վերջին օրը: Նա մահացավ 1976 թ. դեկտեմբերի 7-ին Մայամիում (Ֆլորիդա, ԱՄՆ): Համարվում է, որ նա մահացել է սյորֆինգով սահելու ժամանակ դժբախտ պատահարի հետևանքով` 81 տարեկան հասակում:

Հարցեր, պատասխաններ, մեկնաբանություններ